গুৱাহাটী, 8 আগষ্ট: ৰাষ্ট্ৰীয় সেউজ ন্যায়াধীকৰণে কাজিৰঙাত পঞ্চতাৰকাযুক্ত হোটেল স্থাপনৰ সিদ্ধান্তৰ বিৰুদ্ধে নিজাববীয়াকৈ গোচৰ ৰুজু কৰাৰ পাচতো বিষয়টোক লৈ বিতৰ্কৰ অৱসান হোৱা নাই । বৃহস্পতিবাৰে ৰাষ্ট্ৰীয় উদ্যানৰ সংলগ্ন হাতীখুলি চাহ বাগিচাত উপস্থিত হৈ বিলাসী হোটেল নিৰ্মাণৰ উদ্দেশ্যে উচ্ছেদিত আদিবাসী চাহ জনগোষ্ঠীৰ পৰিয়ালসমূহৰ দুৰ্গতিৰ বুজ লয় আম আদমী পাৰ্টিৰ জ্যেষ্ঠ নেতা মনোজ ধানোৱাৰ আৰু ৰাজীৱ শইকীয়াই ।
হাতীখুলি বাগিচাৰ স্থানীয় বাসিন্দাসকলৰ সৈতে মত-বিনিময় কৰাৰ পাচত বোকাখাতত এখন সংবাদমেল সম্বোধন কৰে আপৰ নেতা মনোজ ধানোৱাৰ আৰু ৰাজীৱ শইকীয়াই । সংবাদমেলত যুগ যুগ ধৰি হাতীখুলিত বসবাস কৰা থলুৱা লোকক উচ্ছেদৰ বিৰুদ্ধে সৰৱ হয় ধানোৱাৰ । পঞ্চতাৰকা হোটেল নিৰ্মাণৰ নামত আদিবাসী ভূমিপুত্ৰক উচ্ছেদৰ বিৰোধিতা কৰাৰ লগতে ইতিমধ্যে উচ্ছেদ কৰা পৰিয়াল সমূহক পৰ্যাপ্ত ক্ষতিপূৰণ দিবলৈ তেওঁ দাবী জনায় ।
তদুপৰি কেইদিনমান পূৰ্বে উচ্ছেদৰ বিৰুদ্ধে প্ৰতিবাদ সাব্যস্ত কৰিবলৈ যোৱা আটছা কৰ্মীসকলৰ ওপৰত চলোৱা আৰক্ষীৰ আতিশয্যৰ বিৰুদ্ধেও সৰৱ হয় আপৰ নেতাগৰাকী । তেওঁ প্ৰতিবাদকাৰীৰ ওপৰত নিৰ্যাতন চলোৱা ঘটনাৰ উচিত তদন্তৰ লগতে দোষী আৰক্ষী বিষয়াৰ বিৰুদ্ধে শাস্তিমূলক ব্যৱস্থা লোৱাৰ দাবী জনায় ।
আনহাতে ৰাজ্যখনৰ চাহ বাগিচা অঞ্চলত বসবাস কৰা 10 লক্ষাধিক স্থায়ী শ্ৰমিক তথা আদিবাসী চাহ জনগোষ্ঠীৰ অস্থায়ী শ্ৰমিক সকলকো মাটিৰ পট্টা দিবলৈও দাবী উত্থাপন কৰে ধানোৱাৰে । আপৰ নেতাগৰাকীয়ে ৰাজ্য চৰকাৰে গ্ৰহণ কৰা বসুন্ধৰা 1, বসুন্ধৰা 2 আৰু বসুন্ধৰা 3 আঁচনিৰ অধীনত চাহ বাগিচাত বসবাস কৰা আদিবাসী চাহ জনগোষ্ঠীৰ লোকক ভূমিপট্টা নিদিয়াৰ বাবে চৰকাৰৰ নীতিৰ সমালোচনা কৰে ।