যোৰহাট,২৩ আগষ্ট:এক নিজস্ব শৈলীৰ চিত্ৰশিল্পৰ জৰিয়তে শত-সহস্ৰজনৰ হৃদয়ত স্থান লাভ কৰিবলৈ সক্ষম হোৱা ৰাজ্য তথা দেশৰ যশস্বী চিত্ৰশিল্পী প্ৰয়াত নীলপৱন বৰুৱাৰ অবৰ্তমানত আজিৰে পৰা যোৰহাটৰ যোৰহাট ফাইন আৰ্ট ছ'চাইটিৰ কলা ভৱনত অনুষ্ঠিত হৈছে চিত্ৰশিল্পীগৰাকীৰ এক একক চিত্ৰ প্ৰদৰ্শনী । অসম চাৰুকলা পৰিষদৰ উদ্যোগত আৰম্ভ হোৱা শিল্পীগৰাকীৰ অনন্য সৃষ্টিৰাজিৰ একক চিত্ৰ প্ৰদৰ্শনী শুকুৰবাৰৰ পৰা তিনিদিন ধৰি কলা ভৱনত অনুষ্ঠিত হ'ব ।
শুকুৰবাৰে বিয়লি তিনিদিনীয়াকৈ অনুষ্ঠিত হ'বলগীয়া এই চিত্ৰ প্ৰদৰ্শনীৰ বন্তি প্ৰজ্বলন কৰি উদ্বোধন কৰে বিশিষ্ট ভাস্কৰ্য শিল্পী চালেহা আহমেদ, বিশিষ্ট চিত্ৰশিল্পী ভৃগুপতি হাজৰিকা, বিশিষ্ট চিত্ৰশিল্পী পৰেশ শইকীয়া, শিল্পী মধুসুদন দাস প্ৰমুখ্যে বিশিষ্ট ব্যক্তিসকলে । উক্ত অনুষ্ঠানত উপস্থিত থাকি অসম চাৰুকলা পৰিষদৰ সাধাৰণ সম্পাদক সুভাকৰ লস্কৰে সাংবাদিকৰ আগত কয়,"অসম চাৰুকলা পৰিষদৰ প্ৰতিষ্ঠাপক আছিল প্ৰয়াত চিত্ৰশিল্পী নীলপৱন বৰুৱা । যোৰহাটত তেখেতৰ এইখন প্ৰথম প্ৰদৰ্শনী । এই প্ৰদৰ্শনীত তেখেতৰ ৩৩ খন ছবি প্ৰদৰ্শিত হ'ব । যোৰহাটবাসী চিত্ৰপ্ৰেমী ৰাইজে আমাক সঁহাৰি জনাব বুলি আমি আশাবাদী । প্ৰখ্যাত শিল্পীগৰাকীৰ অবৰ্তমানত গুৱাহাটীত এখন প্ৰদৰ্শনী হৈছিল আৰু তাৰ পাছত এইবাৰ যোৰহাটত আয়োজন কৰা হৈছে ।"
লগতে তেওঁ কয়,"ইয়াৰ সমান্তৰালভাবে যোৰহাটত এক প্ৰশিক্ষণো অনুষ্ঠিত হৈ আছে । ইয়াত যোৰহাট, গোলাঘাট, শিৱসাগৰৰ প্ৰশিক্ষকসকলৰ দ্বাৰা প্ৰশিক্ষণ দিয়া হৈছে । এই প্ৰশিক্ষণৰ সামৰণী অনুষ্ঠানতে প্ৰয়াত নীলপৱন বৰুৱা আৰু জ্ঞানপীঠ বঁটাপ্ৰাপক নীলমণি ফুকনৰ নামত দুটা বঁটাও প্ৰদান কৰা হ'ব । আজিৰ প্ৰদৰ্শনীত প্ৰদৰ্শিত হোৱা প্ৰায় আঠখনমান ছবি ৰাজ্যৰ বাহিৰতো প্ৰদৰ্শিত হৈছে । যিসমূহে যথেষ্ট সমাদৰ লাভ কৰিছে ।"