স্প’ৰ্টছ ডেস্ক, 3 ছেপ্টেম্বৰ: আন্তৰ্জাতিক ক্ৰিকেট পৰিষদে 2023-25 বৰ্ষৰ বিশ্ব টেষ্ট চেম্পিয়নশ্বিপৰ ফাইনেলৰ তাৰিখ ঘোষণা কৰিছে । আই চি চিয়ে ফাইনেলৰ তাৰিখ ঘোষণা কৰি কৈছে যে তৃতীয় সংস্কৰণৰ ফাইনেল মেচখন ঐতিহাসিক লৰ্ডছত 11 জুনত অনুষ্ঠিত হ’ব ৷ এই হাই প্ৰফাইল মেচসমূহ 11 জুনৰ পৰা 15 জুনৰ ভিতৰত অনুষ্ঠিত হ’ব ৷ ফাইনেল মেচখনৰ বাবে 16 জুনত এটা সংৰক্ষিত দিনো ৰখা হৈছে ।
লৰ্ডছত প্ৰথমবাৰৰ বাবে ডব্লিউ টি চি ফাইনেল আয়োজন কৰা হৈছে । পূৰ্বে কেনিংটন অভেলে 2021 আৰু 2023 চনত ডব্লিউ টি চি সংস্কৰণৰ ফাইনেল আয়োজন কৰিছিল ৷ এই মেচ দুখনত ক্ৰমে অষ্ট্ৰেলিয়া আৰু নিউজিলেণ্ডে জয় লাভ কৰিছিল । ফাইনেল মেচখন পইণ্ট তালিকাৰ শীৰ্ষ দুটা দলৰ মাজত অনুষ্ঠিত হ’ব ৷ সম্প্ৰতি ভাৰত এই তালিকাৰ শীৰ্ষস্থানত থকাৰ বিপৰীতে অষ্ট্ৰেলিয়া আছে দ্বিতীয় স্থানত ৷
আই চি চিৰ মুখ্য কাৰ্যবাহী বিষয়া জিঅ’ফ এলাৰ্ডিচে মন্তব্য কৰিছে যে, বহু প্ৰত্যাশিত এই শৃংখলাৰ বাবে সমৰ্থকৰ ব্যাপক সমৰ্থন আশা কৰা হৈছে । এলাৰ্ডিচে কয়, "আই চি চি বিশ্ব টেষ্ট চেম্পিয়নশ্বিপ ফাইনেল ক্ৰিকেট কেলেণ্ডাৰৰ আটাইতকৈ প্ৰত্যাশিত ইভেণ্টসমূহৰ ভিতৰত এটা হৈ পৰিছে ৷ আমি 2025 সংস্কৰণৰ দিন ঘোষণা কৰি আনন্দিত হৈছো" ।