স্প’ৰ্টছ ডেস্ক: পাঁচখন মেচৰ শৃংখলাৰে শুকুৰবাৰৰ পৰা আৰম্ভ হ’ব ব’ৰ্ডাৰ-গাভাস্কাৰ ট্ৰফী 2024 ৷ পাৰ্থৰ অপ্টাছ ষ্টেডিয়ামত ভাৰত-অষ্ট্ৰেলিয়াৰ মাজত অনুষ্ঠিত হ’বলগা এই শৃংখলাৰ বাবে মাজত আছে মাথো কেইটামান ঘণ্টা ৷
অধিনায়ক ৰোহিত শৰ্মাৰ অনুপস্থিতিত টীম ইণ্ডিয়াই প্ৰথমখন টেষ্টত সুন্দৰ আৰম্ভণি কৰিব বিচাৰিব ৷ আনহাতে, অষ্ট্ৰেলিয়াই পূৰ্বৰ কথা সুঁৱৰি প্ৰতিশোধ পূৰণৰ উদ্দেশ্যে খেলপথাৰত নামিব ৷
টীম ইণ্ডিয়াই নিজৰ ঘৰুৱা খেলপথাৰত অষ্ট্ৰেলিয়াৰ বিৰুদ্ধে লাভ কৰা পূৰ্বৰ জয়ে আগন্তুক টেষ্ট শৃংখলাটোৰ বাবে জয়ৰ আশা সজীৱ কৰি ৰাখিছে ৷ টীম ইণ্ডিয়াৰ বাবে ব’ৰ্ডাৰ-গাভাস্কাৰ টেষ্ট শৃংখলাটো অত্যন্ত গুৰুত্বপূৰ্ণ, কিয়নো তেওঁলোকে অষ্ট্ৰেলিয়াক 4-0 ব্যৱধানত পৰাস্ত কৰিব পাৰিলেহে আই চি চি বিশ্ব টেষ্ট চেম্পিয়নশ্বিপৰ (ডব্লিউ টি চি) ফাইনেলত স্থান নিশ্চিত কৰিব পাৰিব ৷ যি প্ৰতিযোগিতা 2025 চনৰ জুনত লৰ্ডছত অনুষ্ঠিত হ'ব ।
ৰোহিত শৰ্মা আৰু শুভমন গিল পাৰ্থত প্ৰথমখন টেষ্টত অনুপস্থিত থকাৰ বাবে আগশাৰীৰ পেচাৰ তথা দলৰ সহ-অধিনায়ক যশপ্ৰীত বুমৰাহে অধিনায়কৰ দায়িত্ব পালন কৰিব ৷ অনুৰাগীসকলে ভাৰত বনাম অষ্ট্ৰেলিয়া টেষ্ট শৃংখলাৰ সকলোবোৰ মেচ বিনামূলীয়াকৈ কেনেদৰে উপভোগ কৰিব পাৰিব, সেয়া তলত উল্লেখ কৰা হ’ল-
- ভাৰত আৰু অষ্ট্ৰেলিয়াৰ মাজৰ ব’ৰ্ডাৰ-গাভাস্কাৰ ট্ৰফীৰ টেষ্ট মেচ পোনপটীয়াকৈ কেনেদৰে উপভোগ কৰিব ?
ভাৰত আৰু অষ্ট্ৰেলিয়াৰ মাজৰ ব’ৰ্ডাৰ-গাভাস্কাৰ ট্ৰফীৰ টেষ্ট মেচ ষ্টাৰ স্প’ৰ্টছ নেটৱৰ্কত পোনপটীয়াকৈ সম্প্ৰচাৰ কৰা হ'ব ।
- মেচখনৰ লাইভ ষ্ট্ৰীমিং কেনেদৰে উপভোগ কৰিব ?
ভাৰতীয় অনুৰাগীসকলে ডিজনী+হটষ্টাৰ এপত এই টেষ্ট শৃংখলাৰ সকলোবোৰ মেচ উপলব্ধ হ’ব ৷ লগতে জিঅ’ চিনেমাই সকলোবোৰ মেচৰ লাইভ ষ্ট্ৰীমিং বিনামূলীয়াকৈ আগবঢ়াব ।