স্প’ৰ্টছ ডেস্ক, 11 জুলাই:ভাৰতীয় ক্ৰিকেট দলে ২০২৫ চনৰ চেম্পিয়নছ ট্ৰফীৰ বাবে পাকিস্তানলৈ যোৱাৰ সম্ভাৱনা নাই আৰু ভাৰতীয় ক্ৰিকেট ব’ৰ্ডে আন্তঃৰাষ্ট্ৰীয় ক্ৰিকেট পৰিষদক ডুবাই বা শ্ৰীলংকাত মেচ আয়োজন কৰিবলৈ ক’ব বুলি বিচিচিআইৰ সূত্ৰই বৃহস্পতিবাৰে এএনআইক জনায় । ২০০৮ চনৰ পৰা ভাৰতে পাকিস্তান ভ্ৰমণ কৰা নাই আৰু প্ৰতিদ্বন্দ্বী দলটোৱে মাল্টি টিম ইভেণ্টতহে ইজনে সিজনৰ বিৰুদ্ধে খেলে ৷
যোৱা বছৰ পাকিস্তানে এছিয়া কাপৰ আয়োজন কৰিছিল যদিও চূড়ান্ত বিজয়ী ভাৰতক আয়োজকসকলে নিৰ্ধাৰণ কৰা “হাইব্ৰিড মডেল”ৰ অধীনত শ্ৰীলংকাত তেওঁলোকৰ সকলো মেচ খেলিবলৈ অনুমতি দিয়া হৈছিল । ভাৰতীয় দলে দাবী কৰিছিল যে তেওঁলোকৰ চৰকাৰে এছিয়া কাপৰ বাবে পাকিস্তান ভ্ৰমণৰ অনুমতি দিয়া নাছিল ।
লগতে পঢ়ক:২০২৫ ৰ চেম্পিয়নছ ট্ৰফীত ভাৰতীয় দলত থাকিব নে বিৰাট-ৰোহিত ? - Champions trophy 2025
অহা বছৰ ২০২৫ চনৰ ফেব্ৰুৱাৰীৰ পৰা মাৰ্চলৈ পাকিস্তানত অনুষ্ঠিত হ’ব আই চি চি চেম্পিয়নছ ট্ৰফী । ১৯ ফেব্ৰুৱাৰীৰ পৰা ৯ মাৰ্চলৈ অনুষ্ঠিত হ’বলগীয়া প্ৰতিযোগিতাখনৰ মেচৰ তাৰিখ পিচত ঘোষণা কৰা হ’ব । ২০০৮ চনৰ এছিয়া কাপৰ পিচত দুয়োখন দেশৰ মাজত উত্তেজনাপূৰ্ণ সম্পৰ্কৰ বাবে ভাৰতে পাকিস্তানত কোনো ক্ৰিকেট প্ৰতিযোগিতা খেলা নাই ।
২০১২ চনৰ ডিচেম্বৰৰ পৰা ২০১৩ চনৰ জানুৱাৰীলৈকে ভাৰতত অনুষ্ঠিত হোৱা দ্বিপাক্ষিক শৃংখলাটো দুয়োখন দেশৰ মাজত অন্তিম দ্বিপাক্ষিক শৃংখলা হিচাপে পৰিগণিত হয় । তাৰ পিচৰ পৰা দুয়োখন দেশ কেৱল আইচিচি টুৰ্ণামেণ্ট আৰু এছিয়া কাপতহে মুখামুখি হৈছে । দুয়োখন দেশৰ সম্পৰ্কৰ বাবে আগন্তুক প্ৰতিযোগিতাত ভাৰতৰ অংশগ্ৰহণক লৈ অনিশ্চয়তাৰ সৃষ্টি হৈছে ।