আন্তঃৰাষ্ট্ৰীয় দবা দিৱসৰ পূৰ্বে যুৱ প্ৰজন্মলৈ গ্ৰেণ্ডমাষ্টাৰ বিশ্বনাথন আনন্দৰ বিশেষ বাৰ্তা - CHESS DAY

World Chess Day : গ্ৰেণ্ডমাষ্টাৰ বিশ্বনাথন আনন্দে ২০ জুলাইত আন্তঃৰাষ্ট্ৰীয় দবা দিৱস উদযাপনৰ এক অনন্য উপায় উলিয়াইছে । দবাৰ কিংবদন্তিগৰাকীয়ে তেওঁৰ স্বাক্ষৰিত দবা বৰ্ড উপহাৰ দিয়াৰ লগতে এখন চিঠিও লিখিছিল, য’ত যুৱক-যুৱতীসকলক অনুপ্ৰাণিত কৰাৰ বাৰ্তা আছিল। পঢ়ক সম্পূৰ্ণ বাতৰি-

স্পৰ্টছ ডেস্ক, 19 জুলাই : আন্তঃৰাষ্ট্ৰীয় দবা দিৱস (INTERNATIONAL CHESS DAY) ৰ পূৰ্বে যুৱ প্ৰজন্মলৈ প্ৰেৰণাদায়ক বাৰ্তা প্ৰেৰণ কৰিছে দবা মাষ্টাৰ বিশ্বনাথন আনন্দে ৷ ই টিভি ভাৰতলৈ দিয়া চিঠিত ক্ৰীড়া কিংবদন্তিগৰাকীয়ে লিখিছে যে যিকোনো বিষয়ৰ ওপৰত আয়ত্ত কেৱল কঠোৰ পৰিশ্ৰমৰ দ্বাৰাহে হয় ৷ লগতে যুৱক-যুৱতীসকলক প্ৰতিটো প্ৰত্যাহ্বান গ্ৰহণ কৰি প্ৰতিখন খেলৰ পৰা শিকিবলৈ কয় ৷

তেওঁ লিখিছে, ‘এই আন্তঃৰাষ্ট্ৰীয় দবা দিৱসত আপোনালোকলৈ মোৰ উষ্ম শুভেচ্ছা জ্ঞাপন কৰিছো ৷ দবা কেৱল খেল নহয়, ই অসীম সম্ভাৱনা, শিক্ষণ আৰু আত্ম-আৱিষ্কাৰৰ যাত্ৰা ৷ আপোনালোকে এই দিনটো উদযাপন কৰাৰ সময়ত মোৰ যাত্ৰাৰ কিছু মুহূৰ্ত আপোনালোকৰ লগত শ্বেয়াৰ কৰিব বিচাৰিছো, যিবোৰে আপোনালোকক অনুপ্ৰাণিত কৰিব বুলি আশা কৰিলোঁ ৷'

তেওঁ কয়, ‘যেতিয়া মোৰ বয়স মাত্ৰ 7 বছৰ আছিল, তেতিয়া মোৰ পৰিয়ালটো মেনিলালৈ গুচি যায় আৰু তাতেই মই নিজকে এক সজীৱ দবা সংস্কৃতিৰ মাজত পাইছিলোঁ ৷ দবাৰ প্ৰতি মোৰ আগ্ৰহক লালন-পালন কৰাত গুৰুত্বপূৰ্ণ ভূমিকা গ্ৰহণ কৰা মায়ে অধ্যৱসায়ীভাৱে মোৰ বাবে দবা ক্লাব আৰু খেলাৰ সুযোগ বিচাৰিছিল ৷ প্ৰাৰম্ভিক প্ৰত্যাহ্বানৰ মাজতো তেওঁৰ অধ্যৱসায়ৰ ফল লাভ কৰিলে আৰু মই অতি সোনকালেই ছুটিৰ দিনৰ প্ৰতিযোগিতাত অংশগ্ৰহণ কৰিবলৈ আৰম্ভ কৰিলোঁ ৷'

চেন্নাইৰ 54 বছৰীয়া গ্ৰেণ্ডমাষ্টাৰগৰাকীয়ে কয় যে, ‘মই শৈশৱত বহু দবা খেল খেলিছো, যদিও সকলো সফল নহ’ল, তথাপিও মই কেতিয়াও চিন্তা কৰা নাছিলো বা পুনৰ চেষ্টা কৰিবলৈও কুণ্ঠাবোধ কৰা নাছিলো ৷ এই অভিজ্ঞতাবোৰে মোক অধ্যৱসায়ৰ মূল্য, অতীতৰ খেলবোৰ অধ্যয়ন কৰাৰ গুৰুত্ব আৰু নিৰন্তৰ শিক্ষণৰ প্ৰয়োজনীয়তা শিকাইছিল ৷'

লগতে পঢ়ক :পশুৰ প্ৰতি কৰা অন্যায়ৰ বিৰুদ্ধাচৰণ মল্লযোদ্ধা সাক্ষী মালিকৰ - SAKSHI MALIK

তেওঁ কয়, ‘মনত ৰাখিব, প্ৰতিজন মহান খেলুৱৈয়ে নবীন হিচাপে আৰম্ভ কৰে আৰু আয়ত্তৰ পথটো কঠোৰ পৰিশ্ৰম, নিষ্ঠা আৰু খেলৰ প্ৰতি প্ৰেমেৰে প্ৰশস্ত হয় ৷ গতিকে, প্ৰতিটো প্ৰত্যাহ্বান গ্ৰহণ কৰক, প্ৰতিটো খেলৰ পৰা শিকক আৰু সদায় ভাল হ’বলৈ চেষ্টা কৰক ৷'

আন্তঃৰাষ্ট্ৰীয় দবা দিৱস উপলক্ষে 5 বাৰৰ বিশ্ব চেম্পিয়নগৰাকীয়ে তামিলনাডুৰ ছাত্ৰ-ছাত্ৰীসকলক তেওঁৰ স্বাক্ষৰযুক্ত দবা বৰ্ড উপহাৰ দিব ৷ বিশ্ব মঞ্চত মহান প্ৰদৰ্শনেৰে আনন্দে ভাৰতীয় দবাত এক উত্তৰাধিকাৰ আৰম্ভ কৰিছিল যিয়ে যুৱক-যুৱতীসকলক এই খেলখনক পেছা হিচাপে গ্ৰহণ কৰিবলৈ অনুপ্ৰাণিত কৰিছিল ৷ 2000 চনত আনন্দে প্ৰথমবাৰৰ বাবে বিশ্ব চেম্পিয়নশ্বিপ লাভ কৰিছিল আৰু ইয়াৰ ফলত দেশত মানসম্পন্ন দবা খেলুৱৈৰ আগমন আৰম্ভ হৈছিল ৷

আন্তঃৰাষ্ট্ৰীয় দবা দিৱস কি ?

এই দিৱস উদযাপনৰ ধাৰণা দাঙি ধৰে ৰাষ্ট্ৰসংঘৰ শৈক্ষিক, বৈজ্ঞানিক আৰু সাংস্কৃতিক সংস্থা (ইউনেস্কো) ই ৷ এই খেলখনৰ প্ৰচাৰ আৰু ইয়াৰ প্ৰতি কৃতজ্ঞতা প্ৰকাশৰ বাবে আন্তঃৰাষ্ট্ৰীয় দবা দিৱস পালন কৰা হয় ৷ এই উপলক্ষে FIDE-এ প্ৰায়ে বিভিন্ন ধৰণৰ দবা খেলৰ জৰিয়তে এই দিৱস উদযাপন কৰে ৷ বেছিভাগ অনুষ্ঠান অনলাইনযোগে আয়োজন কৰা হয় আৰু ইয়াত বহু ইণ্টাৰনেট ব্যৱহাৰকাৰীয়ে অংশগ্ৰহণ কৰে ৷

লগতে পঢ়ক :পেৰিছ অলিম্পিক: আৰ্চাৰীৰ ইতিহাস, ভাৰতৰ ট্ৰেক ৰেকৰ্ড আৰু বহুতো... - Paris Olympics 2024