স্প’ৰ্টছ ডেস্ক, 27 আগষ্ট: ভাৰতীয় ক্ৰিকেট নিয়ন্ত্ৰণ ব’ৰ্ডে(বিচিচিআই) মঙলবাৰে আগন্তুক মহিলা টি-20 বিশ্বকাপ 2024 ৰ বাবে 15 জনীয়া দলটো ঘোষণা কৰে । এই দলটোৰ অধিনায়কৰ দায়িত্ব অৰ্পণ কৰা হৈছে হৰমনপ্ৰীত কৌৰৰ ওপৰত ৷ আনহাতে, অপেনাৰ স্মৃতি মন্ধানাক দিয়া হৈছে সহ-অধিনায়কৰ দায়িত্ব ৷
এই দলটোক স্থান লাভ কৰিছে অসম তনয়া উমা ছেত্ৰীয়ে ৷ অৱশ্যে খেলুৱৈগৰাকী মূল একাদশৰ বিপৰীতে সংৰক্ষিত খেলুৱৈ হিচাপেহে দলটোত স্থান লাভ কৰে ৷
শক্তিশালী বেটিং লাইন আপ
বিশ্বকাপক উদ্দেশ্যি একশক্তিশালী বেটিং লাইন-আপ সমৃদ্ধ ভাৰতীয় দল বাছনি কৰিছে বি চি চি আইয়ে ৷ স্মৃতি মন্ধানাই শৈফালী বাৰ্মাৰ সৈতে দলৰ ইনিংছ মুকলি কৰাৰ সম্ভাৱনা আছে ৷
আনহাতে, বাংলাদেশ শৃংখলাৰ সময়ত যস্তিকাৰ ঠাইত 3 নম্বৰত বেটিং কৰা দয়ালান হেমলতাকো ভাৰতৰ টপ অৰ্ডাৰ বেটছমেনৰ তালিকাত অন্তৰ্ভুক্ত কৰা হৈছে ৷ তাৰোপৰি জেমিমা ৰড্ৰিগছ, দীপ্তি শৰ্মা, ৰিচা ঘোষ আৰু অধিনায়ক হৰমনপ্ৰীত কৌৰৰ দৰে বেটছমেনসকলে ভাৰতৰ বেটিং লাইন-আপ শক্তিশালী কৰি তোলাৰ আশা প্ৰকাশ কৰা হৈছে ।
ৰিচা ঘোষ ভাৰতৰ বাবে উইকেটকীপাৰৰ বিকল্প হ’ব পাৰে । অৱশ্যে, যস্তিকাক দলৰ বেক-আপ হিচাপেহে 15 জনীয়া দলটোত অন্তৰ্ভুক্ত কৰা হৈছে । আনহাতে, বলিং বিভাগত আছে ৰেণুকা সিং, পূজা বস্ত্ৰকাৰ, দীপ্তি শৰ্মা, ৰাধা যাদৱ, আশা শোভানা, সজনা সজীৱন আৰু শ্ৰেয়াংকা পাটিলৰ দৰে খেলুৱৈসকল ।