সৰুপথাৰ, ২৪ আগষ্ট :তামিলনাডুত ২৫ তাৰিখৰ পৰা ২৮ তাৰিখলৈকে অনুষ্ঠিত হ'ব কাইট ব'ৰ্ডিং চেম্পিয়নশ্বিপ ২০২৪ । উক্ত প্ৰতিযোগিতাত অংশগ্ৰহণ কৰিব সৰুপথাৰৰ আন্তঃৰাষ্ট্ৰীয় পৰ্যায়ৰ চেইলাৰ নিশামণি বৰাই । খেলৰ পূৰ্বেই বিচাৰিলে অসমবাসীৰ আশীৰ্বাদ । ৩০ জুলাই তাৰিখে নিশামণি বৰাৰ মহাসাগৰৰ বুকুত প্ৰশিক্ষণ গ্ৰহণৰ বাতৰি ইটিভি ভাৰত অসমত সম্প্ৰচাৰ হৈছিল - কিদৰে কাইট ব'ৰ্ডিং খেলৰ কঠোৰ প্ৰশিক্ষণত ব্যস্ত হৈছিল সৰুপথাৰৰ নিশামণি ?
অসমৰ প্ৰথমগৰাকী কাইট ব'ৰ্ডিং মহিলা খেলুৱৈ হোৱাৰ লক্ষ্যৰে কঠোৰ প্ৰশিক্ষণত নামি পৰিছিল সৰুপথাৰ নগাজুৰি দ'চুক গাঁৱৰ নিশামনি বৰা । বিগত সময়ছোৱাত চেইলিঙৰ দৰে দুঃসাহসিক ৰাষ্ট্ৰীয় ক্ৰীড়াত অংশগ্ৰহণ কৰি অসমৰ প্ৰথমগৰাকী মহিলা খেলুৱৈ নিশামনিয়ে INWTC ৰ উদ্যোগত গোৱাত অনুষ্ঠিত ইণ্ডিয়ান নেভি অপেন উইণ্ড চাৰ্ফিং চেম্পিয়নশ্বিপত অংশগ্ৰহণ কৰি সোণৰ পদকেৰে বৃহৎ সফলতা লাভ কৰিছিল । ইয়াৰ উপৰি নিশামনিয়ে বেপুৰ ইণ্টাৰনেচনেল ৱাটাৰ ফেষ্টিভেলত অংশগ্ৰহণ কৰি গৌৰৱ বুটলিবলৈ সক্ষম হৈছিল ।
২০২৩ বৰ্ষৰ পৰা ক্ৰীড়াৰ পাতনি মেলা নিশামনিয়ে বৰ্তমান সময়ত তামিলনাডুত Kite surfingৰ কঠোৰ প্ৰশিক্ষণ চলাই আছে । কালিলৈ অৰ্থাৎ ২৫ আগষ্টৰ পৰা তামিলনাডুত অনুষ্ঠিত হ'বলগীয়া নিৰ্বাচনী পক্ৰিয়াত ভাগ ল'বৰ বাবে সাগৰৰ মাজত দৈনিক Kite Boarding ৰ কঠোৰ প্ৰশিক্ষণ গ্ৰহণ কৰিছিল নিশামণিয়ে ।