চিৰাং, ৫ এপ্ৰিল: বিপিএফ দলৰ প্ৰাক্তন কেন্দ্ৰীয় উপ-সভাপতি তথা প্ৰাক্তন মন্ত্ৰী চন্দন ব্ৰহ্মই বিগত সময়ত ইউপিপিএল দলত যোগদান কৰিব বুলি চৰ্চা হোৱা সন্দৰ্ভত তেওঁ কোনো প্ৰতিক্ৰিয়া প্ৰকাশ কৰা নাছিল । ইয়াৰ পিচতেই বিগত বৰ্ষত বড়োভূমিত বিজয়ৰ বাবে বিজেপি মিত্ৰজোঁটে নতুন অংক কৰাত তেওঁক লৈ বহুতেই চৰ্চাও কৰিছিল ৷ ইপিনে, একালৰ শক্তিশালী বিপিএফ নেতা চন্দন ব্ৰহ্মক ইউ পি পি এললৈ আদৰণি জনাব পাৰে বুলি আলোচনা হৈছিল যদিও এইবাৰ লোকসভা নিৰ্বাচনত তেওঁক কোনো এটা দলেই প্ৰাৰ্থী ৰূপে আদৰি নল'লে ৷ ইয়াৰ মাজতেই আজি চিৰাঙত সংবাদমাধ্য়মৰ আগত আগন্তুক সময়ত তেওঁ ৰাইজক ভাল খবৰ দিব বুলি কয় । ৰাইজক আগতীয়াকৈ ৰঙালী বিহু আৰু বৈশাগুৰ শুভেচ্ছা জ্ঞাপন কৰি তেওঁ কয় যে নতুন বছৰত ৰাইজে ভাল খবৰ পাব ।
প্ৰাক্তন মন্ত্ৰী চন্দন ব্ৰহ্মই অৱশ্য়ে কৌশলপূৰ্ণভাৱে সংবাদ মাধ্যমৰ আগত মন্তব্য় কৰে । তেওঁ নতুন বছৰত নতুন চিন্তাৰে ৰাইজে বিচৰা ধৰণে আগবাঢ়িব বুলি মন্তব্য কৰি কয়,"যিখিনি কথা আপোনালোকে শুনিছে,মাজে মাজে ময়ো শুনিছো । অনাগত দিনত ৰাইজে আশা কৰা ধৰণে নিশ্চয় ফল পাব । কিছুদিন পিচত মই আপোনালোকক স্পষ্টকৈ ক'ব পাৰিম ।"