মৰাণ, 13 এপ্ৰিল:সমাগত লোকসভা নিৰ্বাচন ৷ নিৰ্বাচনৰ দিন যিমানেই চমু চাপি আহিছে সিমানেই নেতা-কৰ্মীৰ দল সলোৱাৰ তৎপৰতা বৃদ্ধি হোৱা পৰিলক্ষিত হৈছে ৷ সদৃশ দৃশ্য পৰিলক্ষিত হৈছে ডিব্ৰুগড় লোকসভা সমষ্টিত ৷ নিৰ্বাচনৰ দিন চমু চপাৰ লগে লগেই সমষ্টিটোত ৰাজনৈতিক প্ৰেক্ষাপট সঘনাই সলনি হোৱা দেখিবলৈ পোৱা গৈছে । বিৰোধী শূন্য কৰি সহজ জয়লাভৰ বাবে চেষ্টা চলাইছে শাসকীয় দল বিজেপিয়ে ।
ডিব্ৰুগড়ত বিজেপিত যোগদান কৰাৰ ঢৌ উঠা দেখিবলৈ পোৱা গৈছে । লোকসভা নিৰ্বাচনলৈ কেইটামান দিন থকা সময়ত ডিব্ৰুগড় পৌৰ নিগম শুকুৰবাৰে কংগ্ৰেছ শূণ্য হৈ পৰিল । ডিব্ৰুগড় পৌৰ নিগমৰ 22 টাকৈ ৱাৰ্ডৰ একমাত্ৰ 10 নম্বৰ ৱাৰ্ডটোৱে বিগত নিৰ্বাচনত কংগ্ৰেছৰ দখলত আছিল । শুকুৰবাৰে বিজেপি মিত্ৰজোঁটৰ প্ৰাৰ্থী সৰ্বানন্দ সোণোৱালৰ উপস্থিতিত ডিব্ৰুগড় পৌৰ নিগমৰ 10 নং ৱাৰ্ডৰ কমিচনাৰ চামচুৰ নাহৰ হুছেইনে গেৰুৱা বসন পৰিধান কৰে ।