নিউজ ডেস্ক, 17 ফেব্ৰুৱাৰী :গলবস্ত্ৰই বিড়ম্বনা কঢ়িয়াই আনিলে দাদু টায়েলৈ ৷ বহু চৰ্চাৰ অন্তত শনিবাৰে অসম প্ৰদেশ কংগ্ৰেছৰ সভাপতি ভূপেন কুমাৰ বৰাই ভাৰতীয় জাতীয় কংগ্ৰেছ দলৰ পৰা তাৎক্ষণিক কাৰ্যকৰী কৰাকৈ বহিষ্কাৰ কৰে গোলাঘাট জিলা কংগ্ৰেছ কমিটিৰ সদ্য অপসাৰিত সভাপতি দাদু টায়েক ।
ইতিমধ্যে সংবাদ মাধ্যমৰ বাতৰিত প্ৰকাশ পাইছে যে 14 ফেব্ৰুৱাৰীৰ দিনা সৰুপথাৰৰ শ্যাম গাঁৱলৈ মুখ্যমন্ত্ৰী ড৹ হিমন্ত বিশ্ব শৰ্মা আহিছিল ৷ সেইদিনা গোলাঘাট জিলা কংগ্ৰেছৰ সভাপতি দাদু টায়ে মুখ্যমন্ত্ৰীগৰাকীক লগ ধৰিছিল আৰু এখন গলবস্ত্ৰৰে তেওঁক সম্ভাষণ জনাইছিল ৷
তাৰ পাচতেই দাদু টায়ে আৰু মুখ্যমন্ত্ৰী ড৹ শৰ্মাৰ ফটো ভাইৰেল হৈ পৰিছিল ৷ তেতিয়াই দাদু টায়েক প্ৰদেশ কংগ্ৰেছৰ তৰফৰ পৰা এক পত্ৰ প্ৰেৰণ কৰি তেখেতক জিলা সভাপতি পদৰ পৰা অব্যাহতি দিয়ে । ইয়াৰ পাচতে প্ৰদেশ কংগ্ৰেছৰ সাধাৰণ সম্পাদক গোলাপ শইকীয়াক তাৎক্ষণিকভাৱে কাৰ্যকৰী হোৱাকৈ গোলাঘাট ডিচিচিৰ সভাপতি হিচাপে নিযুক্তি দিয়া হয় ।
লগতে পঢ়ক :কংগ্ৰেছৰ কোন কোন নেতাই নিশা হিমন্ত বিশ্ব শৰ্মাক সাক্ষাৎ কৰিছিল ? ক’ব দাদু টায়েই