লক্ষ্ণৌ/ প্ৰয়াগৰাজ: মৌনী অমাৱস্যাৰ পবিত্ৰ স্নানৰ সময়ত বুধবাৰে পুৱতি নিশা জনবহুল সংগমত মহাকুম্ভ মেলাত সংঘটিত পদপিষ্টৰ ঘটনাত নিহত হোৱা লোকৰ সংখ্যা ৩০ জনলৈ বৃদ্ধি পাইছে ৷ বুধবাৰে সন্ধিয়া প্ৰায় ৭ বজাত কুম্ভমেলাৰ ডি আই জি বৈভৱ কৃষ্ণ আৰু মেলাৰ বিষয়া বিজয় কিৰণ আনন্দে সংবাদমেলযোগে মৃত আৰু আহতসকলৰ বিষয়ে তথ্য প্ৰদান কৰে ।
এই দুখজনক ঘটনা সংঘটিত হোৱাৰ পাছৰে পৰা প্ৰশাসনে সাহায্য আৰু উদ্ধাৰৰ কামত নিয়োজিত হৈ আছে যদিও মৃত আৰু আহতসকলৰ সন্দৰ্ভত কোনো সঠিক তথ্য দিয়া নাছিল । দুৰ্ঘটনাটোৰ প্ৰায় ২০ ঘণ্টাৰ পিছত চৰকাৰী পক্ষই স্বীকাৰ কৰে যে এই ভয়াবহতাত ৩০ জন ভক্তৰ মৃত্যু হৈছে আৰু ৬০ জন লোক আহত হৈছে ।
VIDEO | Maha Kumbh 2025: Addressing a press conference, DIG Kumbh Mela Vaibhav Krishna confirms 30 casualties in the stampede incident.
— Press Trust of India (@PTI_News) January 29, 2025
" on the mauni amavasya snan, between 1 and 2 am ahead of the brahm muhurta, huge crowd gathered on the akhara route, because of which the… pic.twitter.com/rgauSELmhJ
মেলা বিষয়া বিজয় কিৰণ আনন্দ আৰু ডি আই জি বৈভৱ কৃষ্ণই দুৰ্ঘটনাটোৰ বিষয়ে বিতং তথ্য প্ৰদান কৰি কয়, "ব্ৰহ্ম মুহুৰ্তৰ পূৰ্বে নিশা ১ বজাৰ পৰা ২ বজাৰ ভিতৰত মেলা এলেকাৰ আখৰা মাৰ্গত বিপুল জনসমাগম আছিল । ৰাইজৰ হেঁচাত সিপাৰৰ বেৰিকেডবোৰ ভাঙি যায় । ইয়াৰ পিছত মানুহে বেৰিকেড পাৰ হৈ সিপাৰলৈ আহি ব্ৰহ্ম মুহুৰ্তৰ সময়ত গা ধুবলৈ ৰৈ থকা ভক্তসকলক চেপা মাৰি ধৰে ।
ডি আই জি বৈভৱ কৃষ্ণই কয়, "মৌনি আমাৱস্যাৰ মহা কুম্ভমেলা অঞ্চলত হোৱা ভয়াবহতাত ৩০ জন লোকে প্ৰাণ হেৰুৱাইছে । এই দুৰ্ঘটনাত ৬০ জন লোক আহত হৈছে । ইয়াৰে ৩৬ গৰাকী চিকিৎসাধীন হৈ আছে । বাকী ২৪জনক তেওঁলোকৰ আত্মীয়ই লৈ যায় । এই মৰ্মান্তিক দুৰ্ঘটনাত মুঠ ৯০ জন লোক আহত হয় । যাক এম্বুলেন্সৰ সহায়ত চিকিৎসালয়লৈ লৈ যোৱা হয় ।"
ইফালে মহাকুম্ভ মেলা অঞ্চলৰ ডি আই জিৰ পৰা জানিব পৰা মতে, নিহতসকলৰ ভিতৰত ২৫ জনক চিনাক্ত কৰা হৈছে । বাকী কেইজনক চিনাক্তকৰণৰ প্ৰক্ৰিয়া অব্যাহত আছে । মৌনি আমাৱস্যা উপলক্ষে মঙলবাৰৰ মাজনিশাৰ পিছত পুৱতি নিশা ১ বজাৰ পৰা ২ বজাৰ ভিতৰত সংগম স্থানত হঠাৎ এই ভয়াবহ ঘটনাটো সংঘটিত হয় ।
ইফালে, এই ঘটনা সন্দৰ্ভত ন্যায়িক তদন্ত আৰু ক্ষতিপূৰণৰ কথা ঘোষণা কৰিছে মুখ্যমন্ত্ৰী যোগী আদিত্যনাথে । মুখ্যমন্ত্ৰী যোগী আদিত্যনাথে এক বিবৃতিত কয়, আমি ন্যায়াধীশ হৰ্ষ কুমাৰ, প্ৰাক্তন ডি জি ভি কে গুপ্তাৰ নেতৃত্বত ৩ জনীয়া ন্যায়িক আয়োগ গঠন কৰিছো । ইয়াৰ সমান্তৰালকৈ মৃতকৰ পৰিয়াললৈ ২৫ লাখ টকাৰ আৰ্থিক সাহায্য প্ৰদানৰ কথা আমি ঘোষণা কৰিছো । বৃহস্পতিবাৰে মুখ্য সচিব আৰু ডিজিপি প্ৰয়াগৰাজলৈ যাব আৰু প্ৰয়োজন হ’লে সেই সকলোবোৰ দিশ চোৱাচিতা কৰিব ।
#WATCH | On Mahakumbh stampede, Uttar Pradesh CM Yogi Adityanath says " the govt has decided that a judicial inquiry of the incident will be done. for this, we have formed a 3-member judicial commission headed by justice harsh kumar, former dg vk gupta and retired ias dk singh. we… pic.twitter.com/GlfGoOjBF3
— ANI (@ANI) January 29, 2025
বিষয়াদ্বয়ে উল্লেখ কৰা মতে, নিহত হোৱা বহু লোক বহিঃৰাজ্যৰ ৷ ইয়াৰে কৰ্ণাটকৰ ৪ জন, অসমৰ ১ জন আৰু গুজৰাটৰ ১ জনক চিনাক্ত কৰা হৈছে । আহতসকলৰ একাংশক পৰিয়ালৰ লোকে লৈ যোৱাৰ বিপৰীতে ৩৬জন আহতক স্থানীয় চিকিৎসা মহাবিদ্যালয়ত চিকিৎসাধীন হৈ আছে । ভক্তসকলৰ সুবিধাৰ্থে মেলা প্ৰশাসনে ১৯২০ হেল্পলাইন নম্বৰ জাৰি কৰিছে ।
একে সময়তে ডি আই জিয়ে কয় যে মেলা এলেকা প্ৰশাসনে ২৯ জানুৱাৰীত ভি আই পি প্ৰট’কল মানি চলা নাছিল । ভৱিষ্যতেও প্ৰধান পবিত্ৰ স্নানৰ সময়ত কোনো ভি আই পি প্ৰট’কল প্ৰযোজ্য নহ’ব ।
লগতে পঢ়ক: মহাকুম্ভ মেলাত অঘটন: পদপিষ্ট হৈ ১৭ জনৰ মৃত্যু, অমৃত স্নান বাতিল
