জি-২০ বৈঠক ব্ৰাছিলিয়া; ভাৰতৰ ডিপিআই-সক্ষম ৰাষ্ট্ৰীয় কাৰ্যসূচীৰ ওপৰত আলোকপাত

India at G20 Meeting : গ্ৰাম্য উন্নয়ন, সমাজ কল্যাণ, মহিলা সবলীকৰণ, শিক্ষা আৰু স্বাস্থ্যসেৱাকে ধৰি বিভিন্ন ক্ষেত্ৰত ডিপিআই-সক্ষম ৰাষ্ট্ৰীয় কাৰ্যসূচীৰ ভাৰতৰ সফল ব্যৱহাৰৰ কথা এই বৈছকত অৱলোকন কৰে জি-২০ বিশেষ কৰ্তব্যৰত বিষয়া অভয় ঠাকুৰে ।

ইণ্টাৰনেচনেল ডেস্ক, ১৯ মাৰ্চ : ব্ৰাজিলৰ ৰাজধানী ব্ৰাছিলিয়াত অনুষ্ঠিত হৈ আছে জি-২০ শীৰ্ষ সন্মিলন । এই অনুষ্ঠানত ভাৰতৰ জি-২০ বিশেষ কৰ্তব্যৰত বিষয়া (অ'এছডি) অভয় ঠাকুৰে ১৮-১৯ মাৰ্চত জি-২০ উন্নয়ন কাৰ্যকৰী গোটৰ বৈঠকত অংশগ্ৰহণ কৰে ।

বৈঠকত তেওঁ গ্ৰাম্য উন্নয়ন, সমাজ কল্যাণ, মহিলা সবলীকৰণ, শিক্ষা আৰু স্বাস্থ্যসেৱাকে ধৰি বিভিন্ন ক্ষেত্ৰত ডিপিআই-সক্ষম ৰাষ্ট্ৰীয় কাৰ্যসূচীৰ ভাৰতৰ সফল ব্যৱহাৰৰ কথা উল্লেখ কৰে ।

এক্সত দিয়া এটা পোষ্টত বৈদেশিক পৰিক্ৰমা মন্ত্ৰালয়ৰ চৰকাৰী মুখপাত্ৰ ৰণধীৰ জয়ছোৱালে কয়, "অ'এছডি (জি-২০) অভয় ঠাকুৰে ১৮-১৯ মাৰ্চত ব্ৰাছিলিয়াত অনুষ্ঠিত জি-২০ উন্নয়ন কাৰ্যকৰী গোটৰ বৈঠকত অংশগ্ৰহণ কৰিছে । অসমতাৰ বিৰুদ্ধে যুঁজ দিয়াৰ জি-২০ সংস্থাৰ অগ্ৰাধিকাৰক সমৰ্থন কৰি তেওঁ গ্ৰাম্য উন্নয়ন, সমাজ কল্যাণ, মহিলা, শিক্ষা আৰু স্বাস্থ্যৰ ক্ষেত্ৰত ভাৰতৰ সফল ডিপিআই-সক্ষম ৰাষ্ট্ৰীয় কাৰ্যসূচীৰ ওপৰত আলোকপাত কৰে ।"

উল্লেখ্য যে ইয়াৰ পূৰ্বে ফেব্ৰুৱাৰী মাহত কেন্দ্ৰীয় বৈদেশিক পৰিক্ৰমা আৰু সংসদীয় পৰিক্ৰমা ৰাজ্যিক মন্ত্ৰী ভি মূৰলীধৰণে ব্ৰাজিলৰ জি-২০ সভাপতিত্বৰ অধীনত আহ্বান কৰা জি-২০ বৈদেশিক মন্ত্ৰীৰ বৈঠকত (এফএমএম) অংশগ্ৰহণ কৰিছিল ।

বৈঠকখন ২১-২২ ফেব্ৰুৱাৰীত ৰিঅ' ডি জেনেৰিঅ'ত অনুষ্ঠিত হয় । বৈদেশিক মন্ত্ৰী আৰু জি-২০ সদস্য, আমন্ত্ৰণ জনোৱা দেশ আৰু আন্তঃৰাষ্ট্ৰীয় সংগঠনসমূহৰ প্ৰতিনিধি দলৰ মুৰব্বীসকলে বৈঠকত অংশগ্ৰহণ কৰে । ব্ৰাজিলৰ বৈদেশিক পৰিক্ৰমা মন্ত্ৰী মাউৰো ভিয়েৰাই বৈদেশিক মন্ত্ৰীসকলৰ বৈঠকত সভাপতিত্ব কৰে ।

বৈদেশিক পৰিক্ৰমা মন্ত্ৰালয়ৰ প্ৰেছ বিজ্ঞপ্তিত কোৱা হৈছে, "এফএমএমৰ প্ৰথম অধিবেশনৰ সময়ত 'চলিত আন্তঃৰাষ্ট্ৰীয় উত্তেজনাৰ সৈতে মোকাবিলা কৰাত জি-২০ৰ ভূমিকা' বিষয়বস্তুত ২১ ফেব্ৰুৱাৰীত ৰাজ্যিক মন্ত্ৰীয়ে ব্ৰাজিলৰ জি-২০ সভাপতিত্বৰ প্ৰতি ভাৰতৰ অটল সমৰ্থন পুনৰ নিশ্চিত কৰে ।"

"তেওঁ চাৰিখন উন্নয়নশীল দেশৰ (ইণ্ডোনেছিয়া, ভাৰত, ব্ৰাজিল আৰু দক্ষিণ আফ্ৰিকা) দ্বাৰা একেৰাহে অনুষ্ঠিত অনন্য সভাপতিত্বৰ কথা উল্লেখ কৰে আৰু যোৱা বছৰ অন্তৰ্ভুক্তিৰ পিছত আফ্ৰিকান ইউনিয়নক (এইউ) স্থায়ী জি-২০ সদস্য হিচাপে আদৰণি জনায় ।" বিজ্ঞপ্তিটোত লগতে কোৱা হৈছে ।

বৈঠকত ৰাজ্যিক মন্ত্ৰী মূৰলীধৰণে বিশ্বজনীন প্ৰত্যাহ্বান, বিশেষকৈ গ্লোবেল ছাউথক প্ৰভাৱিত কৰাৰ বাবে সামগ্ৰিক আৰু কাৰ্যমুখী দৃষ্টিভংগীৰ প্ৰয়োজনীয়তাৰ ওপৰত গুৰুত্ব আৰোপ কৰে ।

এক্সৰ এটা পোষ্টত মূৰলীধৰণে কয়, "ব্ৰাজিলৰ অধ্যক্ষতাত ৰিঅ'ত অনুষ্ঠিত আইবিএছএ বৈদেশিক মন্ত্ৰীসকলৰ বৈঠকত ভাৰতক প্ৰতিনিধিত্ব কৰি আনন্দিত হৈছোঁ । 'আইবিএছএ : দৃষ্টিভংগী আৰু প্ৰতিষ্ঠানগত বিকাশ' শীৰ্ষক প্ৰথম অধিবেশনত আইবিএছএৰ সাম্প্ৰতিক তাৎপৰ্য, ভৱিষ্যতৰ সহযোগিতাৰ সম্ভাৱ্য ক্ষেত্ৰ, আইবিএছএ পুঁজিৰ দৃষ্টান্তমূলক ভূমিকা সম্পৰ্কে মোৰ মতামত ব্যক্ত কৰো ।"

লগতে পঢ়ক :টেক্সাছক প্ৰব্ৰজন আইন কাৰ্যকৰী কৰাত বাধা আৰোপ আমেৰিকাৰ উচ্চতম ন্যায়ালয়ৰ