২০২৫ৰ পৰা উপলব্ধ হ’ব কেন্সাৰ ভেকচিন!...AIৰ সহায়ত তৈয়াৰ হ’ব এই ভেকচিন

কেন্সাৰৰ দৰে ভয়াৱহ ৰোগৰ বিৰুদ্ধে যুঁজ এতিয়া হৈ পৰিব সহজ । mRNA নামৰ ভেকচিনে ২০২৫ চনৰ পৰা ৰক্ষা কৰিব কেন্সাৰ ৰোগীৰ প্ৰাণ-

কৰ্কট ৰোগৰ দৰে ভয়াৱহ ৰোগৰ বিৰুদ্ধে যুঁজত সমগ্ৰ বিশ্বৰ বাবে এক নতুন আশাৰ ৰেঙণি কঢ়িয়াই আনিছে ৷ ৰাছিয়াই কেন্সাৰৰ নিজাকৈ mRNA ভেকচিন প্ৰস্তুত কৰিছে, যিটো ২০২৫ চনৰ আৰম্ভণিতে মুকলি কৰা হ’ব ৷ এই বৈপ্লৱিক ভেকচিন ৰোগীৰ বাবে বিনামূলীয়াকৈ উপলব্ধ কৰা হ’ব বুলি ঘোষণা কৰা হৈছে ৷ এই কথা ঘোষণা কৰিছে ৰাছিয়াৰ স্বাস্থ্য মন্ত্ৰণালয়ৰ ৰেডিঅ’লজি মেডিকেল ৰিচাৰ্চ চেণ্টাৰৰ সাধাৰণ সঞ্চালক আন্দ্ৰেই কাপ্ৰিনে ৷

ৰাছিয়াৰ সংবাদ সংস্থা TASSৰ মতে, এই ভেকচিন কেন্সাৰৰ চিকিৎসাত এক মাইলৰ খুঁটি হিচাপে প্ৰমাণিত হ’ব পাৰে ৷ গামালেয়া নেচনেল ৰিচাৰ্চ চেণ্টাৰ ফৰ এপিডেমিঅ’লজি এণ্ড মাইক্ৰ’বায়’লজীৰ সঞ্চালক আলেকজেণ্ডাৰ গিণ্টচবাৰ্গে কয় যে, এই ভেকচিনৰ প্ৰাক-ক্লিনিকেল ট্ৰায়েলৰ সময়ত টিউমাৰৰ বৃদ্ধি আৰু মেটাষ্টেছিছ (কেন্সাৰ বিস্তাৰ) প্ৰতিৰোধ কৰাত ই ফলপ্ৰসূ হোৱা দেখা গৈছিল ৷ ৰাছিয়াৰ ৰাষ্ট্ৰপতি ভ্লাদিমিৰ পুটিনেও চলিত বৰ্ষৰ আৰম্ভণিতে কৈছিল যে, আমি নতুন প্ৰজন্মৰ কৰ্কট ৰোগৰ ভেকচিন আৰু ইমিউন’মডুলেটৰী ঔষধ সৃষ্টিৰ অতি ওচৰত ৷

AIৰ সহায়ত ব্যক্তিগতকৃত ভেকচিন দ্ৰুতগতিত তৈয়াৰ কৰা হ’ব

ৰাছিয়াৰ ভেকচিন বিশেষজ্ঞ গিণ্টচবাৰ্গে কয় যে, কৃত্ৰিম বুদ্ধিমত্তাৰ (AI) সহায়ত ব্যক্তিগতকৃত কৰ্কট ৰোগৰ ভেকচিন নিৰ্মাণৰ প্ৰক্ৰিয়া ঘণ্টাৰ ভিতৰতে সম্পূৰ্ণ কৰিব পৰা যাব ৷ বৰ্তমান এই প্ৰক্ৰিয়াটো দীঘলীয়া আৰু জটিল কাৰণ ইয়াত গাণিতিক পদ্ধতি ব্যৱহাৰ কৰা হয় ৷ কিন্তু এআই আৰু নিউৰেল নেটৱৰ্ক কম্পিউটিঙৰ সহায়ত মাত্ৰ ৩০ মিনিটৰ পৰা ১ ঘণ্টাত ইয়াক সম্পূৰ্ণ কৰিব পৰা যাব ৷

কৰ্কট ৰোগৰ চিকিৎসাত ভেকচিনৰ ভূমিকা

কেন্সাৰ চিকিৎসাত ভেকচিনে ৰোগ প্ৰতিৰোধ ক্ষমতাক কৰ্কট কোষ চিনাক্ত কৰি ধ্বংস কৰাত সহায় কৰে ৷ চিকিৎসামূলক কেন্সাৰ ভেকচিনে টিউমাৰ কোষত থকা প্ৰ’টিন বা এন্টিজেনক বিশেষভাৱে লক্ষ্য কৰি লয়, যাৰ ফলত শৰীৰৰ প্ৰাকৃতিক প্ৰতিৰক্ষা ব্যৱস্থাই টিউমাৰটো নিৰ্মূল কৰিবলৈ সক্ষম হয় ৷ ইয়াৰ উপৰিও প্ৰতিৰোধমূলক ভেকচিন যেনে এইচ পি ভি ভেকচিনে ভাইৰাছ সম্পৰ্কীয় কৰ্কট ৰোগ প্ৰতিৰোধ কৰাত সহায় কৰে ৷

লগতে পঢ়ক:কেন্সাৰ ৰোগীৰ বাবে ডাঙৰ সকাহ: হ্ৰাস হ’ব কৰ্কট ৰোগৰ এই তিনিবিধ ঔষধৰ মূল্য