ভাৰতত সুৰাপান কৰা লোকৰ অভাৱ নাই ৷ সমগ্ৰ বিশ্বই কিছুদিন পূৰ্বে 2025 বৰ্ষক আদৰি লয় ৷ এনে ক্ষেত্ৰত বহুলোকেই সুৰাপান অবিহনে উদযাপন আধৰুৱা বুলি গণ্য কৰে ৷ দেশৰ GDPতো সুৰাপান কৰা লোকৰো বহু ডাঙৰ যোগদান আছে ৷ সুৰাপানে আমাৰ শৰীৰৰ কিমান ক্ষতিসাধন কৰে তাৰ বিষয়ে হয়তো নতুনকৈ কোৱাৰ কোনো প্ৰয়োজন নাই ৷ কিন্তু এই সুৰাপানে আপোনাৰ দেহত কেন্সাৰৰ দৰে মাৰাত্মক ৰোগৰ সৃষ্টি কৰিব ? আচৰিত নহ’ব এয়া আমি কোৱা কথা নহয় শেহতীয়াকৈ এগৰাকী বিশেষজ্ঞই প্ৰকাশ কৰিছে এই কথা ৷
শেহতীয়াকৈ মদ্যপানৰ সৈতে জড়িত স্বাস্থ্যজনিত বিপদ সন্দৰ্ভত এক ডাঙৰ তথ্য প্ৰকাশ কৰে আমেৰিকাৰ চাৰ্জন জেনেৰেল বিবেক হালেগেৰে মূৰ্তিয়ে । তেওঁ পৰামৰ্শ দিছে যে সুৰাৰ বটলত চিগাৰেটৰ দৰে কৰ্কট ৰোগৰ সতৰ্কবাণীও থাকিব লাগে । এই সতৰ্কবাণীয়ে বিশ্বজুৰি দ্ৰুতগতিত বৃদ্ধি পোৱা কৰ্কট ৰোগী আৰু মদ্যপানৰ মাজৰ প্ৰত্যক্ষ সম্পৰ্কক উজ্জ্বল কৰি তুলিছে ।
গৱেষকসকলে কয় যে, এলকহলত থকা ইথানল শৰীৰত প্ৰৱেশ কৰিলে এচিটালডিহাইডলৈ ৰূপান্তৰিত হয় । এইবিধ ৰাসায়নিক পদাৰ্থ যিয়ে ডি এন এৰ ক্ষতি কৰিব পাৰে আৰু কেন্সাৰক প্ৰসাৰিত কৰিব পাৰে । ইয়াৰ উপৰিও মদ্যপানে শৰীৰৰ কোষ মেৰামতিৰ ক্ষমতাও দুৰ্বল কৰি তোলে ।
মদ্যপানৰ ফলত বেছি বেয়া হোৱা কেন্সাৰৰ প্ৰকাৰ
- মুখ, ডিঙি আৰু যকৃতৰ কৰ্কট ৰোগ
- বিশেষকৈ মহিলাৰ স্তন কেন্সাৰ
- বৃহদান্ত্ৰ আৰু মলদ্বাৰৰ কৰ্কট ৰোগ
আমেৰিকান কেন্সাৰ ছ’চাইটিৰ মতে, নিয়মিতভাৱে মদ্যপান কৰা লোকৰ ক্ষেত্ৰত এই ৰোগৰ সম্ভাৱনা বহুগুণে বৃদ্ধি পায় ৷
প্ৰতিটো চুমুকৰ প্ৰভাৱ
বিশেষজ্ঞসকলে কয় যে, মদ্যপান কম পৰিমাণে হওক বা অধিক পৰিমাণে সেৱন কৰক, ই নিশ্চিতভাৱে শৰীৰত প্ৰভাৱ পেলায় । যিসকলে ‘মধ্যমীয়া মদ্যপানে’ কোনো ক্ষতি নকৰে বুলি ভাবে তেওঁলোকে জনাটো উচিত যে প্ৰতিটো চুমুকে শৰীৰৰ ডি এন এত প্ৰভাৱ পেলায় ।
ইউ এছ চাৰ্জন জেনেৰেলৰ পৰামৰ্শ
আমেৰিকাৰ স্বাস্থ্য আৰু মানৱ সেৱা বিভাগ চাৰ্জন জেনেৰেলে এই সন্দৰ্ভত কয় যে, সুৰা নিৰ্মাতা কোম্পানীক তেওঁলোকৰ সামগ্ৰীৰ ওপৰত স্পষ্ট স্বাস্থ্য সতৰ্কবাণী দিবলৈ আহ্বান জনাইছে । তেওঁ কয় যে, যদি মানুহে জানে যে মদ্যপানৰ ফলত কেন্সাৰ হ’ব পাৰে, তেন্তে তেওঁলোকে হয়তো সুৰাপানৰ পৰিমান হ্ৰাস কৰিব পাৰে ।
সজাগতাৰ প্ৰয়োজন
আনকি ভাৰতৰ দৰে দেশতো সুৰা সেৱন দ্ৰুতগতিত বৃদ্ধি পাইছে । এই পৰিস্থিতিক নিয়ন্ত্রণ কৰিবলৈ চৰকাৰ তথা স্বাস্থ্য প্রতিষ্ঠানসমূহে জনাসাধাৰণক সজাগ তথা সতৰ্ক কৰাটো প্রয়োজনীয় ৷ কেন্সাৰৰ বৃদ্ধি পোৱা সংখ্যাৰ প্ৰতি লক্ষ্য ৰাখি সুৰাৰ বটলত সতৰ্কবাণী লগোৱাটো এক ফলপ্ৰসূ পদক্ষেপ হ’ব পাৰে ।
উৎস: https://www.hhs.gov/surgeongeneral/priorities/alcohol-cancer/index.html
(সতৰ্কীকৰণ: এই প্ৰতিবেদনত আপোনাক দিয়া সকলো স্বাস্থ্য তথা জীৱনশৈলী সম্পৰ্কীয় যিকোনো তথ্য আৰু পৰামৰ্শ কেৱল আপোনাৰ সাধাৰণ তথ্যৰ বাবেহে আগবঢ়োৱা হৈছে । আমি এই তথ্য বৈজ্ঞানিক গৱেষণা, অধ্যয়ন, চিকিৎসা আৰু স্বাস্থ্য পেছাদাৰী পৰামৰ্শৰ ভিত্তিত প্ৰদান কৰিছো । আপুনি এই উপায় বা পদ্ধতি অনুসৰণ কৰাৰ আগতে এই বিষয়ে বিতংভাৱে জনাটো উচিত তথা আপোনাৰ ব্যক্তিগত চিকিৎসকৰ পৰামৰ্শ গ্ৰহণ কৰাটো উচিত ।)
লগতে পঢ়ক
