বিশ্বজুৰি বক্স অফিচত 400 কোটি টকাৰ মাৰ্ক অতিক্ৰম কৰিছে স্ত্ৰী 2 এ - Shraddha Rajkummar movie collection

Stree 2 Collection: শ্ৰদ্ধা কাপুৰ, ৰাজকুমাৰ ৰাও আৰু পংকজ ত্ৰিপাঠী অভিনীত স্ত্ৰী 2 এ বিশ্বজুৰি বক্স অফিচত উল্লেখযোগ্য সফলতা অৰ্জন কৰিছে আৰু মুঠ সংগ্ৰহত মাত্ৰ এসপ্তাহত 400 কোটি টকা অতিক্ৰম কৰিছে । চলচ্চিত্ৰখনে মুক্তিৰ মাত্ৰ 7 দিনতে ইয়াৰ 2018 ৰ স্ত্ৰীৰ তুলনাত দুগুণ উপাৰ্জন কৰিবলৈ সক্ষম হৈছে ।

চিটাৰা ডেস্ক, 22 আগষ্ট : শ্ৰদ্ধা কাপুৰ, ৰাজকুমাৰ ৰাও আৰু পংকজ ত্ৰিপাঠীৰ বহু প্ৰত্যাশিত হৰৰ কমেডী ছিকুৱেল স্ত্ৰী 2 স্বাধীনতা দিৱসত মুক্তি লাভ কৰে ৷ তাৰ পিছৰে পৰা বক্স অফিচত ধুমুহাৰ সৃষ্টি কৰি আছে ছবিখনে । অমৰ কৌশিকৰ পৰিচালিত ছবিখনে সংগ্ৰহৰ ক্ষেত্ৰত নিৰ্মাতাই কৰা আশা অতিক্ৰম কৰি 2024 চনৰ অন্যতম বৃহৎ হিট ছবি হিচাপে নিজৰ স্থান গঢ়ি তুলিছে ।

মাত্ৰ সাত দিনৰ পিচতে, স্ত্ৰী 2 এ ঘৰুৱা মুঠ সংগ্ৰহত 274.35 কোটি টকা সংগ্ৰহ কৰিছে, যি হৈছে 130 কোটি টকা উপাৰ্জন কৰা 2018 চনৰ মূল চলচ্চিত্ৰ স্ত্ৰীৰ জীৱনজোৰা উপাৰ্জনৰ দুগুণ । চলচ্চিত্ৰখনৰ শক্তিশালী প্ৰদৰ্শন বৰ্ধিত বন্ধৰ সপ্তাহান্তত অব্যাহত আছিল যদিও বুধবাৰে ইয়াৰ সংগ্ৰহ 26 শতাংশলৈ হ্ৰাস পায়, উদ্যোগ ট্ৰেকাৰ ছাকনিলকৰ মতে 19 কোটি টকা উপাৰ্জন কৰে ছবিখনে । তৎস্বত্ত্বেও, চলচ্চিত্ৰখনে কৰ্মদিনত শক্তিশালী প্ৰদৰ্শন কৰি ইয়াৰ নিৰন্তৰ সফলতা নিশ্চিত কৰিছে । বিশ্বব্যাপী, স্ত্ৰী 2 এ প্ৰায় 401 কোটি টকা উপাৰ্জন কৰিছে, যাৰ ফলত ই 2024 চনৰ দ্বিতীয় সৰ্বাধিক উপাৰ্জনকাৰী ভাৰতীয় চলচ্চিত্ৰ হিচাপে পৰিগণিত হৈছে ৷ কমেডী-ভৌতিক ছবিখনে বছৰটোৰ কেইবাখনো মুখ্য ছবি অতিক্ৰম কৰিছে, যাৰ ভিতৰত আছে ফাইটাৰ (354 কোটি টকা), হনুমান (294.18 কোটি টকা) আৰু মঞ্জুমেল বয়জ (241.56 কোটি টকা) ।

ইনষ্টাগ্ৰামত স্ত্ৰী 2ৰ নিৰ্মাতাসকলে বুধবাৰৰ পৰা বিশ্বব্যাপী সংগ্ৰহসমূহ শ্বেয়াৰ কৰিছে । "BLOCKBUSTER সফলতাৰ এটা আচৰিত সপ্তাহ ! ধন্যবাদ, দৰ্শক, আপোনাৰ মৰমৰ বাবে ।" ছবিখন প্ৰশংসা কৰি এজন ছ’চিয়েল মিডিয়া ব্যৱহাৰকাৰীয়ে লিখিছে- “ৱো স্ত্ৰী হে ৱো বক্স অফিচ পে তাবাহি ভি মাচা সক্তি হে ।” আন বহুতে এই সফলতাক জুই আৰু হৃদয়ৰ ইম’টিকনেৰে উদযাপন কৰে ।

আগন্তুক সময়ত কোনো ডাঙৰ নতুন মুক্তি নোহোৱালৈকে স্ত্ৰী 2 এ ছেপ্টেম্বৰ মাহতো বক্স অফিচত আধিপত্য বিস্তাৰ কৰিব বুলি অনুমান কৰা হৈছে । শুকুৰবাৰৰ ভিতৰত 300 কোটি টকাৰ সীমা অতিক্ৰম কৰিব বুলি আশা কৰা হৈছে আৰু শীঘ্ৰেই 400 কোটি টকাৰ ঘৰত প্ৰৱেশ কৰিব বুলি অনুমান কৰা হৈছে । চলচ্চিত্ৰখনে ইয়াৰ শক্তিশালী প্ৰদৰ্শন অব্যাহত ৰাখিছে ।

লগতে পঢ়ক :ক্ৰমান্বয়ে ধন সংগ্ৰহৰ গতি বাঢ়িছে হৰৰ-কমেডী স্ত্ৰী 2 ৰ - Stree 2 Box Office Collection