হায়দৰাবাদ : 2017 চনত প্ৰথমবাৰৰ বাবে এটি কণ্ঠই শ্ৰোতাৰ হৃদয় জুৰাইছিল ‘কি বেদনাতে’ শীৰ্ষক এটি গীতেৰে ৷ প্ৰথমবাৰৰ বাবে তেওঁৰ কণ্ঠ শুনিয়েই সেই সুৰীয়া কণ্ঠৰ প্ৰেমত পৰিছিল অসমৰ শ্ৰোতা-দৰ্শক ৷ এনে এক যাদুকৰী কণ্ঠ, যি কেৱল গানৰ বাবেই নহয়, শব্দৰ নিখুঁত উচ্চাৰণৰ বাবেও বাৰুকৈয়ে প্ৰশংসিত অনুৰাগীৰ মাজত ৷ হয় আপোনালোকে ভবাৰ দৰে আমি শংকুৰাজ কোঁৱৰৰ কথাই উল্লেখ কৰিছো ৷
শংকুৰাজ কোঁৱৰ অসমৰ এটা সম্পদ ৷ অসমৰ জনপ্ৰিয় সংগীতশিল্পীসকলৰ ভিতৰত শংকুৰাজ কোঁৱৰৰ নাম অন্যতম হিচাপে গণ্য কৰা হয় ৷ ইন্দ্ৰধনু, তোমালৈ বৰষা, অলকানন্দা, এনে লাগে, অংকিতা, কাৰ আগমন এই আটাইবোৰ শংকুৰাজৰ খুবেই জনপ্ৰিয় গান ৷ সংগীতজগতখনত খোপনি পুতিবলৈ আৰম্ভ কৰাৰে পৰা এটাৰ পিছত আন এটা শ্ৰুতিমধুৰ গীতেৰে অনুৰাগীৰ হৃদয় জিনি আহিছে কণ্ঠশিল্পীগৰাকীয়ে ৷
অসম গৌৰৱ শংকুৰাজ কোঁৱৰ এতিয়া সাজু হৈছে ৰাষ্ট্ৰীয় পৰ্যায়ৰ মঞ্চত নিজৰ যাদু দেখুৱাবলৈ ৷ অসমবাসীৰ বাবে গৌৰৱৰ বিষয় যে ক’ক ষ্টুডিঅ’ ভাৰত ছিজন 3 ৰ অংশ হ’ব শংকুৰাজ কোঁৱৰ ৷ যোৰহাটৰ পৰা ওলাই গৈ বিশ্ব প্ৰতিষ্ঠিত মঞ্চ এখনত নিজকে উপৱিষ্ট কৰিব পৰাটো নিশ্চয়কৈ এটা সপোন পূৰণৰ দৰে ৷