নিয়ন্ত্ৰণ হেৰুৱাই নদীত বাগৰিল ট্ৰেভেলাৰ : নিহত ১৪ - Road accident in Uttarakhand

Road Accident: চাৰধাম যাত্ৰাৰ বাবে উত্তৰাখণ্ডলৈ এতিয়া বৃহৎ সংখ্যক ভক্তৰ আগমন ঘটিছে, যাৰ বাবে পথত যান-বাহনৰ ব্যাপক ভিৰ হৈছে ৷ ইয়াৰ ফলত অঞ্চলটোত পথ দুৰ্ঘটনাৰ সংখ্যা বৃদ্ধি পাইছে ৷ শনিবাৰে পাহাৰীয়া জিলাখনৰ বদ্ৰীনাথ ঘাইপথত এখন যাত্ৰীবাহী ট্ৰেভেলাৰ বাহন দুৰ্ঘটনাত পতিত হোৱাত প্ৰায় ১৪ জন লোকৰ মৃত্যু হয় ৷ আহতসকলক বিমানেৰে ঋষিকেশ এইমছলৈ প্ৰেৰণ কৰা হৈছে ।

নিউজ ডেস্ক, ১৫ জুন:উত্তৰাখণ্ডৰ ৰুদ্ৰপ্ৰয়াগ জিলাৰ বদ্ৰীনাথ ঘাইপথত শনিবাৰে এখন ট্ৰেভেলাৰ বাহন নিয়ন্ত্ৰণ হেৰুৱাই অলকানন্দা নদীত বাগৰি পৰে । দুৰ্ঘটনাত ১৪ জনতকৈ অধিক লোকৰ মৃত্যু হোৱাৰ লগতে প্ৰায় ১২ জন লোক আহত হোৱাৰ তথ্য জানিব পৰা হৈছে । বদ্ৰীনাথ ঘাইপথৰ ৰেণ্টোলীৰ সমীপত সংঘটিত হয় এই দুৰ্ঘটনাটো । ট্ৰেভেলাৰখনত প্ৰায় ২৩ জন লোক আছিল বুলি জানিব পৰা হৈছে ।

স্থানীয় আৰক্ষী অধীক্ষক ড৹ বিশাখা অশোক ভদাণেই এই দুৰ্ঘটনাৰ কথা নিশ্চিত কৰিছে । দুৰ্ঘটনাৰ সম্ভেদ লাভ কৰাৰ লগে লগে ঘটনাস্থলীত স্থানীয় লোক উপস্থিত হৈ আৰক্ষীক ঘটনাৰ বিষয়ে অৱগত কৰে ৷ ইয়াৰ পাচতেই ঘটনাস্থলীত আৰক্ষীৰ লগতে জিলা দুৰ্যোগ ব্যৱস্থাপনা, ডিডিআৰএফৰ দল উপস্থিত হৈ উদ্ধাৰ অভিযান আৰম্ভ কৰে ৷ আহতসকলৰ ৭ জনক বিমানেৰে ঋষিকেশ এইমছলৈ প্ৰেৰণ কৰা হয় । আনহাতে ৰুদ্ৰপ্ৰয়াগ জিলা চিকিৎসালয়ত চিকিৎসাধীন হৈ আছে ৯ জন ।

লগতে পঢ়ক:নৈনিতালত শোকাৱহ পথ দুৰ্ঘটনা; নিহত ২ - Pickup fell into ditch in Nainital

দুৰ্ঘটনাটোৰ প্ৰথম কাৰণ চালকজনৰ টোপনি অহা বুলি জানিব পৰা হৈছে । ট্ৰেভেলাৰখনে ঘাইপথৰ কাষত নিৰ্মিত পাৰ্ফেট ভাঙি খাৱৈত বাগৰি পৰে ৷ উক্ত স্থানত সাধাৰণতে দুৰ্ঘটনা সংঘটিত হোৱাৰ সম্ভাৱনা নুই কৰিব পাৰি । আৰক্ষীয়ে আৰু প্ৰশাসনৰ লোকে ঘটনাত আহত আৰু নিহত লোকৰ পৰিচয় সন্দৰ্ভত তদন্ত অব্যাহত ৰাখিছে ৷

এই দুৰ্ঘটনাক লৈ উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়ে শোক প্ৰকাশ কৰিছে । মুখ্যমন্ত্ৰী ধামীয়ে Xত পোষ্ট কৰি স্থানীয় প্ৰশাসন আৰু এছডিআৰএফৰ দলসমূহে সাহায্য আৰু উদ্ধাৰ অভিযানৰ কাম অব্যাহত ৰখাৰ কথা জানিবলৈ দিয়ে ৷ আহতসকলক চিকিৎসাৰ বাবে ওচৰৰ চিকিৎসা কেন্দ্ৰলৈ প্ৰেৰণ কৰাৰ লগতে এই ঘটনাৰ তদন্ত কৰিবলৈ জিলা দণ্ডাধীশক নিৰ্দেশ দিয়াৰ কথাও তেওঁ সদৰী কৰে ।

তেওঁ লগতে এই অপৰিসীম দুখ-কষ্ট সহ্য কৰিব পৰাকৈ শোকসন্তপ্ত পৰিয়ালবৰ্গক শক্তি প্ৰদান কৰিবলৈ ভগৱানৰ ওচৰত প্ৰাৰ্থনা জনোৱাৰ লগতে বাবা কেদাৰনাথৰ ওচৰত আহতসকলৰ আশু আৰোগ্য লাভৰ কামনা কৰে ।"

লগতে পঢ়ক:যাত্ৰীবাহী বাছ বাগৰি 21 জনৰ মৃত্যু, 40 গৰাকী আহত - bus rolls down deep gorge

তেওঁ Xত আন এটা পোষ্ট কৰি এই দুৰ্ঘটনাত গুৰুতৰভাৱে আহতসকলক এইমছ ঋষিকেশলৈ বিমানযোগে প্ৰেৰণ কৰাৰ তথ্য সদৰী কৰে ৷ ইয়াৰ লগতে আহতসকলৰ উন্নত চিকিৎসাৰ বাবে সংশ্লিষ্ট বিষয়াক নিৰ্দেশনা দিয়াৰ কথাও তেওঁ পোষ্টটোত ব্যক্ত কৰে । তেওঁ লগতে নিহতসকলৰ পৰিয়ালৰ বাবে ২ লাখ টকা আৰু আহতক ৫০ হাজাৰ টকা ক্ষতিপূৰণ দিয়াৰ কথা ঘোষণা কৰে ৷

প্ৰধানমন্ত্ৰী নৰেন্দ্ৰ মোদীয়েও এই দুৰ্ঘটনাক লৈ Xত শোক প্ৰকাশ কৰে ৷ তেওঁ নিহতসকলৰ নিকটাত্মীয়লৈ ২ কোটি টকা আৰু আহতক ৫০ হাজাৰ টকা এককালীন সাহাৰ্য প্ৰদানৰ কথা ঘোষণা কৰে ৷

কেন্দ্ৰীয় গৃহমন্ত্ৰী অমিত শ্বাহেও এই দুৰ্ঘটনাক লৈ X ত শোক প্ৰকাশ কৰিছে ৷ তেওঁ দুৰ্ঘটনাত প্ৰাণ হেৰুওৱাসকলৰ পৰিয়ালৰ প্ৰতি সমবেদনা জ্ঞাপন কৰাৰ লগতে আহতসকলৰ আশু আৰোগ্যৰ বাবে ভগৱানৰ ওচৰত প্ৰাৰ্থনা কৰে ।

লগতে পঢ়ক:তামিলনাডুৰ চালেম জিলাত ভয়ংকৰ পথ দুৰ্ঘটনা; নৱজাতকসহ নিহত ৫ - Tragic Accident in Tamil Nadu

উল্লেখ্য যে, উত্তৰাখণ্ডত প্ৰতিদিনে পথ দুৰ্ঘটনাত মানুহৰ প্ৰাণহানি হৈছে । সম্প্ৰতি ৰাজ্যখনত চাৰধাম যাত্ৰা পূৰ্ণগতিত চলি আছে । চাৰধাম যাত্ৰাৰ বাবে পাহাৰীয়া অঞ্চলটোত বৃহৎ সংখ্যক ভক্তৰ আগমন ঘটিছে, যাৰ বাবে পথত যান-বাহনৰ ব্যাপক ভিৰ হৈছে ৷ চাৰধাম যাত্ৰাৰ বাবে পাহাৰীয়া পথেৰে পাৰ হ’ব লাগে, য’ত এটা ভুলৰ বাবে প্ৰাণ হেৰুৱাব পাৰে ।

বিগত ১২ জুনত উত্তৰকাশীৰ গংগোত্ৰী ৰাষ্ট্ৰীয় ঘাইপথত এখন যাত্ৰীবাহী বাছ খাৱৈত পৰাৰ ফলত তিনিগৰাকী মহিলা নিহত হোৱাৰ লগতে ২৪জন লোক আহত হৈছিল । বাছখন খাৱৈৰ গছত আবদ্ধ হৈ পৰে, যাৰ ফলত আন আন লোকসকলৰ কোনোমতে প্ৰাণ ৰক্ষা পৰে । ইয়াৰ পূৰ্বে ৯ জুনত নৈনিতাল জিলাৰ বেতালঘাটত নিশা এখন পিকআপ বাহন খাৱৈত বাগৰি পৰে । এই দুৰ্ঘটনাত দুজন লোকৰ মৃত্যু হোৱাৰ বিপৰীতে ১৩জন লোক আহত হয় ।

লগতে পঢ়ক:37 নং ৰাষ্ট্ৰীয় ঘাইপথত পথ দুৰ্ঘটনাত এজনৰ মৃত্যু ; ভাগি চূৰমাৰ বাহন - Accident in Dergaon