বন্দে ভাৰত স্লিপাৰ ৰে'লৰ নিৰ্মাণ প্ৰক্ৰিয়া কিয় পলম হৈছে ?

বন্দে ভাৰত স্লিপাৰ ৰে'লৰ নিৰ্মাণত পলম সন্দৰ্ভত প্ৰতিক্ৰিয়া প্ৰকাশ কৰিলে ৰে'ল মন্ত্ৰী অশ্বিনী বৈষ্ণৱে ।

নতুন দিল্লী :বন্দে ভাৰত স্লিপাৰ ৰে'লৰ নিৰ্মাণ প্ৰক্ৰিয়া পলম সন্দৰ্ভত হোৱা বিতৰ্কত অৱশেষত মুখ খুলিলে কেন্দ্ৰীয় ৰে'ল মন্ত্ৰী অশ্বিনী বৈষ্ণৱে । ৰে'ল মন্ত্ৰী অশ্বিনী বৈষ্ণৱে ডিজাইন ক্লিয়াৰেন্সৰ সমস্যাৰ বাবে বন্দে ভাৰত স্লিপাৰ ৰে'লৰ নিৰ্মাণ প্ৰক্ৰিয়া আৰম্ভ কৰাত পলম হোৱা বুলি দাবী কৰা সংবাদ মাধ্যমৰ প্ৰতিবেদন খাৰিজ কৰে ।

বৃহস্পতিবাৰে সংবাদ মাধ্যমৰ সন্মুখত বৈষ্ণৱে কয় যে এই ৰে'ল ছেটবোৰ নিৰ্মাণৰ বাবে ৰাছিয়াৰ প্ৰতিষ্ঠানটোৰ ডিজাইনৰ ক্ষেত্ৰত কেতিয়াও সমস্যা নহয় ।

• ৰে'ল মন্ত্ৰীৰ প্ৰতিক্ৰিয়া

ইয়াৰ পূৰ্বে, ৰাছিয়াৰ কোম্পানী ট্ৰেন্সমাশ্ব'ল্ডিং (টিএমএইচ)ৰ বিষয়াসকলৰ উদ্ধৃতিৰে সংবাদ মাধ্যমৰ এটা অংশই প্ৰতিবেদন দিছিল যে ভাৰতীয় ৰে'লৱেই ৰে'লখনত শৌচালয় আৰু এখন পেণ্ট্ৰী কাৰ দাবী কৰিছিল যাৰ বাবে ৰে'লৰ ডিজাইন সলনি কৰাৰ প্ৰয়োজন হৈছিল ।

প্ৰতিবেদনত কোৱা হৈছিল যে প্ৰতিষ্ঠানটোৱে ডিজাইনৰ পৰিৱৰ্তনৰ সৈতে ৰে'ল মন্ত্ৰালয়ৰ সমস্যাবোৰ সমাধান কৰিছিল আৰু ইয়াক অনুমোদনৰ বাবে মন্ত্ৰালয়লৈ প্ৰেৰণ কৰিছিল । কিন্তু মন্ত্ৰালয়ে ইয়াৰ সন্মতিৰ সৈতে সঁহাৰি দিয়া নাই । ইফালে চুক্তি অনুসৰি প্ৰতিষ্ঠানটোৱে ১,৯২০ টা স্লিপাৰ ডবা নিৰ্মাণ কৰাৰ কথা আছে ।

• ৰে'ল নিৰ্মাণত কিয় পলম হৈছে ?

অৱশ্যে, মন্ত্ৰালয়ৰ সূত্ৰই কয় যে এই প্ৰতিবেদনবোৰ ভিত্তিহীন কিয়নো প্ৰকৃত বিষয়বোৰ প্ৰতিষ্ঠানটোৰ সীমিত উৎপাদন ক্ষমতাৰ সন্দৰ্ভত আছিল ৷ কিয়নো ৰাছিয়াত ভাৰতৰ তুলনাত ৰে'লৰ ডবাৰ সংখ্যা কম ।

মন্ত্ৰীগৰাকীয়ে কয়, "প্ৰতিষ্ঠানটোৰ ৬ বা ৮ টাতকৈ অধিক ৰে'লৰ ডবা ছেট নিৰ্মাণ কৰাৰ অভিজ্ঞতা নাই । আমি তেওঁলোকক স্পষ্টকৈ কৈছিলো যে আমি তেওঁলোকক বন্দে ভাৰতৰ ডিজাইন দিম । যাৰবাবে তেওঁলোকক অধিক নিৰ্মাণকাৰী দলৰ প্ৰয়োজন ।"

তেওঁ লগতে কয়, "মই স্পষ্ট কৰিব বিচাৰো যে যেতিয়া চুক্তিখন স্বাক্ষৰিত হৈছিল, স্পষ্টকৈ কোৱা হৈছিল যে তেওঁলোকে ১৬/২০/২৪ ডবাৰে ৰে'ল ছেট নিৰ্মাণ কৰিব লাগিব ।" মন্ত্ৰীগৰাকীৰ মতে প্ৰতিষ্ঠানটোক স্পষ্টকৈ কোৱা হৈছিল যে ভাৰতৰ জনসংখ্যা অধিক সেয়েহে কিছুমান পথত ২৪ টা ডবাৰ প্ৰয়োজন আছে, আনহাতে আন পথত ১৬ টা ডবাৰ প্ৰয়োজন আছে ।

মন্ত্ৰালয়ৰ সূত্ৰই কয় যে যিহেতু কম জনসংখ্যাৰ বাবে ৰে'লত সাধাৰণতে ৬-৮ টা ডবা থাকে, প্ৰতিষ্ঠানটোৱে জানিব বিচাৰিছিল যে ভাৰতক কিয় ১৬, ২০ বা ২৪ টা ডবাৰ সৈতে এখন ৰে'ল ছেটৰ প্ৰয়োজন । সূত্ৰটোৱে কয় যে সমস্যাবোৰ সমাধান কৰা হৈছে আৰু কাম অতি সোনকালে আৰম্ভ হ'ব ।

লগতে পঢ়ক :নিম্ন আদালতত ৫০০০ৰো অধিক ন্যায়াধীশৰ পদ খালী