নেশ্যনেল ডেস্ক,২৭ এপ্ৰিল :দেশত দ্বিতীয় পৰ্যায়ৰ ভোটগ্ৰহণ ইতিমধ্যে সমাপ্ত হৈছে । নিৰ্বাচন আয়োগে ভোটদানৰ হাৰৰ তথ্য মুকলি কৰিছে । এই তথ্যই সকলোকে আচৰিত কৰি তুলিছে । কাৰণ কৰ্ণাটকৰ বেংগালুৰুত প্ৰায় ৫০ শতাংশ লোকেই ভোটদান নকৰিলে । দ্বিতীয় পৰ্যায়ত কৰ্ণাটকৰ ১৪ টা সমষ্টিত ভোটদান হৈছিল । নিৰ্বাচন আয়োগে প্ৰকাশ কৰা তথ্য অনুসৰি ভোটদানৰ হাৰ আছিল আনুমানিক ৬৯.২৩ শতাংশ । কিন্তু বেংগালুৰু চহৰৰ তিনিটা নগৰীয়া সমষ্টি ক্ৰমে বেংগালুৰু চেণ্ট্ৰেল, বেংগালুৰু উত্তৰ আৰু বেংগালুৰু দক্ষিণত ভোটাধিকাৰ সাব্যস্ত কৰা ভোটাৰৰ সংখ্যা যথেষ্ট কম আছিল ।
বেংগালুৰু চেণ্ট্ৰেলত আনুমানিক ভোটদানৰ হাৰ আছিল ৫২.৮১ শতাংশ, বেংগালুৰু উত্তৰত আছিল ৫৪.৪২ শতাংশ আৰু বেংগালুৰু দক্ষিণত ৫৩.১৫ শতাংশ । ২০১৯ চনৰ লোকসভা নিৰ্বাচনত, বেংগালুৰু চেণ্ট্ৰেলত ভোটদানৰ হাৰ আছিল ৫৪.৩২ শতাংশ, বেংগালুৰু উত্তৰত আছিল ৫৪.৭৬ শতাংশ আৰু বেংগালুৰু দক্ষিণত আছিল ৫৩.৭০ শতাংশ ।
এনে পৰিস্থিতিত নিৰ্বাচন আয়োগৰ বিষয়াসকল হতাশ হোৱা দেখা গৈছে । ভোটাৰৰ সৰ্বাধিক অংশগ্ৰহণৰ লক্ষ্যৰে নিৰ্বাচন আয়োগে জোৰদাৰ প্ৰচেষ্টা কৰাৰ পিচতো ভোটাৰৰ অংশগ্ৰহণ অতি কম আছিল । বিষয়াসকলৰ মতে ইয়াৰ কোনো ব্যাখ্যা নাই । অৱশ্যে নিৰ্বাচনী বিষয়াসকলৰ মতে প্ৰচণ্ড গৰমৰ বাবে চহৰখনৰ ভোটকেন্দ্ৰসমূহত ভোটাৰৰ উপস্থিতি সেৰেঙা হোৱাৰ অন্যতম কাৰণ বুলি ধাৰণা কৰিব পাৰি ।