নিউজ ডেস্ক, ২৬ আগষ্ট :প্ৰতি বছৰে সমগ্ৰ বিশ্বতে হিন্দু ধৰ্মাৱলম্বীসকলে অতি উলহ-মালহেৰে পালন কৰে জন্মাষ্টমী উৎসৱ বা শ্ৰীকৃষ্ণ জন্মাষ্টমী ৷ হিন্দু ধৰ্মাৱলম্বীসকলে ভগৱান শ্ৰীকৃষ্ণক ভগৱান বিষ্ণুৰ অষ্টম অৱতাৰ বুলি গণ্য কৰে । ভগৱান শ্ৰীকৃষ্ণই পৃথিৱীত জন্ম লৈ কংসক হত্যা কৰি সমাজখনক তেওঁৰ অত্যাচাৰৰ পৰা মুক্ত কৰিছিল । যাৰ বাবে এই উৎসৱটিক শ্ৰীকৃষ্ণৰ জন্ম বাৰ্ষিকী হিচাপে পালন কৰা হয় ।
পঞ্জিকা অনুসৰি হিন্দু মাহৰ ভদ্ৰপদ অৰ্থাৎ অসমীয়া ভাদ মাহৰ কৃষ্ণ পক্ষৰ অষ্টমী তিথি (অষ্টম দিন)ত পালন কৰা হয় । গ্ৰেগৰিয়ান (ইংৰাজী কেলেণ্ডাৰ) অনুসৰি এইবাৰ ২০২৪ চনৰ ২৬ আগষ্ট সোমবাৰে কৃষ্ণ জন্মাষ্টমী পালন কৰা হ’ব । এই উৎসৱ উপলক্ষে বহু ভক্তই উপবাসে থাকি কৃষ্ণ বন্দনা কৰে ।
মাজ নিশা ভগৱান শ্ৰীকৃষ্ণৰ জন্মৰ পিছত পূজা-অৰ্চনা কৰাৰ শেষত উপবাস ভংগ কৰে ভক্তসকলে ৷ ইফালে কৃষ্ণ জন্মাষ্টমী উপলক্ষে উক্ত দিনা বেছিভাগ ৰাজ্যতে স্থানীয় বা ৰাজ্যিক বন্ধৰ দিন বুলি ঘোষণা কৰে ৷
লগতে পঢ়ক :জন্মাষ্টমীৰ দিনা কৰক এই উপায়, দূৰ আপোনাৰ জীৱনৰ এইসমূহ সমস্যা - Astro Tips
জন্মাষ্টমী উপলক্ষে ৰাজহুৱা কৃষ্ণ মন্দিৰৰ বাহিৰেও অধিকাংশ মানুহে ব্যক্তিগতভাৱে নিজৰ ঘৰতে ভগৱান শ্ৰীকৃষ্ণৰ বন্দনা কৰে ৷ ভগৱানক ভোগ হিচাবে তেওঁৰ প্ৰিয় খাদ্য সামগ্ৰী যেনে মাখন, মিশ্ৰিৰ মিঠাই, শুকান ফল, লাড়ু আদি আগবঢ়োৱা হয় ৷ লগতে ভক্তসকলৰ মাজতো এই প্ৰসাদ বিতৰণ কৰা হয় । এইবোৰৰ উপৰিও ভক্তসকলে মন্দিৰত ভগৱানৰ আটাইতকৈ প্ৰিয় খাদ্য সামগ্ৰী, বস্ত্ৰ, গহনা আদিও আগবঢ়োৱা দেখা যায় ।
- জন্মাষ্টমীৰ দিনা মাটিৰ টেকেলি ভঙাৰ প্ৰতিযোগিতাৰ আয়োজন কৰা হয় :
জন্মাষ্টমী উপলক্ষে দেশ-বিদেশ সকলোতে বৃহৎ পৰিসৰত টেকেলি ভঙা প্ৰতিযোগিতাৰ আয়োজন কৰা হয় । বহু ঠাইত ৰাধা-কৃষ্ণ সম্পৰ্কীয় প্ৰতিযোগিতাৰো আয়োজন কৰা হয় । ইয়াৰ উপৰিও বহুত পিতৃ-মাতৃয়ে নিজৰ সন্তানক আজিৰ দিনটোত ৰাধা-কৃষ্ণৰ ৰূপত সজাই-পৰাই তোলে ।
- ভগৱান শ্ৰীকৃষ্ণই মামা কংসক বধ কৰিছিল :
পৌৰাণিক হিন্দু ধৰ্মীয় মান্যতা অনুসৰি, ৰজা কংসৰ ভনীয়েক আছিল দৈৱকী । কংসই দৈবকীত বৰ মৰমো কৰিছিল ৷ যেতিয়া বিয়াৰ উপযুক্ত হৈছিল, তেতিয়া কংসই দৈৱকীক বাসুদেৱৰ সৈত বিয়া পাতি দিছিল । দৈৱকীৰ বিয়াৰ দিনা আটাইতকৈ বেছি সুখী হোৱা লোকজনেই আছিল কংস ৷
যেতিয়া দৈৱকীৰ বিদায়ৰ সময় আহিল, তেতিয়াই এক আকাশবাণী শুনা গ’ল ৷ সেই আকাশবাণীত কোৱা হৈছিল যে - দৈৱকী-বাসুদেৱৰ অষ্টম পুত্ৰ হ’ব কংসৰ মৃত্যুৰ কাৰণ । এই আকাশবাণী শুনাৰ পিছত কংসই নৱবিবাহিত দম্পতিটোক বন্দী কৰি ৰাখে ।
তাৰ পাচত কাৰাগাৰতে ক্ৰমান্বয়ে দৈৱকী-বাসুদেৱৰ সাতটা সন্তানক হত্যা কৰে কংসই ৷ অৱশেষত কাৰ্তিক শুক্ল পক্ষৰ দশম দিনা কংসক দৈৱকী-বাসুদেৱৰ অষ্টম পুত্ৰই হত্যা কৰিব বুলি হোৱা আকাশবাণী সত্য বুলি প্ৰমাণিত হয় ৷ দেৱকী-বাসুদেৱৰ অষ্টম পুত্ৰ ভগৱান শ্ৰীকৃষ্ণই বধ কৰিলে মোমায়েক কংসক ।
লগতে পঢ়ক :জন্মাষ্টমীত শ্ৰীকৃষ্ণৰ আৰাধনা কৰাৰ সময়ত পৰিধান কৰক এই ৰঙৰ বস্ত্ৰ: জানি লওক মহত্ব - Janmashtami 2024
- ভাৰতৰ ১০ টা প্ৰধান স্থান, য'ত ভাৰতৰ বিভিন্ন ৰাজ্যৰ লগতে বহু বিদেশী পৰ্যটক ভক্তৰ সমাগম হয় -
- উত্তৰ প্ৰদেশৰ মথুৰা
- বৃন্দাবন (উত্তৰ প্ৰদেশ)
- গোকুল (উত্তৰ প্ৰদেশ)
- পুনে (মহাৰাষ্ট্ৰ)
- নাথদ্বাৰা (ৰাজস্থান)
- দ্বাৰকা (গুজৰাট)
- উডুপি (কৰ্ণাটক),
- কুম্বকৌণম (তামিলনাডু)
- গুৰুভায়ূৰ (কেৰালা)
- পুৰী (ওড়িশ্যা)
লগতে পঢ়ক :বেংগালুৰুৰ নামঘৰত কৃষ্ণৰ জন্মাষ্টমী পালন প্ৰৱাসী অসমীয়াৰ - Krishna Janmashtami 2024
