নেশ্যনেল ডেস্ক, ১৪ আগষ্ট: জম্মু-কাশ্মীৰৰ ডোডা জিলাত বুধবাৰে সন্ত্ৰাসবাদীৰ সৈতে হোৱা মুখামুখিৰ সময়ত ভাৰতীয় সেনাৰ ৪৮ ৰাষ্ট্ৰীয় ৰাইফলছৰ এজন কেপ্তেইন শ্বহীদ হয় বুলি প্ৰতিৰক্ষা বিষয়াৰ উদ্ধৃতি দি এ এন আয়ে প্ৰকাশ কৰিছে । জম্মু-কাশ্মীৰৰ ডোডা জিলাৰ শিৱগড় ধৰ অঞ্চলত সন্ত্ৰাসবাদী আৰু নিৰাপত্তাৰক্ষীৰ মাজত সংঘৰ্ষ হয় । অভিযানৰ সময়ত তালাচী দলৰ নেতৃত্ব দি থকা সময়তে আহত হয় নিহত জোৱানজন । তেওঁক লগে লগে সামৰিক চিকিৎসালয়লৈ স্থানান্তৰিত কৰা হয় আৰু তাতেই তেওঁ শেষ নিশ্বাস ত্যাগ কৰে ।
সেনাবাহিনীৰ হোৱাইট নাইট কৰ্পে নিজৰ অফিচিয়েল এক্স হেণ্ডেলত এটা পোষ্ট কৰি কয়, "জিলাখনত চলি থকা অভিযানৰ সময়ত আহত হৈ ৪৮ ৰাষ্ট্ৰীয় ৰাইফলছৰ কেপ্তেইন দীপক সিঙে মৃত্যুবৰণ কৰে । হোৱাইট নাইট কৰ্পছৰ সকলো ৰেংকৰ বিষয়াই আহত হৈ শ্বহীদ হোৱা ব্ৰেভহাৰ্ট কেপ্তেইন দীপক সিঙৰ পৰম ত্যাগক প্ৰণাম জনাইছে । হোৱাইট নাইট কৰ্পে গভীৰ শোক প্ৰকাশ কৰিছে আৰু এই শোকৰ সময়ত শোকসন্তপ্ত পৰিয়ালটোৰ সৈতে দৃঢ়তাৰে থিয় দিছে ।"
ইফালে সংঘৰ্ষৰ সময়ত সন্ত্ৰাসবাদীকেইটাই অস্ত্ৰ-শস্ত্ৰ আৰু বেগ এৰি সেই স্থানৰ পৰা পলায়ন কৰে । এই এনকাউণ্টাৰ আৰম্ভ হোৱাৰ পিছতে ভাৰতীয় সেনা আৰু জম্মু-কাশ্মীৰ আৰক্ষীয়ে সমগ্ৰ অঞ্চলটো ঘেৰাও কৰি তালাচী অভিযান আৰম্ভ কৰে । সন্ত্ৰাসবাদীয়ে এৰি থৈ যোৱা অস্ত্ৰ-শস্ত্ৰ আৰু কাপোৰ সেই স্থানৰ পৰা উদ্ধাৰ হৈছে । সেনা-আৰক্ষীৰ পৰা লাভ কৰা তথ্য অনুসৰি এনকাউণ্টাৰ ছাইটৰ পৰা আমেৰিকাত নিৰ্মিত এটা এম ৪ কাৰ্বাইন আৰু তিনিটা বেগ উদ্ধাৰ কৰা হৈছে ।
পি টি আইৰ বাতৰি অনুসৰি, সেই স্থানৰ পৰা তেজেৰে ৰাঙলী চাৰিটা বেগ উদ্ধাৰ হোৱাৰ ফলত বিষয়াসকলে বিশ্বাস কৰে যে চাৰিজন সন্ত্ৰাসবাদী নিহত হৈছে । ঘন অৰণ্যৰ মাজত বৰ্তমানো নিৰাপত্তাৰক্ষীৰ কৰ্ডন এণ্ড চাৰ্চ (CASO) অভিযান অব্যাহত আছে । মঙলবাৰে গভীৰ নিশা নিৰাপত্তাৰক্ষীৰ যুটীয়া দলটোৱে চোৰাংচোৱাৰ তথ্য লাভ কৰিছিল । এই তথ্যৰ ভিত্তিত নিৰাপত্তা বাহিনী আগবাঢ়ি গৈ থকাৰ সময়তে লুকাই থকা সন্ত্ৰাসবাদীয়ে নিৰাপত্তাৰক্ষীৰ ওপৰত গুলীচালনা কৰাৰ লগে লগে এনকাউণ্টাৰ আৰম্ভ হয় ।
জম্মুস্থিত সেনাবাহিনীৰ হোৱাইট নাইট কৰ্পছৰ এগৰাকী মুখপাত্ৰই কয়, "সন্ত্ৰাসবাদীৰে যোগাযোগ স্থাপন কৰা হৈছে আৰু তেওঁলোকক নিষ্ক্ৰিয় কৰাৰ বাবে অভিযান চলি আছে । তেওঁ লগতে কয়, নিৰ্দিষ্ট চোৰাংচোৱাৰ তথ্যৰ ভিত্তিত পাটনিটোপৰ সমীপৰ আকাৰ বনাঞ্চলত সেনা আৰু জম্মু-কাশ্মীৰ আৰক্ষীৰ যৌথ অভিযান আৰম্ভ কৰা হয় ৷"