নিউজ ডেস্ক, 9 আগষ্ট: দিল্লী সুৰা কেলেংকাৰীৰ সৈতে জড়িত ধন সৰবৰাহৰ (ই ডি) আৰু দুৰ্নীতিৰ (চি বি আই) গোচৰত উচ্চতম ন্যায়ালয়ৰ পৰা জামিন লাভ কৰি শুকুৰবাৰে সন্ধিয়া ৬.৫০ বজাত জেলৰ পৰা ওলাই আহে দিল্লীৰ প্ৰাক্তন উপ-মুখ্যমন্ত্ৰী মনীষ ছিছ’দিয়া । ১৭ মাহ অৰ্থাৎ প্ৰায় ৫৩০ দিনৰ পিচত শুকুৰবাৰে সন্ধিয়া তিহাৰ জেলৰ পৰা মুকলি কৰি দিয়া হয় আপৰ নেতাগৰাকীক ।
মুক্তিৰ পূৰ্বে জেলৰ বাহিৰত নিৰাপত্তা বৃদ্ধি কৰা হয় । পুৱা জামিন লাভ কৰাৰ পিছতে উচচতম ন্যায়ালয়ৰ নিৰ্দেশৰ প্ৰতিলিপি বিচাৰ আদালতৰ সন্মুখত দাখিল কৰে অধিবক্তাসকলে । তাতেই জামিন বণ্ড পূৰণ কৰি বিয়লি বিচাৰ আদালতে মুক্তিৰ আদেশ জাৰি কৰে ৷
জানিব পৰা মতে, জেলৰ পৰা মুক্তি পোৱাৰ পিছত ছিছ’দিয়া প্ৰথমে চিভিল লাইনত অৱস্থিত মুখ্যমন্ত্ৰীৰ বাসগৃহলৈ যায় । তাতেই মুখ্যমন্ত্ৰী অৰবিন্দ কেজৰিৱালৰ পৰিয়ালক লগ পোৱাৰ পিছত তেওঁ যায় ১৭ নং মথুৰা ৰোডত অৱস্থিত মন্ত্ৰী আতিশীৰ বাসগৃহলৈ ।
নীলা আৰু হালধীয়া বেলুনেৰে সজাই তোলা হৈছে বাসগৃহটো । কাইলৈ অৰ্থাৎ শনিবাৰে তেওঁ দলৰ নেতাৰ সৈতে ৰাজঘাটলৈ যাব, তাৰ পিছত মন্দিৰলৈ গৈ পূজা কৰিব । ইয়াৰ পিছত সাক্ষাৎ কৰিব আপৰ নেতাসকলক ।
"জামিন মঞ্জুৰ কৰাৰ সময়ত উচ্চতম ন্যায়ালয়ে স্পষ্টকৈ কৈছিল যে আপুনি জনসাধাৰণৰ সৈতে সাপ আৰু জখলা খেলিব নোৱাৰে । একনায়কত্ববাদৰ ম্যাদ উকলি যোৱাৰ সময় আছে । উচ্চতম ন্যায়ালয়ৰ এই সিদ্ধান্ত একনায়কত্ববাদৰ বাবে মোক্ষম আঘাত । মনীষ ছিছ'দিয়া জামিনৰ পিচত মুখ্যমন্ত্ৰী অৰবিন্দ কেজৰিৱালৰ ঘৰলৈ যাব ৷ কাইলৈ ৰাজঘাটলৈ যাব আৰু তাৰ পিছত দলৰ নেতা-কৰ্মীক সাক্ষাৎ কৰিব ।" -সন্দীপ পাঠক, সাংসদ আৰু সাধাৰণ সম্পাদক, আপ ৷