নিউজ ডেস্ক, ২০ এপ্ৰিল: লোকসভা নিৰ্বাচন ২০২৪ৰ প্ৰথম পৰ্যায়ৰ ভোটগ্ৰহণত পূব নাগালেণ্ডৰ ছখন জিলাত ভোটদানৰ হাৰ শূন্য হোৱাৰ এদিন পিচতে শনিবাৰে পূব নাগালেণ্ড পিপলছ অৰ্গেনাইজেশ্যনে ৰাজ্যখনৰ এই জিলাকেইখনত জাৰি কৰা অনিৰ্দিষ্টকালীন সম্পূৰ্ণ বন্ধ কাৰ্যসূচী প্ৰত্যাহাৰ কৰে । সংস্থাটোৱে এক বিবৃতিত শনিবাৰৰ পৰা তাৎক্ষণিকভাৱে কাৰ্যকৰী হোৱাকৈ জিলাসমূহত সম্পূৰ্ণ বন্ধ প্ৰত্যাহাৰ কৰা বুলি স্পষ্ট কৰি দিয়াৰ লগতে বন্ধৰ সময়ছোৱাত সৃষ্টি হোৱা অসুবিধাৰ বাবেও দুখ প্ৰকাশ কৰে ।
বিবৃতিটোত কোৱা হৈছে যে, "২০২৪ চনৰ ১৮ এপ্ৰিলৰ সন্ধিয়া ৬ বজাৰ পৰা কাৰ্যকৰী হোৱা পূব নাগালেণ্ডৰ ৰাজহুৱা জৰুৰীকালীন নিয়ন্ত্ৰণ কক্ষ, টুয়েনছাং মুখ্য কাৰ্যালয়ে জাৰি কৰা অনিৰ্দিষ্টকালীন সম্পূৰ্ণ বন্ধ ইয়াৰ দ্বাৰা তাৎক্ষণিকভাৱে কাৰ্যকৰী হোৱাকৈ প্ৰত্যাহাৰ কৰা হৈছে । আমি সকলো অসুবিধাৰ বাবে দুখ প্ৰকাশ কৰিছো ।"
শুকুৰবাৰে ছখন জিলা কিফিৰে, লংলেং, ম'ন, নোক্লক, শ্বামাটৰ আৰু টুয়েনছাঙৰ ৭৩৮ টা ভোটকেন্দ্ৰৰ নিৰ্বাচনী বিষয়াসকলে ৯ ঘণ্টাৰো অধিক সময় অপেক্ষা কৰিছিল যদিও অঞ্চলটোৰ প্ৰায় ৪ লাখ ভোটাৰৰ কোনো এজনো ভোটদানৰ বাবে নাহিল । কাৰণ এনপিঅ’ই পৃথক ‘ফ্ৰণ্টিয়াৰ নাগালেণ্ড টেৰিটৰী’ৰ দাবীৰে নিৰ্বাচনী প্ৰক্ৰিয়াৰ পৰা বিৰত থাকিবলৈ আহ্বান জনাইছিল ।
শুকুৰবাৰে কটকটীয়া নিৰাপত্তাৰ মাজেৰে বাকী কেইখন জিলাত ৰাজ্যখনৰ একমাত্ৰ লোকসভা আসনৰ বাবে প্ৰায় ৫৭ শতাংশ ভোটদান সম্পন্ন হয় । ছয় জিলাৰ সাত জনগোষ্ঠীৰ শীৰ্ষ সংস্থা এনপিঅ’ই দিয়া ‘ভোটদানৰ পৰা বিৰত থাকক’ আহ্বানৰ প্ৰতি সঁহাৰি জনাই পূব নাগালেণ্ড অঞ্চলক প্ৰতিনিধিত্ব কৰা ২০ জন বিধায়কেও নিজৰ ভোটাধিকাৰ সাব্যস্ত নকৰিলে ।
এন পি অ’লৈ কাৰণ দেখুৱাই দিয়া জাননীত নাগালেণ্ডৰ মুখ্য নিৰ্বাচনী বিষয়া আৰ ব্যাসনে জনজাতীয় সংস্থাটোৱে দিয়া ‘বন্ধৰ’ আহ্বানৰ বাবে ভাৰতীয় দণ্ডবিধিৰ অধীনত বিহিত ব্যৱস্থা গ্ৰহণ কৰাৰ ইংগিত দিছে । ইএনপিঅ’ই কয় যে বন্ধ ঘোষণা কৰা তেওঁলোকৰ ৰাজহুৱা জাননীখন অসামাজিক উপাদানৰ সম্ভাৱ্য অশান্তি দূৰ কৰাৰ বাবে ।
ৰাজ্যখনৰ একমাত্ৰ লোকসভা আসনৰ বাবে ভোটগ্ৰহণ আৰম্ভ হোৱাৰ ১২ ঘণ্টাৰো অধিক সময় পূৰ্বে সন্ধিয়া ৬ বজাৰ পৰা (১৮ এপ্ৰিল) ছয়খন জিলাত অনিৰ্দিষ্টকাললৈ বন্ধ ঘোষণা কৰিছিল এনপিঅ’ই । কেন্দ্ৰই সীমান্ত নাগালেণ্ড টেৰিটৰী সৃষ্টি কৰাত ব্যৰ্থ হোৱাৰ প্ৰতিবাদত জিলাসমূহত বসবাস কৰা সাতটা প্ৰধান জনজাতিৰ শীৰ্ষ সংস্থা আৰু অন্যান্য বেচৰকাৰী সংস্থাসমূহে নিৰ্বাচন বৰ্জন কৰাৰ সিদ্ধান্ত লোৱাৰ পিছতে এই ঘোষণা কৰা হয় ।
লগতে পঢ়ক:মনীষ ছিছোদিয়াৰ অন্তৰ্ৱৰ্তীকালীন জামিন আবেদনৰ ৰায় সংৰক্ষণ আদালতৰ - Delhi Liquor Policy Case
