চামৰাজনগৰ : হাতীৰ সৈতে ফটো উঠাৰ চখ । ফটোও উঠিলে । কিন্তু ভবা নাছিল যে এই ফটোৰ বাবে ভৰিব লাগিব মূল্য । তেনে এক ঘটনাই সংঘটিত হৈছে এজন ব্যক্তিৰ সৈতে । ঘটনাটো সংঘটিত হৈছে কৰ্ণাটকত ।
খাদ্যৰ সন্ধানত ৰাজপথলৈ ওলাই অহা বনৰীয়া হাতীক আমনি কৰাৰ বাবে বন বিভাগে এজন লোকক ২৫,০০০ টকাৰ জৰিমনা বিহিছে । ইয়াৰ উপৰি ভৱিষ্যতে যাতে বন্যপ্ৰাণীক কোনো ধৰণৰ হাৰাশাস্তি নকৰে তাৰ বাবে এখন প্ৰতিশ্ৰুতি-পত্ৰও লিখি দিবলগা হৈছে ।
গুণ্ডলুপেটৰ শ্বাহুল হামিদ নামৰ লোকজনে বন্যহস্তীক হাৰাশাস্তি কৰা অভিযোগত ২৫,০০০ টকাৰ জৰিমনা ভৰিবলগা হৈছে । খাদ্যৰ সন্ধানত ৰাজপথলৈ ওলাই অহা বনৰীয়া হাতীৰ সন্মুখত এজন ব্যক্তিয়ে ফটোৰ বাবে প'জ দি থকা এটা ভিডিঅ' ছচিয়েল মিডিয়াত ভাইৰেল হৈ পৰে ।
বান্দিপুৰৰ এটা ৰাস্তাৰ সন্মুখত এটা বনৰীয়া হাতীয়ে চিঞৰি থকাৰ এটা ভিডিঅ' কেমেৰাত বন্দী কৰা হৈছিল । উক্ত স্থানেৰে গুণ্ডলুপেট-উটি ঘাইপথটো পাৰ হৈ গৈছে । তাতে এজন যুৱকে বনৰীয়া হাতীটো ৰাস্তাত প্ৰত্যক্ষ কৰি এখন ফটো তোলে আৰু হাতীটোক জোকায় । আনহাতে, বনৰীয়া হাতীৰ সন্মুখত নিজে বন্যোল্লাস কৰা যুৱকজনক গ্ৰেপ্তাৰ কৰিব লাগে বুলিও পৰিৱেশ কৰ্মী জোচেফ হুভাৰে দাবী কৰে ।
এই ভিডিঅ'টো ছ'চিয়েল মিডিয়াত ভাইৰেল হোৱাৰ পিছতে বান্দিপুৰ বন বিভাগ সতৰ্ক হৈ পৰে আৰু বন বিভাগে লোকজনক ২৫,০০০ টকাৰ জৰিমনা বিহে ।
"বান্দিপুৰ ৰাষ্ট্ৰীয় উদ্যানৰ পৰা উটিলৈ উভতি অহাৰ সময়ত মই এটা হাতীৰ সন্মুখত ফটো আৰু ভিডিঅ' ক্লিক কৰিছিলোঁ । ইয়াৰ বাবে মই ২৫,০০০ টকাৰ জৰিমনা পৰিশোধ কৰিছোঁ । এই ৰাষ্ট্ৰীয় উদ্যানখনৰ পৰিৱেশত প্লাষ্টিকৰ সামগ্ৰী দলিওৱা, বাহন পাৰ্কিং কৰা আৰু ভিডিঅ' আৰু ফটো তোলাটো ভুল । সেয়েহে কোনেও এনে ভুল কৰিব নালাগে ।" জৰিমনা ভৰি উঠি শ্বাহুল হামিদে ৰাইজৰ ওচৰত আবেদন জনায়ে ।
