ডিব্ৰুগড় : গণশিল্পী ৰাজীৱ শদিয়াৰ আকস্মিক মৃত্যুৱে ৰাজ্যবাসীক আজিও আৱেগিক কৰি ৰাখিছে । দেওবাৰে শদিয়াৰ টুপচিঙা গাঁৱত অনুষ্ঠিত আদ্যশ্ৰাদ্ধত লাখৰো অধিক লোকে প্ৰিয় শিল্পীগৰাকীক শ্ৰদ্ধা জনোৱাৰ লগতে পৰিয়ালৰ প্ৰতি সমবেদনা জ্ঞাপন কৰে ।
শিল্পী লোহিত গগৈ অসুস্থ
তাৰ মাজতে আন এক খবৰেই অসমৰ সাংস্কৃতিক ক্ষেত্ৰত উদ্বেগ সৃষ্টি কৰিছে । জাতি আৰু মানুহৰ গীত গাই ভালপোৱা জনতাৰ শিল্পী লোহিত গগৈ শাৰীৰিকভাৱে অসুস্থ । ডিব্ৰুগড়ৰ আস্থা নাৰ্চিংহোমত চিকিৎসাধীন হৈ আছে শিল্পীগৰাকী । পৰিয়ালৰ পৰা জানিব পৰা মতে মধুমেহ, ৰক্তচাপজনিত সমস্যাৰ লগতে শাৰীৰিকভাৱে দুৰ্বল হৈ পৰাত শিল্পীগৰাকীক ডিব্ৰুগড়ৰ ব্যক্তিগত নাৰ্চিংহোমত ভৰ্তি কৰোৱা হয় । স্বাস্থ্য পৰীক্ষাৰ সম্পূৰ্ণ ফলাফল আহিলে শিল্পীগৰাকীৰ স্বাস্থ্য দুৰ্বল হোৱাৰ প্ৰকৃত কাৰণ জানিব পৰা যাব বুলি পৰিয়ালে জানিবলৈ দিছে ।
উল্লেখ্য যে, মাঘ বিহুৰ উৰুকাৰ দিনা গণশিল্পী ৰাজীৱ শদিয়াৰ আকস্মিক মৃত্যুৰ পাছৰে পৰা লোহিত গগৈ ৰাজীৱ শদিয়াৰ পৰিয়ালৰ কাষত সাহস হৈ ঠিয় দি সকলো কাম কাজ আগুৱাই লৈ গৈছিল । ৰাজীৱ শদিয়াৰ ৰাজহুৱা আদ্যশ্ৰাদ্ধৰ বাবে ব্যস্ত থকাৰ বাবে নিজৰ স্বাস্থ্যৰ যত্ন নোলোৱাত শিল্পীগৰাকী অসুস্থ হোৱা বুলি অনুমান কৰা হৈছে । আনহাতে শিল্পীগৰাকী অসুস্থতাৰ খবৰ ৰাজহুৱা হোৱাৰ পাছতে ডিব্ৰুগড়ৰ নাৰ্চিংহোমখনত বিভিন্ন দল-সংগঠনৰ নেতা-কৰ্মীৰ লগতে একাংশ শুভাকাংক্ষীয়ে ভিৰ কৰিছে । শিল্পীগৰাকীৰ আৰোগ্য কাম কৰিছে ৰাজ্যবাসীয়ে ।
স্বাস্থ্যৰ বুজ ল'লে লুৰীণজ্যোতি গগৈয়ে
সোমবাৰে সন্ধিয়া হাস্পতালখনত উপস্থিত হৈ শিল্পীগৰাকীৰ স্বাস্থ্যৰ বুজ ল'লে অসম জাতীয় পৰিষদৰ সভাপতি লুৰীণজ্যোতি গগৈয়ে । শিল্পীগৰাকীৰ স্বাস্থ্যৰ বুজ লৈ লুৰীণজ্যোতি গগৈয়ে কয়,"জনতাৰ শিল্পী লোহিত গগৈ কালিৰে পৰা অসুস্থ হৈ আছে । দেওবাৰে ৰাজীৱ শদিয়াৰ আদ্যশ্ৰাদ্ধলৈ যাবলৈ সাজু হওঁতেই হঠাৎ অসুস্থ হৈ পৰে । অসুস্থ হৈ পৰাত স্থানীয় চিকিৎসালয়ত চিকিৎসা কৰা হৈছিল যদিও আজি নাৰ্চিংহোমত ভৰ্তি কৰা হৈছে । চিন্তাৰ কাৰণ নাই, সকলো পৰীক্ষা কৰা হৈছে । আমি আশা কৰিছো খুব সোনকালে তেওঁ সুস্থ হৈ ৰাইজৰ বাবে পুনৰ গান গাব ।"
লগতে পঢ়ক :কৃষ্ণগুৰু সেৱাশ্ৰমত ভক্তিৰসত বুৰ গ'ল মুখ্যমন্ত্ৰী - CM AT KRISHNAGURU SEWASRAM
