নতুন দিল্লী :বৃহস্পতিবাৰে দিল্লী বিধানসভাৰ অধ্যক্ষ ৰাম নিৱাস গোৱেলে নিৰ্বাচনী ৰাজনীতিৰ পৰা অৱসৰ লোৱাৰ কথা ঘোষণা কৰে ৷ এই ঘোষণাৰ পাছতে ৰাজনৈতিক জগতত এক আলোড়নৰ সৃষ্টি হোৱা দেখা গৈছে ।
ইতিমধ্যে ৰাম নিৱাস গোৱেলে আম আদমী পাৰ্টীৰ মুৰব্বী অৰবিন্দ কেজৰিৱাললৈ এক পত্ৰৰ জৰিয়তে এই কথা সদৰী কৰে । পত্ৰখনত বয়স বৃদ্ধিয়েই তেওঁ অৱসৰৰ কাৰণ হিচাপে দৰ্শাইছে ৷ লগতে গোৱেলে ৰাজনৈতিক যাত্ৰাত লাভ কৰা সমৰ্থনৰ বাবেও পত্ৰখনৰ জৰিয়তে তেওঁৰ কৃতজ্ঞতা প্ৰকাশ কৰে ।
মুৰব্বী অৰবিন্দ কেজৰিৱাললৈ চিঠি (ETV Bharat)
পত্ৰখনত গোৱেলে লিখিছে :
"মই আপোনালোকক বিনম্ৰভাৱে জনাব বিচাৰিছো যে যোৱা ১০ বছৰ ধৰি মই বিধায়ক তথা বিধানসভাৰ অধ্যক্ষ হিচাপে নিজৰ দায়িত্ব দক্ষতাৰে পালন কৰিছো । আপোনালোকে মোক সদায় অতিশয় সন্মান দিছে, যাৰ বাবে মই সদায় কৃতজ্ঞ । মই আপোনাৰ ওচৰত সদায় চিৰকৃতজ্ঞ হৈ ৰ'ম ।’’
গোৱেলৰ অৱসৰ লোৱা সিদ্ধান্ত কেৱল তেওঁৰ ব্যক্তিগত জীৱনৰ বাবে এক নতুন দিশ নহয়, আম আদমী পাৰ্টীৰ বাবেও ই এক টাৰ্নিং পইণ্ট । ভৱিষ্যতে তেওঁৰ অভিজ্ঞতা আৰু নেতৃত্বৰ অভাৱ দলটোৱে অনুভৱ কৰিব পাৰে । ৰাজনৈতিক বিশ্লেষকসকলৰ মতে, গোৱেলৰ এই সিদ্ধান্ত আন দলৰ নেতাসকলৰ বাবেও এক শিক্ষা ৷ বয়স আৰু অভিজ্ঞতাৰে পুষ্ট হৈ কেনেকৈ এক সুস্থ ৰাজনীতি আগুৱাই নিব পাৰি সেই বিষয়ে সকলোৱে জানিবলৈ এক সুযোগ লাভ কৰিব পাৰে ।
