اترپردیش کے ضلع بریلی میں ہجومی تشدد کا شکار شخص کو پولیس نے زخمی نوجوان کو ہسپتال پہنچایا، جہاں آج ان کی علاج کے دوران موت ہوگئی۔
پولیس نے اس معاملہ میں کارروائی کرتے ہوئے چار افراد کو گرفتار کیا ہے۔
اطلاع کے مطابق بھوجی پورہ تھانہ علاقہ کے گاؤں پیگا کے رہائشی بھوپ رام نے اپنی بھینس 14 اگست کو صبح آٹھ بجے جنگل میں قبرستان کے قریب کھونٹے سے باندھی تھی۔
جب وہ دس بجے پانی پلانے کے لیے پہنچا تو وہاں پر بھینس نہیں تھی۔ بھینس کے تازہ پیروں کے نشانات دیکھ کر بھوپ رام اور اس کے اہل خانہ اس کے پیچھے پیچھے چلے گئے۔ اسی دوران نواب گنج کے گاؤں مُجھینہ میں اینٹ بھٹے کے قریب تین مبینہ چور بھینس لے جاتے ہوئے دکھائی دیئے، اسی دوران دو مبینہ چور فرار ہوگئے۔
بھوپ رام نے اپنے اہل خانہ کی مدد سے ایک مبینہ چور کو پکڑ لیا۔ الزام یہ ہے کہ موقع پر پکڑا گیا شخص مزمل ہی تھا۔
مزمل بھی تھانہ بھوجی پورہ کے ہی گاؤں روپ پور کا رہنے والا تھا۔
بھوپ رام کی بھینس چوری کی اطلاع پر پورا گاؤں جمع ہو گیا اور تقریباً ایک سو سے زائد لوگوں کی بھیڑ نے اسے جم کر پٹائی کرکے نیم مردہ کردیا۔
گاؤں کے ہی لوگوں نے اُسے تشویشناک حالت میں بھوجی پورہ سی ایچ سی میں داخل کرایا۔
حالت مزید تشویشناک ہونے پر ڈاکٹروں نے اسے ڈسٹرکٹ اسپتال کے لیے ریفر کر دیا۔
جب ضلع اسپتال میں حالت مسلسل تشویشناک ہوتی گئی تو اسے 16 اگست کو ایس آر ایم ایس میڈیکل کالج میں داخل کرا دیا گیا۔
یہاں ایس ایس پی کے ہدایت پر تھانہ بھوجی پورہ پولیس اپنے خرچ پر علاج کرا رہی تھی۔
ایس آر ایم ایس میں وہ کوما میں چلا گیا تھا، پھر اُس کے بعد ہوش نہیں آیا اور آج اس کی موت ہو گئی۔
ہلاک ہوئے شخص مزمل کے بھائی نزاکت علی کی تحریر پر پولیس نے بھینس مالک سمیت چار لوگوں کے خلاف مار پیٹ اور جان سے مارنے کی دفعات میں مقدمہ درج کرایا تھا۔
پولیس نے مزمل کی موت کے بعد مارپیٹ اور جان سے مارنے کے درج مقدمہ میں غیر ارادتاً قتل اور 308 دفعہ کو اضافی دفعات کے طور پر مقدمہ ترمیم کردیا ہے۔
تھانہ بھوجی پورہ تھانہ پولیس نے قتل کے ملزمان بھوپ رام، کملیش کمار، جمنا پرساد اور دھرم پال کو گرفتار کرکے جیل بھیج دیا ہے۔
اس معاملے میں ایس پی (دیہات) سنسار سنگھ کا کہنا ہے کہ کسی بھی شخص کو قانون ہاتھ میں لینے کا حق نہیں ہے۔ ہم نے بھینس چوری کے معاملے میں بھینس کے مالک کی طرف سے بھینس چوری کا مقدمہ درج کیا تھا اور مزمل کے بھائی کی تحریر پر بھینس مالک کے خلاف ہجومی تشدد کرنے کا مقدمہ درج کیا تھا۔ اب بھینس کا مالک اور اُس کے چار ساتھیوں کو جیل بھیج دیا گیا ہے۔
