మద్యం దుకాణాన్ని తీసివేయాలంటూ వస్త్ర వ్యాపారి ఆత్మహత్యాయత్నం - కలెక్టరేట్​లో వ్యాపారుల ఆందోళన

Textile Traders protest at collectorate : కరీంనగర్ కలెక్టరేట్​లో​ ప్రజావాణి కార్యక్రమంలో వస్త్ర వ్యాపారులు ఆందోళన వ్యక్తం చేశారు. జిల్లాలోని గాంధీ రోడ్డులో వైన్​ షాప్ ఎత్తివేయాలంటూ డిమాండ్​ చేశారు. ఈ క్రమంలో వస్త్ర వ్యాపారుల సంఘం అధ్యక్షుడు అశోక్​ పెట్రోల్​ పోసుకుని ఆత్మహత్యాయత్నానికి పాల్పడ్డాడు. వెంటనే పోలీసులు అతణ్ని అడ్డుకుని పోలీస్​ స్టేషన్​కు తరలించారు. వస్త్ర దుకాణాల మధ్య వైన్​ షాప్​కు అనుమతిస్తే తమ అందరికీ ఆత్మహత్యనే శరణ్యమంటూ వస్త్ర వ్యాపారులు ఆవేదన వ్యక్తం చేశారు.  

Textile Traders Protest on Wine Shop : మద్యం దుకాణం పెట్టే ప్రాంతంలో ఒక వైపు పాఠశాల, మరోవైపు దేవాలయం ఉందని, దీనికి ప్రభుత్వం ఎలా అనుమతిస్తుందని వస్త్ర వ్యాపారులు ప్రశ్నించారు. మద్యం దుకాణాన్ని నెలకొల్ప వద్దంటూ గతంలో పలుమార్లు ఎక్సైజ్ శాఖ అధికారులకు, కలెక్టర్​కు ఫిర్యాదు చేశామని తెలిపారు. జిల్లాలోని మహిళలు పెద్ద మొత్తంలో గాంధీ రోడ్డుకు వచ్చి చీరలను కొనుగోలు చేస్తారని, ఈ నేపథ్యంలో మద్యం దుకాణానికి అనుమతి ఇవ్వడం తమ వ్యాపారానికి విఘాతం కలుగుతుందని మహిళలు ఆవేదన వ్యక్తం చేశారు. వెంటనే అధికారులు స్పందించి తమకు న్యాయం చేయాలని వస్త్ర వ్యాపారులు కోరారు.