Mohammad Azharuddin Vs Vishnuvardhan Reddy : అజారుద్దీన్​ జూబ్లీహిల్స్​ పర్యటనలో ఉద్రిక్తత.. నువ్వానేనా అనేంతలా

Mohammad Azharuddin Vs Vishnuvardhan Reddy : రాష్ట్ర కాంగ్రెస్​ పార్టీలో అంతర్గత కలహాలు ఎప్పటికప్పుడు బయటపడుతూనే ఉంటున్నాయి. తాజాగా హైదరాబాద్​లోని జూబ్లీహిల్స్​ నియోజవర్గంలో క్రికెటర్​, కాంగ్రెస్​ నాయకుడు మహమ్మద్​ అజారుద్దీన్​ పర్యటనలో తీవ్ర ఉద్రిక్తత నెలకొంది. మాజీ ఎమ్మెల్యే విష్ణువర్ధన్​రెడ్డికి సమాచారం ఇవ్వకుండా నియోజకవర్గంలో అజారుద్దీన్​ పర్యటించడంతో ఆగ్రహించిన ఆయన వర్గీయులు అడ్డుకున్నారు. 

రహమత్​ నగర్​ డివిజన్​ ఎస్​పీఆర్​హిల్స్​లో విష్ణువర్ధన్​రెడ్డికి అనుకూలంగా నినాదాలు చేశారు. దీంతో వీరువురి అనుచరుల మధ్య బాహాబాహీగానే ఒకరినొకరు తోసుకున్నారు. అందులో మహిళలు సైతం తిరగబడ్డారు. పోలీసులు రంగ ప్రవేశం చేసి.. వారిని నిలువరించిన ఒకరిని ఒకరు నెట్టుకుంటూ కొట్లాడుకున్నారు. అయితే ముందుగానే అజారుద్దీన్​ జూబ్లీహిల్స్​ నియోజకవర్గంలోని స్థానిక కార్యకర్తలతో చాయ్​ పే చర్చ నిర్వహించాలనుకుని.. రహమత్​ నగర్​ డివిజన్​ శ్రీరామ్​ నగర్​ చౌరస్తాలో సమావేశం ఏర్పాటు చేసేందుకు ర్యాలీగా అజారుద్దీన్​ వచ్చారు. దీంతో విష్ణువర్ధన్​ రెడ్డి వర్గీయులు ఆపడంతో.. పోలీసులు వారిని చెదరగొట్టారు. దీంతో పర్యటన ముగించుకుని వెళ్లారా లేదా అనేది తెలియాల్సి ఉంది.