MLA Raghunandan Rao Comments on BRS : 'బార్లు, బీర్లు, గంజాయిని అడ్డుపెట్టుకొని.. బీఆర్​ఎస్​ అధికారంలోకి రావాలని చూస్తుంది'

MLA Raghunandan Rao Comments on BRS : బెల్ట్ షాపులు, గంజాయి, డ్రగ్స్​ రహిత ఎల్బీనగర్ కోసం బీజేపీ నాయకుడు సామ రంగారెడ్డి నిరసన దీక్ష చేపట్టారు. 48 గంటల పాటు కొనసాగిన ఈ నిరసనకు దుబ్బాక శాసనసభ్యులు రఘునందన్ రావు సంఘీభావం తెలిపారు. సామ రంగారెడ్డికి నిమ్మరసం ఇచ్చి దీక్షను విరమింపజేశారు. ఈ సందర్భంగా రఘునందన్​ రావు మాట్లాడుతూ.. ఎల్బీనగర్​లో పోలీసుల చేతిలో గిరిజన మహిళకు జరిగిన ఘటన మర్చిపోకముందే.. నందనవనంలో దళిత మైనర్ బాలికపై సామూహిక హత్యాచారం జరగడం చాలా బాధాకరమన్నారు. ఈ ఘాతుకానికి పాల్పడిన నిందితులను కఠినంగా శిక్షించాలని.. దళిత మహిళకు న్యాయం జరగాలని ఎమ్మెల్యే డిమాండ్ చేశారు. రక్షణ కల్పించాల్సిన పోలీసులే మహిళలపై దాడులు చేస్తున్నారని ఆరోపణలు చేశారు. బార్లు, బీర్లు, గంజాయిని అడ్డు పెట్టుకొని బీఆర్​ఎస్​ అధికారంలోకి రావాలని చూస్తుందని దుయ్యబట్టారు. బీజేపీ పేద ప్రజల పక్షాన పోరాడుతుందని హామీ ఇచ్చారు. ఇప్పటి వరకు రాష్ట్రంలో బీజేపీ అధికారంలోకి రాలేదని.. ఒక్కసారి అవకాశం ఇస్తే పేద ప్రజల బతుకులు మారుస్తామని ప్రజలకు భరోసా ఇచ్చారు.