పోలీసులపై చర్యలు తీసుకోవాలని సీఈఓ వికాస్ రాజ్​ను కోరిన మధుయాష్కీ

Madhu Yaskhi Goud Complaint to EC on Police : రాష్ట్రంలో కాంగ్రెస్ ప్రభంజనం వీస్తోందని, కాంగ్రెస్ అభ్యర్థులు గెలుస్తున్న చోట పోలీసులతో దాడులు చేయిస్తున్నారని ఎల్బీనగర్ కాంగ్రెస్ అభ్యర్థి మధుయాష్కీ గౌడ్ అన్నారు. పోలీసులు అర్ధరాత్రి తన ఇల్లు, కార్యాలయంపై ఎలాంటి నోటీసులు లేకుండా దాడికి పాల్పడి భయభ్రాంతులకు గురి చేశారని.. అధికార పార్టీకి తొత్తులుగా వ్యవహరిస్తున్నారని ఆరోపించారు. నిబంధనలకు విరుద్ధంగా పోలీసుల తీరు ఉందని, ఫిర్యాదు చేసి మూడు రోజులు అయినప్పటికీ ఇంకా ఎలాంటి చర్యలు తీసుకోలేదని మధుయాష్కీ అన్నారు.

అసలు తనిఖీ జరగలేదని ఏసీపీ మీడియాతో చెప్పారని.. ఎలాంటి అదేశాలు లేకుండా పోలీసులు వచ్చారని ఆర్ఓ చెప్పినట్లు ఆయన వివరించారు. ఈ పోలీసులు ఉంటే ఎన్నికలు ప్రశాంతంగా జరగవన్న ఆయన.. పోలీసులపై చర్యలు తీసుకోవాలని సీఈఓ వికాస్ రాజ్​ను కోరారు. బీఆర్ఎస్ ప్రభుత్వం ఆరిపోయే దీపం అన్న మధు యాష్కీ.. పోలీసులు చాలా చోట్ల గులాబీ కార్యకర్తల్లా వ్యవహరిస్తున్నారని మండి పడ్డారు.