Jithender Reddy Challenge to KTR : మంత్రి కేటీఆర్​కు ఛాలెంజ్ విసిరిన మాజీ ఎంపీ జితేందర్​రెడ్డి

EX MP Jithendar Reddy Latest Comments : పాలమూరు-రంగారెడ్డి ఎత్తిపోతల పథకం ద్వారా మహబూబ్​నగర్ జిల్లాలో నీళ్లందించకపోతే మంత్రి కేటీఆర్​ రాజీనామా చేస్తారా అని మాజీ ఎంపీ, బీజేపీ జాతీయ కార్యవర్గ సభ్యుడు జితేందర్‌ రెడ్డి సవాల్‌ విసిరారు. మహబూబ్​నగర్ జిల్లా కేంద్రం సమీపంలోని మయూరి అర్బన్ ఎకో పార్క్​లో బీజేపీ చేపట్టిన టిఫిన్ చర్చ కార్యక్రమంలో జితేందర్ రెడ్డి పాల్గొన్నారు. ఈ సందర్భంగా కర్వెన, ఉదండాపూర్ జలాశయాలకు నీరందించకపోతే రాజీనామా చేయడంతో పాటు రాబోయే ఎన్నికలలో పోటీ చేయకుండా ఉంటారా..? అని జితేందర్ రెడ్డి ఛాలెంజ్ విసిరారు. ఒకవేళ నీళ్లు అందిస్తే ఈ ఎన్నికల్లో తాను పోటీ చేయనని.. మంత్రి తన సవాల్‌ను స్వీకరించాలని డిమాండ్ చేశారు. పాలమూరు-రంగారెడ్డి ఎత్తిపోతల పథకం కేవలం తాగు నీటి కోసమని.. సాగు కోసం కాదంటూ రాష్ట్ర ప్రభుత్వం సుప్రీంకోర్టుకు కూడా అబద్దాలు చెప్పిందన్నారు. మరో నాలుగు నెలల్లో ఎన్నికలు ఉన్నాయని.. వాస్తవాలను ప్రజల్లోకి తీసుకెళ్లనున్నామని పేర్కొన్నారు. అందులో భాగంగా ఈ నెల 18న రైతు రుణమాఫీపై, 20న భువనగిరి దగ్గర రెండు పడక గదుల ఇళ్లపై, 25న ఇందిరా పార్క్ వద్ద ధర్నా కార్యక్రమాలు చేపట్టనున్నామని తెలిపారు.