'వారాంత యోధులకూ' ప్రయోజనాలెక్కువే!

రోజూ వ్యాయామానికి సమయం దొరకటం లేదని బాధపడేవారు కనీసం వారాంతాల్లోనైనా వ్యాయామాలకు ఉపక్రమించటం మంచిదని నిపుణులు సూచిస్తున్నారు. అయితే సరైన పద్ధతిలో శరీరం సహకరించినంత మేరకే వ్యాయామం చేయాలని చెబుతున్నారు.

రోజూ వ్యాయామం చేయటానికి కొందరికి సమయం దొరకదు. దీంతో చాలామంది వారాంత సెలవుదినాల్లో ఒకేసారి తీవ్రంగా వ్యాయామాలు చేసేస్తుంటారు. ఇలాంటి 'వారాంత యోధులకు' కండరాలు దెబ్బతినే ముప్పు ఎక్కువ. అందుకే రెండు మూడు రోజుల వరకు నొప్పులతో సతమతమవుతుంటారు. అయినప్పటికీ వీరికి వ్యాయామం వల్ల ఒనగూడే ప్రయోజనాలూ బాగానే లభిస్తున్నట్టు తాజా అధ్యయనం ఒకటి పేర్కొంటోంది.

ఒకట్రెండు సార్లే అయినా వారానికి కనీసం 75 నిమిషాలు, ఒక మాదిరిగా 150 నిమిషాలు వ్యాయామాలు చేసేవారి ఆయుష్షు పెరుగుతున్నట్టు వెల్లడి కావటం విశేషం. అంతగా వ్యాయామాలు చేయనివారితో పోలిస్తే ఇలాంటి వారాంత యోధులకు ఎలాంటి కారణంతోనైనా మరణించే ముప్పు 30% తగ్గుముఖం పడుతోంది. గుండెజబ్బుతో సంభవించే మరణం ముప్పు 40%, క్యాన్సర్‌తో తలెత్తే మరణం ముప్పు 18% తగ్గుతోంది.

రోజూ క్రమం తప్పకుండా వ్యాయామం చేసేవారికి ఇంతకన్నా మెరుగైన ఫలితాలే కనబడుతున్నప్పటికీ.. వారాంత యోధులతో పోలిస్తే తేడా మరీ అంత ఎక్కువగా ఏమీ ఉండకపోవటం గమనార్హం. కాబట్టి రోజూ వ్యాయామానికి సమయం దొరకటం లేదని బాధపడేవారు కనీసం వారాంతాల్లోనైనా వ్యాయామాలకు ఉపక్రమించటం మంచిదని నిపుణులు సూచిస్తున్నారు. అయితే కఠినమైన వ్యాయామాలు చేసేముందు ఒకసారి డాక్టర్ల సిఫారసు తీసుకొని, శరీరం సహకరించినంతమేరకే వ్యాయామం చేయాలనే విషయం మరవరాదు.

ఇదీ చదవండి:ఎర్నాకులంలో మొదటి షిగెల్లా కేసు