పదే పదే ఒకటే పాట గుర్తుకు వస్తుందా? ఎంతకీ మైండ్​లో నుంచి పోవట్లేదా?

మన మెదడులో కొన్ని పాటలు చాలా కాలం పాటు అతుక్కుపోతాయి. మెదడు అంతకుముందు విన్న ఏదైనా పాటను మళ్లీ మళ్లీ వినడం వల్ల ఇలాంటి పరిస్థితి ఏర్పడుతుంది. ఆ పాటను మనం వినడం ఆపేసినా కానీ అదే పాట తాలూకు ట్యూన్ మన మైండ్​లో తిరుగుతూ ఉంటుంది. అసలు ఇలా ఎందుకు జరుగుతుంది. దీని నుండి బయటపడాలంటే ఏం చేయాలో ఓ సారి తెలుసుకుందాం.

రిలాక్స్, సంతోషం కోసం మనం పాటలు వింటుంటాం. అయితే కొన్ని పాటలు మన మైండ్​లో నాటుకుపోతాయి. ఆ పాటను వినడం ఆపేసినా కానీ మన మెదడులో మాత్రం ఆ పాటనే తిరుగుతూ ఉంటుంది. మనం ఆఫీసులో పని చేస్తున్నా అదే గుర్తుకు వస్తుంటుంది. అసలు ఒక పాట ఇలా ఎలా మన మెదడులోకి వెళ్తుంది. దీని నుంచి మన మెదడును ఎలా బయటకు తీసుకురావాలో ఓ సారి చూద్దాం.

ఖాళీ సమయాల్లో, ప్రయాణాల్లో సరదాగా పాటలు వింటుంటాం. అలా మీరు కూడా పాటలు వింటుంటే.. ఏదైనా పాపులర్ సాంగ్ లేదంటే మీకు బాగా ఇష్టమైన పాట వచ్చిందంటే.. దాని తాలుకా ప్రభావం మీ మనసుపై పడుతుంది. దీనిని ఒక ఉదాహరణ ద్వారా తెలుసుకుందాం.
తెలుగులో బాగా పాపులర్ అయిన 'బుట్ట బొమ్మ' పాట మీకు బాగా ఇష్టం అనుకుందాం. ఈ పాటను విన్న తర్వాత చాలాసేపటి వరకు మీ మెదడులో ఇదే పాట తిరుగుతూ ఉంటుంది. మీరు ఆఫీసుకు వెళ్లినా, తిరిగి ఇంటికి వచ్చినా మీ మదిలో ఇదే పాట పదే పదే తిరుగుతూ ఉంటుంది. అసలు మన మెదడులో ఆ పాట ఇంత బలంగా నాటుకుపోవడానికి, పదేపదే గుర్తుకు రావడానికి కారణాలు ఏంటో యూనివర్శిటీ ఆఫ్ సిన్సినాటి కాలేజ్ ఆఫ్ బిజినెస్ ప్రొఫెసర్ జేమ్స్ కెల్లారిస్ అధ్యయనం చేశారు. మనం పాట వినడం, ఆ పాట మన మదిలో నాటుకుపోవడం అనేది సైంటిఫిక్ విషయం. మనం పాట విన్నప్పుడు అది మన మెదడులోని ఆడిటరి కార్టెక్స్ అనే భాగాన్ని ప్రేరేపిస్తుంది.

'బుట్టబొమ్మ' సాంగ్​ను కొద్దిగా విన్నా మన మెదడు మాత్రం మిగిలిన భాగాన్ని కూడా పూర్తి చేసుకుంటుంది. మన మెదడు ఇలా సగం విన్న పాటను పూర్తి చేయడానికి ఆడిటరి కార్టెక్స్ అనే భాగం ఆటోమెటిక్​గా పనిచేసే శక్తిని కలిగి ఉంటుంది. ఇలా జరగడానికి కారణం మన మెదడులోని ఆడిటరి కార్టెక్స్ పాటకు కనెక్ట్ అవడం. అది పాటకు కనెక్ట్ అవడం వల్ల పాట కొంత భాగం విన్నా మిగిలిన భాగాన్ని పూర్తి చేసుకుంటుంది. ఆ పాటను మనం పదేపదే రాగాలు తీయడం, మరవకపోవడం లాంటి అనేక కారణాలు ఉంటాయి. కొన్నిసార్లు మనం ఆ పాటను గుర్తుచేసుకోకూడదని ఎన్ని రకాలుగా ప్రయత్నించినా ఎలాంటి ప్రయోజనం ఉండకపోవచ్చు. ప్రతి చిన్న విషయాన్ని మర్చిపోయే వాళ్లకు ఇది అన్ని విషయాలను గుర్తుపెట్టుకునే శక్తిని ఇస్తుందని పరిశోధనలో తేలింది.

యూనివర్శిటీ ఆఫ్ సిన్సినాటి కాలేజ్ ఆఫ్ బిజినెస్ ప్రొఫెసర్​గా పనిచేస్తున్న జేమ్స్ కెల్లారిస్ మానవుల మెదడులో పదేపదే తిరిగే పాటల గురించి పరిశోధన చేశారు. అందులో 99 శాతం మంది మైండ్​లో సాంగ్స్​ అలా ఉండిపోతాయని జేమ్స్ పేర్కొన్నారు. సంగీతం నిరంతరం వింటున్న వారితో ఈ సమస్య ఎక్కువగా ఉన్నట్లు ఆయన తెలిపారు. నిజానికి పాటలు ఇలా పదేపదే మన మైండ్​లో తిరగడానికి కారణం ఏంటి అని కచ్చితమైన ఆధారాలు ఏమీ దొరకలేదు. కానీ పాటల విషయంలో చాలామంది ఇలాంటి అనుభూతిని చూసిన వాళ్లే. అయితే పాటల విషయంలో కొన్నిసార్లు మనకు అర్థం కాకపోయినా సొంతంగా ఏవో పదాలను చేర్చుకోవడం.. లేదంటే ట్యూన్లను పాడుతుంటాం.

74 శాతం మంది లిరిక్స్​తో కూడిన పాటలను పదేపదే గుర్తు చేసుకుంటారు. 11 శాతం మంది సంగీత వాయిద్యాల ద్వారా వచ్చే సాంగ్స్​ను మైండ్​లో గుర్తు పెట్టుకుంటున్నారు. అలాగే కమర్షియల్ జింగిల్స్​ను 15 శాతం మంది గుర్తు చేసుకుంటున్నారు. బక్నల్ యూనివర్సిటీ పరిశోధకులు చేసిన సర్వేలో సగానికి పైగా విద్యార్థులు తమ మైండ్​లో ఆహ్లాదకరమైన సాంగ్స్ నిలిచిపోయానని తెలిపారు. మరో 30 శాతం మంది మాత్రం తటస్థంగా ఉన్నారు. కేవలం 15% పాటలు మాత్రమే ఇబ్బందికరంగా ఉన్నాయని అన్నారు.

మీ మైండ్​లో నుంచి పాటలను పారదోలడం ఎలా:
మెదడులో పదే పదే ఒక పాట తిరుగుతుందంటే కొంతమందికి ఇబ్బందిగా ఉంటుంది. మరి అలాంటి వాళ్లు దాని నుండి బయటపడటానికి ఏం చేయాలో ఓ సారి తెలుసుకుందాం.

• 1. పదే పదే గుర్తొచ్చిన పాటకు బదులు వేరొక పాటను పాడండి. మొబైల్​, టీవీ, రేడియోలో వేరే పాటను వేసుకోని వినండి.
• 2. బిజీగా ఉండేందుకు వర్కౌట్స్ చేయండి.
• 3. పాటంతటినీ వినండి (ఇది కొంతమందికి మాత్రమే పనిచేస్తుంది).

మీకు ఒక పాట లేదంటే ట్యూన్ పదేపదే గుర్తొస్తుందని ఏమీ చింతించాల్సిన అవసరం లేదు. దీని వల్ల మీకు ఏదో నష్టం కలుగుతుందని కాదు. కాబట్టి మీరు దాని గురించి ఆలోచించడం మానేసి మిమ్మల్ని బిజీగా ఉంచే ఏదైనా పనిలో నిమగ్నం కావడం ఉత్తమమని నిపుణులు చెబుతున్నారు.