లాక్డౌన్ వేళ ఆరోగ్యకరమైన జీవనశైలివైపు అడుగులు వేస్తున్న సమయంలో తీపి యావ(షుగర్ క్రేవింగ్స్ను) తగ్గించుకునే మార్గాన్ని సూచిస్తున్నారు.. ప్రముఖ న్యూట్రీషనిస్ట్ డాక్టర్ దివ్యా గుప్తా. చక్కెర పదార్థాలను తినాలనే కోరికకు ఎలా చెక్ పెట్టాలో ఈటీవీ భారత్తో పంచుకున్నారు.
నీటితో తీపికి చెక్..
నీటిని పదే పదే తాగుతుండడం వల్ల శరీరం హైడ్రేట్ అవుతుంది. దీంతో తీపిపై వ్యామోహం తగ్గుతుంది.
ప్రోటీన్ ఉండగా చక్కెరేలా?
అధికంగా ప్రోటీన్లు ఉన్న ఆహారం తీసుకోవాలి. పనీర్, ఉడకబెట్టిన గుడ్లు, టోఫూ, పెరుగు, చికెన్ వంటి పదార్థాలు తినడం వల్ల శరీరానికి చక్కెర పదార్థాల అవసరం తగ్గుతుంది.
యాపిల్ సైడర్ తాగితే...
యాపిల్ సైడర్ వెనిగర్.. రోజూ కొద్ది మోతాదులో తీసుకుంటే, రక్తంలోని చక్కెర శాతాన్ని తగ్గిస్తుంది. పెద్ద బాటిల్ నిండా నీటిని తీసుకుని అందులో రెండు చెంచాల యాపిల్ సైడర్ వేసుకుని సమయానుకూలంగా తాగాలి. ఇలా చేయడం వల్ల షుగర్ క్రేవింగ్ కొంతమేర తగ్గుతుంది.
పండుతో తృప్తిపడు..
షుగర్ క్రేవింగ్ ఎక్కువగా ఉన్నవారు వీలైనన్ని ఎక్కువ పండ్లు తీసుకోవాలి. దీంతో శరీరానికి విటమిన్లు, మినరల్స్ లభిస్తాయి. తీపి పదార్ధాలు తినాలనిపించినప్పుడు ఓ తియ్యటి పండును తినేయండి. దీంతో మీ కోరిక తీరుతుంది, ఆరోగ్యమూ చేకూరుతుంది. సీజనల్ పండ్లను తీసుకుంటే మరీ మంచిది.
ఆ చిరుతిళ్లు మేలు..
నిజానికి చిరుతిళ్లు ఆరోగ్యానికి అంత మంచిది కాదు. మనం రోజూ ప్రోటీన్లు, ఫైబర్, కొవ్వు పదార్థాలు ఎన్ని తీసుకున్నా.. చక్కెర పదార్థాలున్న చిరుతిళ్లు తినడం వల్ల ఫలితం లేకుండా పోతుంది. అయితే, ఆరోగ్యకరమైన చిరుతిళ్లు తినడం మాత్రం మంచిదేనంటున్నారు డా. దివ్యా. స్నాక్స్లో చాక్లెట్, చిప్స్ బదులు.. వేరు శనగలు, డ్రైఫ్రూట్స్, మఖానాలు, తాజా పండ్లు, పేలాలు వంటి హెల్తీ ఫుడ్ తింటే మంచిది.
పీచు తిను.. తీపి వీడు
పీచు పదార్థాలు తినడం వల్ల ఆకలి తగ్గుతుంది. దీంతో, చక్కెర పదార్థాలపై మనసు లాగదు. పళ్లు, కూరగాయలు, ఓట్స్, చపాతీలు తీసుకోవడం మంచిది. వాటితో పాటు హెల్తీ సూప్, సలాడ్లు తీసుకుంటే షుగర్ క్రేవింగ్స్ చాలా వరకు అదుపులోకి వస్తాయి.
ఇదీ చదవండి: హెర్బల్ చాయ్.. ఆరోగ్యానికి ఎంతో హాయ్!
