How Teeth Affect Digestion System : తిన్న తిండి సరిగ్గా జీర్ణం కావాలంటే జీర్ణవ్యవస్థ హెల్తీగా ఉండాలి. కానీ, ప్రస్తుత రోజుల్లో మారిన జీవనశైలి, ఆహారపు అలవాట్లు జీర్ణవ్యవస్థపై ఎంతో ప్రభావం చూపుతున్నాయి. దాంతో.. చిన్న వయసులోనే షుగర్, బీపీ, గ్యాస్(Gas Trouble), ఎసిడిటీ వంటి సమస్యలతో ఇబ్బందిపడుతున్నారు. అయితే.. అందరూ పేగులు ఆరోగ్యంగా ఉంటే జీర్ణవ్యవస్థ మెరుగ్గా పనిచేస్తుందనుకుంటారు. కానీ.. చాలా మందికి తెలియని విషయమేమిటంటే.. జీర్ణక్రియ సరిగ్గా జరగడంలో నోరు ముఖ్య పాత్ర పోషిస్తుందట. అలాగే దంతాలు కూడా జీర్ణవ్యవస్థను ఎంతో ప్రభావితం చేస్తాయంటున్నారు ఆరోగ్య నిపుణులు. అదెలాగో ఈ స్టోరీలో తెలుసుకుందాం.
నమలడం : మనం తీసుకునే ఆహారాన్ని సరిగ్గా నమలడంలో దంతాలు కీలక పాత్ర పోషిస్తాయి. అయితే చాలా మంది సరిగ్గా నమలకుండా అలాగే మింగుతుంటారు. అది మంచిది కాదు. అలాకాకుండా మీరు తీసుకున్న ఫుడ్ను బాగా నమలాలి. అలా చేయడం ద్వారా ఘన పదార్థాలు చిన్న ముక్కులుగా మారుతాయి. అప్పుడు దాని ఉపరితల వైశాల్యం పెరిగి పొట్టలోని జీర్ణ రసాలు మెరుగ్గా పనిచేస్తాయి. దాంతో జీర్ణక్రియ మరింత ప్రభావవంతంగా పనిచేస్తుంది. ఇలా మీరు చేసినప్పుడు జీర్ణ వ్యవస్థ పనితీరు మెరుగుపడుతుంది. దాంతో జీర్ణక్రియ త్వరగా జరిగి కావాల్సిన పోషకాలు అందించడంతో పాటు ఆరోగ్యాన్ని ప్రోత్సహిస్తుంది.
బోలస్ ఏర్పాటు : ఇక మీరు తీసుకున్న ఆహారాన్ని దంతాలు క్రషింగ్, గ్రైండింగ్ చేస్తున్నప్పుడు నోటిలోని గ్రంథులు మరింత లాలాజాలాన్ని ఉత్పత్తి చేస్తాయి. అలా వచ్చిన లాలాజలం ఆ ఫుడ్ను ఒక ముద్దలాగా తయారుచేస్తుంది. దానినే బోలస్ అంటారు. ఇలా అయినప్పుడు మాత్రమే మనం తీసుకున్న ఫుడ్ను మింగడానికి ఈజీగా ఉంటుంది. జీర్ణ వ్యవస్థ పోషకాలను గ్రహించడానికి కూడా ఈ బోలస్ తోడ్పడుతుంది.
మీరు ఈ ఆహార పదార్థాలు తింటున్నారా? - మీ పేగుల్లో విషం నింపుతునట్టే!
మింగడం : ఫుడ్ బోలస్ మృదువైనది. దీనివల్ల ఆహారాన్ని సులభంగా మింగవచ్చు. విశ్రాంతిగా ఉన్నప్పుడు, మాట్లాడేటప్పుడు, తాగేటప్పుడు, తినేటప్పుడు మానవులు రోజుకు సగటున 580 సార్లు మింగుతారు(గుటకలు). జీర్ణక్రియకు ఇది కీలకం. ఇది శరీరానికి కావాల్సిన పోషణను అందించడానికి ఉన్న ఏకైక కారిడార్.
బాక్టీరియా బ్యాలెన్స్‌ : జీర్ణక్రియ సామర్థ్యమే.. ఆరోగ్యకరమైన జీర్ణ వ్యవస్థను తయారు చేస్తుంది. తగినంతగా విభజన చెందిన ఆహారం.. పొట్టలో ఆరోగ్యకరమైన బ్యాక్టీరియా వృద్ధి చెందడానికి కారణమవుతుంది. ఫలితంగానే.. మొత్తం జీర్ణక్రియ ఆరోగ్యం మెరుగుపడుతుంది. పై ప్రక్రియలన్నీ సజావుగా జరగాలంటే.. ముందుగా సజావుగా పనిచేయాల్సింది దంతాలు! అక్కడ తేడా కొడితే.. జీర్ణ వ్యవస్థ మొత్తం అస్తవ్యస్తమైపోతుంది. కాబట్టి.. దంతాలతో ఆహారాన్ని చక్కగా నమిలి తినడమే కాకుండా.. వాటిని ఆరోగ్యంగా, పరిశుభ్రంగా ఉంచుకోవాలని నిపుణులు సూచిస్తున్నారు.
