కొందరిలో నెలా నెలా ఠంచనుగా వచ్చే రుతుచక్రం ఒక్కోసారి ముందుగానే వచ్చేయడమో లేదా మరీ ఆలస్యంగా రావడమో జరుగుతుంది. ఇలా అవడానికి కారణాలేంటంటే?
గర్భం.. ధరించిన మహిళల్లో నెలసరి ఆగిపోవడం మొదటి సంకేతం.
మాత్రలు: గర్భనిరోధక మాత్రలు వాడినప్పుడు కూడా అప్పుడప్పుడూ నెలసరి అదుపు తప్పుతుంది.
పాలిచ్చే తల్లులు: బిడ్డకు పాలిచ్చే తల్లుల్లో కూడా నెలసరి చాలా రోజుల పాటు ఆగిపోతుంది. బిడ్డ ఎప్పుడైతే పాలు తాగడం ఆపేస్తాడో అప్పుడే నెలసరి మొదలవుతుంది.
అనారోగ్యాలు: థైరాయిడ్‌ సమస్య ఉన్న వారిలో కూడా ఇది ఆలస్యంగా లేదా తొందరగా రావడం జరుగుతుంది. పాలీసిస్టిక్‌ ఓవరీ సిండ్రోమ్‌ (పీసీఓఎస్‌), మూత్రాశయంలో రాళ్లు, బుడగల్లాంటివి ఉండటం, ఎండోమెట్రియాసిస్‌ లాంటి అనారోగ్యాల వల్ల క్రమం తప్పుతుంది.
ఒత్తిడి: దీని వల్ల కూడా అండం విడుదల అవదు. దాంతో నెలసరి మొదలు కాదు.
మెనోపాజ్‌: సాధారణంగా 45, 50 ఏళ్లు వచ్చే సరికి మెనోపాజ్‌ మొదలవుతుంది. కొందరిలో అటూ ఇటూ ఉండొచ్చు. ఇది మొదలవుతున్నప్పుడు కూడా నెలసరి క్రమం తప్పుతుంది.
బరువు: అకస్మాత్తుగా బరువు పెరగడం/ తగ్గడం కూడా నెలసరి మీద ప్రభావాన్ని చూపుతుంది.
వ్యాయామాలు: మితి మీరిన వ్యాయామాల వల్ల కూడా పీరియడ్స్ ఆర్డర్‌ మారొచ్చు.
మందులు: అనారోగ్యాలకు వాడే కొన్ని రకాల మందుల వల్ల కూడా నెలసరి ఆలస్యంగా రావడమో, ముందు వచ్చేయడమో జరుగుతుంది.
వీటిలో మీకేది వర్తిస్తుందో చూడండి. అవసరాన్ని బట్టి వైద్యులను సంప్రదించండి.
