చాక్లెట్.. ఈ పేరు వినగానే మన మనసు దానివైపు పరుగులు తీస్తుంది.. మన నోరు దాని రుచి కోసం తహతహలాడుతుంది. మరి, అమ్మాయిలందరినీ దాని మాయలో పడేసుకున్న ఈ చాక్లెట్ ఎక్కడ పుట్టిందో తెలుసా? ఉత్తర అమెరికాలోని మెసోఅమెరికాలో. థియోబ్రోమా కొకోవా చెట్టు నుంచి సేకరించిన కొకోవా గింజలతో చాక్లెట్‌ను తయారుచేస్తారు. మెసోఅమెరికన్లు దీన్ని తొలుత డ్రింక్‌ రూపంలో సేవించేవారట. మసాలాలు, కార్న్‌ ప్యూరీ కలిపి తయారుచేసిన ఈ పానీయానికి ‘చిలేట్‌’ అని నామకరణం చేశారు. చేదుచేదుగా ఉండే ఈ డ్రింక్‌ శరీరానికి శక్తిని అందించడంతో పాటు లైంగిక కోరికల్ని పెంచే సాధనంగా కూడా వారు దీన్ని వాడేవారట.
ఆరోగ్యానికి ఆరోగ్యం!
చాక్లెట్ రుచిలోనే కాదు.. ఆరోగ్యపరంగానూ ఎన్నో ప్రయోజనాలను చేకూర్చుతుందంటున్నారు ఆరోగ్య నిపుణులు. అలాగని మరీ ఎక్కువగా చాక్లెట్ తింటే స్థూలకాయం, హైపర్‌టెన్షన్‌, మధుమేహం.. వంటి దీర్ఘకాలిక వ్యాధుల బారిన పడే అవకాశం ఉందంటున్నారు. కాబట్టి రోజుకు ఒకటి లేదా రెండు బైట్స్‌ చాలంటున్నారు.
- మానసిక ఒత్తిళ్లను తగ్గించే అద్భుత గుణాలు చాక్లెట్ సొంతం అంటున్నారు నిపుణులు. మన మెదడులో సెరటోనిన్‌ హార్మోన్‌ స్థాయులను పెంచి మనసులోని ఆందోళనలను తగ్గించడంలో ఇది సహకరిస్తుంది. అలాగే రోజూ చాక్లెట్ తిన్న వారితో పోల్చితే తినని వారిలో డిప్రెషన్ స్థాయులు ఎక్కువగా ఉన్నట్లు ఓ అధ్యయనంలో వెల్లడైంది.
- చాక్లెట్‌లో ‘ఎల్‌-ఆర్జినైన్‌’ అనే అమైనో ఆమ్లం ఉంటుంది. ఇది స్త్రీ, పురుషుల శరీరంలోని లైంగిక అవయవాలకు రక్తాన్ని సరఫరా చేసి లైంగిక కోరికలు పెరిగేందుకు సహకరిస్తుంది. అందుకే చాక్లెట్‌ను న్యాచురల్‌ సెక్స్‌ బూస్టర్‌గా పరిగణిస్తారు.
- చాక్లెట్‌లోని ఫ్లేవనాల్స్‌ అతినీలలోహిత కిరణాల నుంచి చర్మాన్ని రక్షిస్తాయి. అలాగే చర్మానికి రక్తప్రసరణను మెరుగుపరిచి చర్మ ఆరోగ్యానికి దోహదం చేస్తాయి. ఈ ఫ్లేవనాల్స్‌ అధికంగా లభించే కొకోవా డ్రింక్‌ తాగే వారి చర్మం సున్నితంగా, నవయవ్వనంగా మెరిసిపోతుందంటున్నారు నిపుణులు.
- చాక్లెట్‌లో ఉండే కొకోవాలో ఫినోలిక్‌ సమ్మేళనాలుంటాయి. అవి మన శరీరంలోని రోగనిరోధక శక్తిని మెరుగుపరచడానికి దోహదం చేస్తాయి.
- చాక్లెట్ మన శరీరంలో పేరుకుపోయిన చెడు కొవ్వును తగ్గించడంలో సహకరిస్తుందని ఓ అధ్యయనంలో వెల్లడైంది. ఇందుకు దీనిలోని ప్లాంట్‌ స్టెరోల్స్‌, కొకోవా ఫ్లేవనాల్సే కారణమట!
- రోజుకు రెండు కప్పుల హాట్‌ చాక్లెట్ తాగడం మెదడు ఆరోగ్యానికి చాలా మంచిదట. అంతేకాదు.. జ్ఞాపకశక్తి కూడా మెరుగుపడుతుందంటున్నారు శాస్త్రవేత్తలు.
- రోజూ చాక్లెట్ తీసుకుంటే గుండె జబ్బులు వచ్చే అవకాశం 1/3 వంతులు తగ్గుతుందట!
- ఇక మరో అధ్యయనం ఏం చెబుతుందంటే.. గర్భిణిగా ఉన్నప్పుడు రోజూ 30 గ్రాముల చాక్లెట్ తీసుకోవడం వల్ల పిండం ఆరోగ్యంగా ఎదుగుతుందట!
- వ్యాయామం చేసే ముందైనా, క్రీడల్లో పాల్గొనే ముందైనా తక్షణ శక్తి కోసం ఓ చిన్న ముక్క చాక్లెట్ తినమంటున్నారు నిపుణులు. అలాగే ఇది శరీరాన్ని ఫిట్‌గా, దృఢంగా ఉంచడానికి సైతం తోడ్పడుతుంది.
- ఎప్పుడూ ఏదో ఒక చిరుతిండి తినాలని మనసు కోరుకుంటే ఒక చిన్న చాక్లెట్ ముక్క నోట్లో వేసుకోండి.. ఇక అలాంటి పదార్థాల పైకి మనసు మళ్లదు. తద్వారా అధిక బరువు పెరగకుండా జాగ్రత్తపడచ్చు.
- చాక్లెట్‌లో ఉండే థియోబ్రోమిన్‌ అనే రసాయనం దగ్గు నుంచి ఉపశమనం కలిగిస్తుంది.
ముచ్చటగా మూడు రకాలు!
మనం ఎంతగానో ఇష్టపడి తినే చాక్లెట్లలో ముచ్చటగా మూడు రకాలున్నాయి.
1. డార్క్ చాక్లెట్
పాల పదార్థాలు అతి తక్కువగా లేదంటే అసలు ఉపయోగించకుండా తయారుచేసేదే డార్క్ చాక్లెట్. రుచిలో కాస్త చేదుగా ఉండే ఈ చాక్లెట్‌లో యాంటీ ఆక్సిడెంట్లు, పాలీఫినోల్స్‌, ఫ్లేవనాయిడ్స్‌ అధికంగా ఉంటాయి. ఇవి రక్తనాళాల్లో రక్తప్రసరణను ప్రేరేపించి బీపీని అదుపులో ఉంచుతాయి.
2. మిల్క్ చాక్లెట్
12 శాతం పాలు లేదా పాల పదార్థాలు, 33-45 శాతం కొకోవా పౌడర్‌, చక్కెర.. వంటి వాటితో ఈ చాక్లెట్ తయారవుతుంది. రుచిలో తియ్యగా ఉండే ఈ చాక్లెట్‌లో చక్కెరలు, కొవ్వులు కూడా అధికంగా ఉంటాయట.
3. వైట్‌ చాక్లెట్
కొకోవా గింజల నుంచి సేకరించిన బటర్‌తో మాత్రమే దీన్ని తయారుచేస్తారు. ఇందులో చాక్లెట్, కొకోవా పౌడర్‌.. వంటివేమీ ఉపయోగించరు.
చూశారుగా.. యమ్మీ చాక్లెట్‌తో ఆరోగ్యానికి ఎన్ని ప్రయోజనాలున్నాయో! అలాగని ఎక్కువ మొత్తంలో తిన్నారో అధిక బరువుతో పాటు లేనిపోని అనారోగ్యాలు మూటగట్టుకుంటారని నిపుణులు హెచ్చరిస్తున్నారు. కాబట్టి రోజుకు ఒకటి లేదా రెండు ముక్కలు చాలు.
