కొవిడ్‌-19 ప్రభావం కేవలం శ్వాస వ్యవస్థమీదే కాదు, మెదడు మీదా ఉంటోంది. ఎందుకంటే- సార్స్‌-కోవ్‌2 కేంద్ర నాడీ వ్యవస్థ మీద ప్రభావం చూపడం వల్ల రుచి, వాసన, తలనొప్పి, అలసట, వికారం... వంటి లక్షణాలు కనిపిస్తున్నాయి. ఈ విషయమై లోతుగా పరిశీలించగా- ఈ వైరస్ ఆర్‌ఎన్‌ఏ జాడలు మెదడు, సెరిబ్రోస్పైనల్‌ ఫ్లూయిడ్లలోనూ కనిపించాయట. దాంతో అది మెదడులోకి ఎలా వెళ్లిందనే దానిమీద జర్మనీలోని ఛారిటె యూనివర్సిటీ నిపుణులు పరిశీలించగా- ముక్కుకీ గొంతుకీ మధ్యలో ఉన్న నాసోఫ్యారింక్స్‌ ద్వారా అది లోపలకు వెళుతున్నట్లు గుర్తించారు.
ఈ విషయమై వీళ్లు కొవిడ్‌తో మరణించిన 33 మంది రోగుల్ని నిశితంగా పరీక్షించారట. అదెలా అంటే- అత్యధిక శాతం వైరస్ ముక్కులోని మ్యూకస్‌ పొరల్లోని నాడీ కణాల్లో చేరుతుందట. అక్కడి నుంచే మెదడులో వాసన, రుచుల్ని తెలిపే నాడీకేంద్రాలకు చేరి ప్రభావం చూపుతున్నట్లు గుర్తించారు. మరికొందరిలో ఈ వైరస్ శ్వాసకోశ, హృద్రోగ వ్యవస్థల్ని నియంత్రించే మెడుల్లా భాగంలోకీ చేరుతుందట. అందుకే కొందరిలో ఆకస్మిక మరణాలు చోటుచేసుకుంటున్నాయని పరిశోధకుల అభిప్రాయం.
ఇదీ చదవండి: 'వచ్చే ఏడాది సరికొత్త శిఖరాలను అధిరోహిస్తాం'
