అలవాటు పడతారు..
వయసుకు అనుగుణంగా చిన్నారులు నిద్రపోయే సమయం మారుతూ ఉంటుంది. అప్పుడే పుట్టిన పసి పిల్లల దగ్గర్నుంచి వారికి ఆరువారాల వయసొచ్చే వరకూ చిన్నారులు తరచూ నిద్ర లేస్తుంటారు. తరచూ ఫీడింగ్ అవసరం ఉండటం కూడా దీనికి కారణం కావచ్చు. అయితే నాలుగు నెలలు గడిచేసరికి చిన్నారులకు రాత్రి వేళల్లో విరామం లేకుండా ఆరుగంటల కంటే ఎక్కువ సమయం నిద్రపోవడం అలవాటవుతుంది. ఇలా కాకుండా వారు తరచూ మేల్కొంటున్నారంటే వారికందించే ఆహారం దగ్గర్నుంచి వారు నిద్రపోవడం వరకు ఉన్న ప్రణాళిక ఓ క్రమపద్ధతిలో లేదని అర్థం. కాబట్టి ప్రతి పనినీ నిర్ణీతమైన సమయంలో చేయడం ద్వారా చిన్నారులు కొన్ని రోజుల్లోనే దానికి తగ్గట్టుగా అలవాటు పడిపోతారు. దీనికోసం వారికి ఏ సమయానికి ఏ ఆహారం అందించాలి? ఎప్పుడు నిద్రపుచ్చాలో నిర్ణయించుకొని ఓ టైం టేబుల్ సిద్ధం చేయాలి. దాని ప్రకారం వ్యవహరిస్తే చిన్నారులు రాత్రి పూట ఎక్కువ సమయం నిద్రపోవడానికి అలవాటు పడతారు. ఇలా టైం టేబుల్ సిద్ధం చేసే విషయంలో అవసరమైతే పిల్లల వైద్య నిపుణుల సాయం తీసుకోవడం మంచిది.
వరుస క్రమం పాటించాలి..
చాలామంది తల్లులు కడుపు నిండితే త్వరగా నిద్రపోతారనే ఉద్దేశంతో పాపాయికి పాలు పడుతుంటారు. ఇలా చేయడం వల్ల వారు దానికే అలవాటు పడిపోయే అవకాశం ఉంది. కాబట్టి చిన్నారులకు తనకు తానుగా నిద్రపోయేలా అలవాటు చేయాలి. ఆరువారాల వయసు వచ్చేసరికి చిన్నారుల్లో 'స్లీప్ - వేక్ సైకిల్' మొదలవుతుంది. అందువల్ల వారికి నిర్ణీత వేళల్లో నిద్రపోవడం, లేవడం అలవాటు చేయాల్సి ఉంటుంది. దీనికోసం కొన్ని పద్ధతులు పాటించాలి. ముందుగా పాపాయికి స్నానం చేయించి పాలు పట్టాలి. కొన్ని సందర్భాల్లో పాపాయి నిద్ర పోతున్నట్లుగా అనిపించినా వెంటనే మేల్కొంటుంది. దీనికి మనం చేసే శబ్దాలు కూడా కారణం కావచ్చు. అందుకే తనను నిద్రపుచ్చాల్సిన సమయానికి అరగంట ముందే వీలైనంత నిశ్శబ్దమైన వాతావరణం ఏర్పాటు చేయాలి. ఆ తర్వాత జోలపాట పాడటం లేదా కథ చెప్పడం లాంటివి చేయాలి. ఇలా చేసేటప్పుడు మీ గొంతు గట్టిగా కాకుండా నెమ్మదిగా ఉండాలి. దీనివల్ల చిన్నారులు మెల్లగా నిద్రలోకి జారుకొంటారు. రోజూ ఒకే సమయానికి వీటిన్నింటినీ చేయడం ద్వారా క్రమంగా వారు ఈ పద్ధతికి అలవాటు పడతారు. అలాగే పగటి వేళల్లో పిల్లలు వీలైనంత తక్కువగా నిద్రపోయేలా చూడటం కూడా అవసరమే. అప్పుడే వారు రాత్రి ఎక్కువ సమయం పడుకోగలుగుతారు.
తెలిసేలా చేయండి..
చాలామంది తల్లులు చేసే పొరపాటు ఏంటంటే.. సమయంతో పట్టింపు లేకుండా తమ చిన్నారులను పడుకోబెట్టడానికి ప్రయత్నిస్తుంటారు. ఇలా చేయడం వల్ల చిన్నారులకు ఎప్పటికీ వేళకు నిద్రపోయే అలవాటు రాదు. వారు ఆడుకోవడానికి ప్రయత్నిస్తుంటే.. వారిని ఆడుకోనివ్వాలి. ఆ తర్వాత అలసిపోయి తమంతట తామే నిద్రపోతారు. అలా కాకుండా ఆ సమయంలో చిన్నారిని నిద్రపుచ్చాల్సిన అవసరం ఉందని భావిస్తే.. పడుకోవడానికి సమయమైందన్న సంకేతాన్ని వారికి అందించాలి. దీనికోసం సాధారణంగా వారిని పడుకోబెట్టడానికి మీరేం చేస్తుంటారో అవి చేయాలి. ఉదాహరణకి భుజంపై పడుకోబెట్టుకొని జోలపాడటం, కాళ్లపై పడుకోబెట్టుకొని జోకొట్టడం, ఉయ్యాలలో వేయడం.. లాంటివి చేయాలి. దీంతో నిద్రపోయే సమయం ఆసన్నమైందని భావించి పాపాయి పడుకొంటుంది. అలాగే చిన్నారికి ఎత్తుకొని కాకుండా మంచంపైనే నిద్రపోయే అలవాటు చేయాలని భావిస్తే.. మీరు కూడా తనతో పాటే నిద్రపోతున్నట్లు నటించాలి. అప్పుడు వారు కూడా నిద్రపోతారు. పాప లేదా బాబుకి ఫీడింగ్ ఇవ్వడం ఆపేసినట్లయితే.. చిన్నారిని నిద్రపుచ్చే సమయంలో మీ భాగస్వామి సహకారం తీసుకోవడం మంచిది.
తోడుగా బొమ్మ..
కొంతమంది తల్లిదండ్రులు కొన్ని నెలలు గడిచిన తర్వాత చిన్నారులను వేరే గదుల్లో నిద్రపుచ్చడం అలవాటు చేస్తుంటారు. దీనివల్ల తల్లిదండ్రులకు దూరంగా ఒంటరిగా ఉన్నామనే భావన వారిలో కలిగి నిద్రపోవడం మానేస్తారు. అందుకే నిద్రపోయే సమయంలో వారి పక్కన టెడ్డీబేర్ లాంటి బొమ్మలను ఉంచాలి. దీంతో తమ పక్కన ఒకరున్నారనే ధైర్యంతో నిద్రపోతారు.
ఇదీ చూడండి: ముందంజలో కొనసాగుతున్న తెరాస అభ్యర్థులు
