ప్రస్తుతం దేశవ్యాప్తంగా సుమారు ఐదు కోట్ల మంది ఊబకాయం, జీవక్రియ సంబంధిత సమస్యలతో బాధపడుతున్నారని తాజా గణాంకాలు రుజువు చేస్తున్నాయి. ఇదిలా ఉంటే స్థూలకాయం సమస్య గురించి కొంతమందిలో నెలకొన్న అపోహలు వారిని మానసికంగానూ కుంగదీస్తున్నాయని, ఇది కూడా ఒక రకంగా తీవ్రతను పెంచుతుందని చెబుతున్నారు నిపుణులు. అందుకే స్థూలకాయానికి సంబంధించిన అసలు వాస్తవాలేంటో తెలుసుకొని ఆరోగ్యకరమైన జీవనశైలిని అలవర్చుకోవాలని సలహా ఇస్తున్నారు. మార్చి 4న ‘ప్రపంచ స్థూలకాయ దినోత్సవం’ సందర్భంగా ఈ వ్యాధి గురించి చాలామందిలో నెలకొన్న కొన్ని సాధారణ అపోహలేంటి? వాటి వెనకున్న అసలు నిజాలేంటో తెలుసుకుందాం..
సరైన ఆహార నియమాలు పాటించకపోవడం, వ్యాయామం చేయకపోవడం, నిద్రలేమి, మానసిక సమస్యలు.. వంటివన్నీ స్థూలకాయానికి ప్రధాన కారణాలుగా మారుతున్నాయని చెబుతున్నారు నిపుణులు. ముఖ్యంగా మన శరీరంలోకి చేరే క్యాలరీలు, ఖర్చయ్యే క్యాలరీల మధ్య శక్తి సమతుల్యత లోపించడం వల్లే క్రమంగా బరువు పెరిగి అది కొన్నాళ్లకు ఊబకాయంగా పరిణమిస్తుందంటున్నారు. అయితే ఇది దీర్ఘకాలిక సమస్యే అయినా ఆరోగ్యకరమైన అలవాట్లతో దీన్ని అదుపు చేసుకోవచ్చని, బరువు కూడా తగ్గచ్చని సలహా ఇస్తున్నారు.
అనారోగ్యకరమైన జీవనశైలే ఊబకాయానికి ప్రధాన కారణం..
ఏది పడితే అది తినడం, వ్యాయామం చేయకపోవడం.. ఇలాంటి అనారోగ్యకరమైన జీవనశైలే స్థూలకాయానికి దారితీస్తుందని మనలో చాలామంది అనుకుంటుంటారు. అయితే వీటితో పాటు ఒత్తిడి, ఆందోళనలు, నిద్రలేమి, హార్మోన్ల అసమతుల్యత, దీర్ఘకాలిక నొప్పులు, ఇతరత్రా ఆరోగ్య సమస్యలకు మనం వాడే మందులు.. వంటివన్నీ కూడా ఊబకాయానికి దారితీసే అవకాశాలున్నాయని చెబుతున్నారు నిపుణులు. కాబట్టి ఆహార, వ్యాయామ నియమాల పైనే దృష్టి పెట్టడం కాకుండా మానసికంగానూ దృఢంగా ఉండడం చాలా ముఖ్యం. ఇక నొప్పులు, ఆరోగ్య సమస్యలకు వాడే మందుల విషయంలో మీ శారీరక మార్పుల్ని ఎప్పటికప్పుడు గమనించుకుంటూ నిపుణుల సలహాలు తీసుకోవడం తప్పనిసరి.
త్వరగా బరువు తగ్గడమే స్థూలకాయానికి పరిష్కారం.
అధికంగా పెరిగిపోయిన బరువును తగ్గించుకోవడం వల్ల స్థూలకాయమే కాదు.. ఎన్నో అనారోగ్యాలకు దూరంగా ఉండచ్చని చెబుతున్నారు నిపుణులు. అయితే ఇందుకోసం కొంతమంది త్వరగా బరువు తగ్గేందుకు డైటింగ్‌ చేయడం, విపరీతంగా వ్యాయామాలు చేయడం.. వంటి మార్గాల్ని అన్వేషిస్తుంటారు. ఫలితంగా జీవక్రియల పనితీరు మందగించడంతో పాటు కండరాల సామర్థ్యం తగ్గిపోయే అవకాశాలు ఎక్కువగా ఉంటాయి. ఇది మన శరీరంలో పోషకాహార లోపం, నిద్ర సంబంధిత సమస్యలు, మూత్రపిండాల్లో రాళ్లు ఏర్పడడం.. వంటి లేనిపోని అనారోగ్యాలకు దారితీస్తాయి. మరి, ఇలాంటి దుష్ప్రభావాలు లేకుండా బరువు తగ్గాలంటే అందుకోసం ఆరోగ్యకరమైన మార్గాలు ఉండనే ఉన్నాయి. ఈ క్రమంలో నిపుణుల సలహా మేరకు చక్కటి పోషకాహారం తీసుకోవడం, నిర్ణీత సమయం వ్యాయామానికి కేటాయించడంతో పాటు మానసిక ఆరోగ్యం కోసం సుఖనిద్ర కూడా ముఖ్యమే. అంతేకాదు.. ఇలా బరువు తగ్గాక శరీరంపై వచ్చే స్ట్రెచ్‌మార్క్స్‌ విషయంలోనూ ముందు నుంచే మానసికంగా సిద్ధపడాలంటున్నారు నిపుణులు.
క్యాలరీలు తగ్గించడం వల్ల ఎక్కువగా బరువు తగ్గచ్చు..
బరువు తగ్గాలనుకునే వారు, అదుపులో ఉంచుకోవాలనుకునే వారు క్యాలరీలు తగ్గించి తీసుకోవాలనుకోవడం లేదంటే పూర్తిగా మానేయాలనుకోవడం సహజం. అంతేకాదు.. వ్యాయామం చేయకుండా క్యాలరీలను తగ్గించడం వల్ల కూడా బరువును అదుపులో ఉంచుకోవచ్చనుకుంటుంటారు. అయితే ఇది కొంతవరకు నిజమే అయినా దీని ప్రభావం మాత్రం తక్కువ సమయానికే పరిమితమంటున్నారు నిపుణులు. అదే దీర్ఘకాలం పాటు బరువును అదుపులో ఉంచుకోవాలనుకుంటే శరీరానికి సరిపడా క్యాలరీలు లభించే పండ్లు, కాయగూరల్ని తీసుకుంటూనే క్రమం తప్పకుండా వ్యాయామం చేయడంపై దృష్టి పెట్టమంటున్నారు. ఎందుకంటే అనారోగ్యకరమైన ఆహారం (జంక్‌ఫుడ్‌, ప్రాసెస్డ్‌ ఫుడ్‌, డెజర్ట్స్‌.. మొదలైనవి) ద్వారా లభించే క్యాలరీల కంటే ఆరోగ్యకరమైన (పండ్లు, కాయగూరలు వంటివి) పదార్థాల నుంచి శరీరానికి అందే క్యాలరీలే మంచివని నిపుణులు సలహా ఇస్తున్నారు.
తల్లిపాలు తాగిన పిల్లలు స్థూలకాయానికి గురికారు..
డబ్బా పాలు తాగిన పిల్లలతో పోల్చితే తల్లిపాలు తాగిన పిల్లలు స్థూలకాయం బారిన పడే అవకాశాలు చాలా తక్కువని ప్రపంచ ఆరోగ్య సంస్థ చెబుతోంది. అయితే తల్లిపాలు తాగిన పిల్లలందరికీ స్థూలకాయం రాదని చెప్పలేమని, ఒకవేళ వారు పెరిగి పెద్దయ్యే కొద్దీ అనారోగ్యకరమైన ఆహారపుటలవాట్లు వారిని స్థూలకాయులుగా మార్చే ప్రమాదమూ లేకపోలేదని హెచ్చరిస్తోంది. అందుకే పిల్లలకు చిన్నతనం నుంచే సంపూర్ణ పోషకాలు లభించే ఇంటి ఆహారాన్నే అందించడం శ్రేయస్కరమని చెబుతోంది. దీంతో పాటు వ్యాయామాన్నీ వారి జీవన విధానంలో భాగం చేయడం మర్చిపోవద్దు.
రోజంతా చిరుతిళ్లు తింటే ఊబకాయం వస్తుంది..
ఇది ముమ్మాటికీ నిజమే అంటున్నారు నిపుణులు. అయితే అది కూడా చిప్స్‌, కుకీస్‌, చక్కెరలు ఎక్కువగా ఉండే పదార్థాలు.. వంటి అనారోగ్యపూరిత ఆహారం ఇందుకు దారి తీస్తుందంటున్నారు. కాబట్టి వీటికి బదులుగా నట్స్‌, పండ్లు, కాయగూరలు, పండ్ల రసాలను భోజనానికి మధ్యలో తీసుకోవడం.. వేళకు భోంచేయడం, తక్కువ ఆహారం ఎక్కువ సార్లు తినడం.. వంటి చిన్న చిన్న చిట్కాలు పాటిస్తే శరీరంలో జీవక్రియల పనితీరు మెరుగుపడుతుంది. ఇది అంతిమంగా బరువును అదుపులో ఉంచడానికి/బరువు తగ్గడానికి దోహదం చేస్తుంది.
మరి, ఊబకాయం విషయంలో మీలోనూ ఇలాంటి అపోహలుంటే.. వెంటనే మీ ఆలోచనల్ని మార్చుకోండి.. ఆరోగ్యకరమైన ఆహారం, చక్కటి వ్యాయామం.. ఇవే సంపూర్ణ ఆరోగ్యానికి సోపానాలు! కాబట్టి ఎప్పటికప్పుడు మీ బరువును చెక్‌ చేసుకుంటూ.. దానికి అనుగుణంగా నిపుణుల సలహా తీసుకుంటూ ముందుకెళ్లడం మంచిదని గుర్తుంచుకోండి.
