కోడిగుడ్లు తింటే ఆరోగ్యానికి చాలా మంచిదని అందరికీ తెలిసిందే. గుడ్ల వల్ల మనకు అనేక పోషకాలు లభిస్తాయి. చైనాకు చెందిన పరిశోధకు తాజాగా చేసిన అధ్యయనంలోనూ ఇదే తేలింది. వారానికి 3 నుంచి 6 గుడ్లు తీసుకుంటే గుండెకు చాలా మంచిదని వెల్లడించింది. దీనివల్ల మరణాల ప్రమాదం తగ్గుతుందని స్పష్టం చేసింది.
వారానికి 3-6 గుడ్లు
చైనీస్ అకాడమీ ఆఫ్ మెడికల్ సైన్సెస్, ఫువాయ్ ఆస్పత్రికి చెందిన జియా... తన సహచరులతో కలిసి నిర్వహించిన ఈ అధ్యయనంలో... వారానికి 3 నుంచి 6 గుడ్లు తినే వారిలో గుండె సంబంధిత సమస్యలు(సీవీడీ) తక్కువగా ఉన్నట్లు గుర్తించారు. వారానికి ఒక గుడ్డు మాత్రమే తీసుకోవడం వల్ల 22 శాతం సీవీడీ ముప్పు ఏర్పడుతుందని.. ఇది మరణాలపై 29 శాతం వరకూ ప్రభావం చూపుతుందని తెలిపారు. వారానికి 10 కంటే ఎక్కువ గుడ్లు తీసుకుంటే 39 శాతం సీవీడీ ప్రమాదం ఉంటుందని స్పష్టం చేశారు. 10 గుడ్లు తీసుకోవడం వల్ల మరణాలపై 13 శాతం ప్రభావం ఉంటుందని పేర్కొన్నారు.
లక్ష మందిపై ప్రయోగం
ఈ పరిశోధనలో చైనాలోని 15 రాష్ట్రాల నుంచి మొత్తం గుండె, క్యాన్సర్, మూత్రపిండాల సమస్యలు లేని 1,02,136 మంది పాల్గొన్నారు. 17 సంవత్సరాల పాటు నిర్వహించిన పరిశీలనలో.. 4,848 గుండె సంబంధిత వ్యాధుల కేసులు నమోదు కాగా (1273 సీహెచ్డీ, 2919 గుండెపోటు) 5511 మంది మృతి చెందారు.
తక్కువ తినేవారు వాటి సంఖ్య పెంచాలి
చైనా కడూరీ బయోబ్యాంక్(సీకేబీ) అధ్యయనం ప్రకారం వారానికి 5 గుడ్లు తీసుకోవడం వల్ల గుండెకు హాని తక్కువగా ఉందని పరిశోధకులు గుర్తించారు. చైనా-పీఏఆర్ ప్రాజెక్టులో పాల్గొన్న 25 శాతం మంది వారానికి 3-6 గుడ్లు తీసుకుంటుండగా.. 12 శాతం మంది ఒక గుడ్డు, 24 శాతం మంది వారానికి 10 గుడ్లు తీసుకున్నట్లు తెలిపారు. అంతేకాకుండా అధికంగా గుడ్లు తీసుకోవడం వల్ల చైనీయుల్లో కలిగిన ప్రతికూల ప్రభావాలనూ సర్వేలో పొందుపర్చారు. అయితే తక్కువగా గుడ్లు తినే వారు వాటి సంఖ్యను పెంచాలని సూచించారు.
