ప్రపంచ ఆలయాల్లో యాదాద్రి ప్రత్యేకత చాటుకోబోతోంది: సీఎం

యాదాద్రి లక్ష్మీనారసింహుని దివ్యక్షేత్రాన్ని పున:ప్రారంభం కోసం తుదిమెరుగులు దిద్దే పనులను నిర్ణీత గడువులోగా పూర్తి చేయాలని ముఖ్యమంత్రి కేసీఆర్ ఆదేశించారు. క్యూలైన్ల నిర్మాణాన్ని వచ్చే నెల 15వతేదీ కల్లా పూర్తి చేయాలని గడువు విధించారు. ఎటునుంచి చూసినా దేవాలయం సుందరంగా కనిపించేలా తుదిమెరుగులు దిద్దాలని సూచించారు. క్యూలైన్​ ప్రాకారం మీద బిగించే కలశపు నమూనాను సీఎం ఖరారు చేశారు. ప్రాకారం, శివాలయం, రథశాల తదితరాలకు సంబంధించి ముఖ్యమంత్రి సూచనలు చేశారు.

పూర్తిగా కృష్ణశిలలతో నిర్మితమవుతున్న యాదాద్రి పుణ్యక్షేత్రం అద్భుత రూపంతో ప్రపంచ దేవాలయాల్లోనే ప్రత్యేకతను చాటుకోబోతోందని ముఖ్యమంత్రి కేసీఆర్ అన్నారు. యాదాద్రి ఆలయ అభివృద్ధి పనులపై సీఎం సమీక్ష నిర్వహించారు. ఉన్నతాధికారులు, ఆర్కిటెక్ట్​లతో ప్రగతిభవన్​లో సమావేశమయ్యారు. యాదాద్రి పనులు తుది రూపుదాలుస్తున్న నేపథ్యంలో తీసుకోవాల్సిన జాగ్రత్తలు, దివ్యమైన అలంకృత రూపం ఉండేలా అనుసరించాల్సిన కార్యాచరణపై చర్చించారు.

యాదాద్రి ఆలయంపై వెలుగులు విరజిమ్మేలా విద్యుత్ దీపాలు

పనుల పురోగతిపై ఆరా

స్వామి వారి ఆలయాన్ని త్వరలోనే పున: ప్రారంభించాలని నిర్ణయించి నేపథ్యంలో గడువులోగా తుది మెరుగులు దిద్దే పనులు పూర్తి చేయాలని అధికారులను సీఎం ఆదేశించారు. పనుల పురోగతిని ఆరా తీశారు. క్యూలైన్ నిర్మాణంలో చేపట్టాల్సిన అలంకరణ విషయమై సూచనలు చేశారు. 350 ఫీట్ల పొడవైన క్యూలైన్ నిర్మాణాన్ని ఇత్తడి డిజైన్లతో తీర్చిదిద్దాలని కేసీఆర్ తెలిపారు. క్యూలైను పొడవునా ప్రాకారం మీద బిగించే కలశపు నమూనాలను పరిశీలించిన ఆయన... నాలుగింటిలో ఒకదాన్ని ఖరారు చేశారు. ఉత్తర దిక్కున ప్రహరీ గోడను తొలగించి అక్కడ క్యూలైన్ నిర్మాణం చేపట్టాలని... ఏప్రిల్ 15 వరకు క్యూలైను నిర్మాణం పూర్తికావాలని గడువు విధించారు.

గుడి కనిపించేలా గ్రిల్స్, రెయిలింగ్​లు

టెంపుల్ ఎలివేషన్​తో..

'దీప స్తంభాన్ని, ప్రహరీని ఇత్తడితో సృజనాత్మకంగా తీర్చిదిద్దడంతో పాటు పెడస్టల్​కు కూడా ఇత్తడితో ఆకృతులను బిగించాలి. శివాలయ ప్రహరీ గోడలకు ఇత్తడితో తీర్చిదిద్దిన త్రిశూలం ఆకారాలను బిగించాలి. ఉత్తర దిక్కు ప్రాకారాన్ని తొలగించి గుడి కనిపించేలా గ్రిల్స్, రెయిలింగ్​లను ఏర్పాటు చేయాలి. ఇతర కట్టడాలు అడ్డులేకుండా, దేవాలయం చుట్టూ 360 డిగ్రీలు తిరిగి చూసినా సుందరంగా కనిపించేలా తుదిమెరుగులు దిద్దాలి. బ్రహ్మోత్సవాల్లో సుదర్శనం చక్రం ఏర్పాటు చేసిన తరహాలోనే శివాలయం చుట్టూ త్రిశూలం కనిపించేలా ఏర్పాట్లు చేయాలి. రథశాలను టెంపుల్ ఎలివేషన్​తో తీర్చిదిద్దాలి.'

- కేసీఆర్​, ముఖ్యమంత్రి

వెలుగులతో ప్రకాశించేలా..

యాదాద్రి ఆలయంపై వెలుగులు విరజిమ్మేలా విద్యుత్ దీపాలు

విష్ణు పుష్కరిణి, కొండపై చుట్టూ నిర్మించే ప్రహరీ గోడలమీద రెండు వైపులా వెలుగులు విరజిమ్మేలా విద్యుత్ దీపాలను అలంకరించాలని ముఖ్యమంత్రి తెలిపారు. 80 ఫీట్ల పొడవున్న దీపస్తంభాన్ని లాన్ నడుమ ఏర్పాటు చేయాలని చెప్పారు. అద్దాల మండపం అత్యంత సుందరంగా నిర్మితమవుతోందని ముఖ్యమంత్రి కితాబు ఇచ్చారు. చివరి అంకం చేరుకున్న ఆలయ నిర్మాణ పనులను వేగవంతం చేయాలని కేసీఆర్ అన్నారు. రాత్రి వేళల్లో ఆలయ సముదాయం, ప్రాంగణాల చుట్టూ, పరిసరాలు దివ్యమైన వెలుగులతో ప్రకాశించేలా రూపొందించిన లైటింగ్ డెమో వీడియోను ముఖ్యమంత్రి తిలకించారు.

యాదాద్రి ఆలయం

అద్భుత రూపాన్ని సంతరించుకుంటోంది

'పునర్నిర్మాణం తర్వాత ప్రపంచ దేవాలయాల్లోనే యాదాద్రి పుణ్యక్షేత్రం తన ప్రత్యేకతను చాటుకోబోతోంది. వందశాతం రాతి కట్టడాలతో, కృష్ణ శిలలతో నిర్మితమవుతున్న యాదాద్రి దేవాలయం అద్భుత రూపాన్ని సంతరించుకుంటోంది. పున:ప్రారంభం తర్వాత లక్ష్మీనారసింహుని దర్శనానికి లక్షలాదిగా భక్తులు తరలివస్తారు. వారందరికీ ఎలాంటి ఇబ్బందులకు ఆస్కారం లేకుండా గుట్ట పరిసర ప్రాంతాలను తీర్చిదిద్దాలి.'

- కేసీఆర్​, ముఖ్యమంత్రి

ఇదీ చదవండి: దేశభక్తిని పెంపొందించేలా అమృత్ మహోత్సవాలు: సీఎం