యాదాద్రి ఆలయ అభివృద్ధిలో భాగంగా వలయ రహదారి విస్తరణ పనులు ముమ్మరంగా కొనసాగుతున్నాయి. కొండ కింద గల గండి చెరువు ప్రాంగణంలో టెంపుల్ సిటీ పైకి వెళ్లే దారి పనులు చేపడుతున్నారు. శుక్రవారం నాడు మట్టి దారిపై కంకర ఏర్పరచి.. చదును పనులు చేపట్టారు. గడువులోగా పనులు పూర్తి చేసేందుకు వైటీడీఏ అధికారులు ఆ దిశగా చర్యలు చేపడుతున్నారు.
ఆలయనగరికి వెళ్లేందుకు తులసి కాటేజ్ నుంచి ఒక మార్గం ఇప్పటికే పూర్తికాగా... ప్రస్తుతం రెండవ అప్రోచ్ రోడ్డు పనులు నిర్వహిస్తున్నారు. మల్లాపురం మార్గంలోని సర్కిల్ నుంచి ప్రెసిడెన్షియల్ సూట్ భవనాలకు వెళ్లేందుకు మరో మార్గం ఉండేలా నిర్మాణాలు చేపడుతున్నారు. కూలీల సంఖ్య పెంచుకుని పనుల్లో వేగం పెంచాలని ఇటీవల యాదాద్రిలో పర్యటించిన రోడ్ల భవనాల శాఖ మంత్రి ప్రశాంత్రెడ్డి గుత్తేదారులకు సూచించారు.
కొండ చుట్టూ వలయ రహదారి పనుల్లో భాగంగా గండి చెరువు ప్రాంగణం వద్ద సర్కిల్ను ఏర్పాటు చేశారు. రోడ్డుకు ఇరువైపులా వర్షపునీరు, మురుగు నీరు పారుదలకై డ్రైనేజీ నిర్మాణము చేపట్టారు. ఇప్పటికే ఈ పనుల్లో యాడా అధికారులు వేగం పెంచారు.
