'ఎక్కడ ఎన్నికలు వస్తే అక్కడ 'దత్తత' మంత్రం వినిపిస్తారు'

MLA Raghunandan Rao Comments On KTR: మునుగోడులో తెరాసను గెలిపిస్తే నియోజకవర్గాన్ని దత్తత తీసుకుంటానని మంత్రి కేటీఆర్ చేసిన వ్యాఖ్యలపై ఎమ్మెల్యే రఘనందన్​ రావు తనదైన శైలిలో స్పందించారు. ఎక్కడ ఎన్నికలు వస్తే అక్కడ దత్తత తీసుకుంటామని కేటీఆర్ చెబుతారని విమర్శించారు. ఇన్ని సంవత్సరాల తర్వాత ఈ ప్రాంత అభివృద్ధి గుర్తుకువచ్చిందా అని ప్రశ్నించారు. సిరిసిల్ల, సిద్దిపేట, నారాయణఖేడ్, పాలేరు దత్తత అయిపోయిందని.. ఇప్పుడు మునుగోడును దత్తత తీసుకుంటారని అంటున్నారని రఘనందన్ రావు ఎద్దేవా చేశారు.

MLA Raghunandan Rao Comments On KTR: మునుగోడులో భాజపా అభ్యర్థి రాజగోపాల్ రెడ్డి కాంట్రాక్టుల కోసమే పార్టీ మారారని మంత్రి కేటీఆర్ చేసిన ఆరోపణలను భాజపా ఎమ్మెల్యే రఘునందన్​రావు ఖండించారు. తెరాసలో చేర్చుకున్న కాంగ్రెస్ ఎమ్మెల్యేలకు ఏ కాంట్రాక్టులు ఇచ్చారని ప్రశ్నించారు. సంస్థాన్ నారాయణపురంలో ఆయన ఇంటింటి ప్రచారం చేస్తున్నారు. మునుగోడును దత్తత తీసుకుంటామన్న కేటీఆర్​కు ఇన్నేళ్ల తర్వాత ఈ ప్రాంత అభివృద్ధి గుర్తుకువచ్చిందా అని రఘునందన్​రావు ప్రశ్నించారు.

"సిరిసిల్ల, సిద్దిపేట, నారాయణఖేడ్, పాలేరు అయిపోయింది. ఇప్పుడు మునుగోడును దత్తత తీసుకుంటామని బయలుదేరారు. 8 సంవత్సరాల నుంచి చేసింది ఏమిటి. ఇప్పుడు ఏడాదిన్నర కాలం లేదు. ఇప్పుడు దత్తత అంటున్నారు. బూత్​కు ఒక ఎమ్మెల్యే, మంత్రిని ఎందుకు నియమించారు. పైసలు అన్ని గజ్వేల్, సిద్దిపేట, సిరిసిల్ల పోతున్నాయి. ప్రజలకు సమాధానం చెప్పాలి. మునుగోడుకు కేటీఆర్ మూడుసార్లు రాలేదు. 119 నియోజకవర్గాలను సమదృష్టితో చూడాలనే భావన మీకు లేకపోవడం దురదృష్టకరం. ఎప్పుడు ఎన్నికలు వస్తే అక్కడ దత్తత తీసుకుంటామని అంటారు. దుబ్బాకతోటి ప్రగతిభవన్ తలుపులు తెరిపించాం. హుజూరాబాద్​తోటి ఫాంహౌస్ గేట్లు తెరిపించాం. ఇప్పుడు మునుగోడులో గెలిస్తే ముఖ్యమంత్రి ప్రజల ముందుకు వచ్చే పరిస్థితి నెలకొంటది." -రఘునందన్​రావు, భాజపా ఎమ్మెల్యే

అసలేం జరిగిదంటే: నిన్న కూసుకుంట్ల ప్రభాకర్ రెడ్డి నామినేషన్ కార్యక్రమంలో మంత్రి కేటీఆర్ పాల్గొన్నారు. మునుగోడు ఉప ఎన్నికల్లో తెరాస అభ్యర్థిని గెలిపిస్తే మునుగోడును దత్తత తీసుకుంటానని కేటీఆర్ పేర్కొన్నారు.

ఇవీ చదవండి: తెరాసను గెలిపిస్తే మునుగోడు నియోజకవర్గాన్ని దత్తత తీసుకుంటా: కేటీఆర్‌