భూగర్భ జలాలు పెరగడం వల్ల యాదాద్రి జిల్లాలోని గుండాలలో గత రబీకి సంబంధించి 2,050 ఎకరాల్లో వరి సాగైంది. ఖరీఫ్ సీజన్లో 3,050 ఎకరాలకు సాగు చేశారు. ప్రస్తుత రబీలో అది 4,605 ఎకరాలకు పెరిగింది. రైతులు పెద్ద ఎత్తున వరి సాగు మెుదలెట్టి నాట్లు కూడా పూర్తి చేశారు. జిల్లాలోని 17 మండలాల్లో వరి సాగు విస్తీర్ణమే గణనీయంగా పెరిగింది.
వర్షాలు సమృద్ధిగా కురవడం, గోదావరి జలాలు వస్తుండటం వల్ల ఖరీఫ్తో పోల్చుకుంటే మూడు మీటర్ల మేర భూగర్భ జలం ఉబికి వచ్చింది. దీనికి తోడు నిరంతరాయంగా 24 గంటల విద్యుత్ సరఫరా అవుతోంది. మూసీ ఆయకట్టులోని భూదాన్ పోచంపల్లి, వలిగొండ, బీబీనగర్, రామన్నపేట, భువనగిరి మండలాల్లో ఏటా వరి సాగు విస్తీర్ణం ఇంచుమించుగా ఒకే విధంగా సాగవుతోంది. ఈసారి జనగామ జిల్లా నవాబ్ పేట రిజర్వాయర్ నుంచి గోదావరి జలాలతో గుండాల మండలంలోని చెరువులు నింపారు. తపస్ పల్లి రిజర్వాయర్ కాలువల ద్వారా రాజాపేట, ఆలేరు మండలాల్లోని కొన్ని చెరువులు నింపారు. సెప్టెంబర్, అక్టోబర్లో కురిసిన వర్షాలకు చెరువులు, కుంటలు నిండి భూగర్భజలాలు అమాంతం పెరిగాయి. రబీలో 36,939 హెక్టార్లలో వరి సాగు అవుతోందని వ్యవసాయ అధికారుల అంచనా. కానీ అది 54,800 హెక్టార్లకు పెరిగింది.
జిల్లాలో రబీ సాగు వివరాలు హెక్టార్లలో.
| పంట | సాధారణ | వాస్తవ సాగు |
|---|---|---|
| వరి | 36.939 | 54.800 |
| పప్పు దినుసులు | 513 | 138 |
| నూనెగింజలు | 152 | 32 |
| మొక్కజొన్న | 78 | 06 |
| ఇతర 'బీ' పంటలు | 1.317 | 30 |
వర్షాకాలంలో జిల్లాలో రికార్డు స్థాయిలో వర్షపాతం నమోదైంది. బీడు భూములు సాగులోకి రావడం వల్ల రైతులు ఎక్కువగా వరి నాట్లు వేశారు. ఫలితంగా ఎక్కడ చూసినా పచ్చని పొలాలు దర్శనమిస్తున్నాయి. పీఏసీఎస్ నూతన పాలకవర్గం... ధాన్యం కొనుగోలులో ఎలాంటి ఇబ్బందులు తలెత్తకుండా చర్యలు చేపడుతున్నారు. కొనుగోలు కేంద్రాల ఏర్పాటుకు అధికారులు రంగం సిద్ధం చేస్తున్నారు. అధికారులతో చర్చించి దానికి అనుగుణంగా మండలాల్లో ఐదు నుంచి ఆరు కొనుగోలు కేంద్రాలు ఏర్పాటుకు ప్రణాళికలు రచిస్తున్నారు. రైతులు పీఏసీఎస్ కొనుగోలు కేంద్రాల్లో ధాన్యం విక్రయించి మద్దతు ధర పొందాలని అధికారులు కోరారు.
