Attack on Women in Warangal : అత్యద్భుత శిల్పసంపద.. తెగువ మారుపేరైన పడతులు నడయాడిన నేల.. నేడు తెలంగాణలోనే అతివేగంగా అభివృద్ధి చెందుతున్న నగరం ఓరుగల్లు. అలాంటి ప్రతిష్ఠ కలిగిన ఈ నేల.. కొందరు ఉన్మాదుల ఆకృత్యాలతో చెడ్డపేరు మూటకట్టుకుంటోంది. వేల మంది కలిగిన సైన్యాలను ఒంటిచేత్తో మట్టి కరిపించిన రాణీ రుద్రమ, సమ్మక్క వంటి పోరాటయోధురాళ్లు పుట్టిన ఈ మట్టిలో.. నేడు అమ్మాయిలకు భద్రత కరువైంది. ఇంటి నుంచి బయటకు వెళ్తే ఎవరు వేధిస్తారో.. ప్రేమ పేరుతో ఎవరు వెంటపడతారో.. ఒప్పుకోకపోతే ఎక్కడ హతమారుస్తారోనని అనుక్షణం భయంతో బతకాల్సిన పరిస్థితులు ఏర్పడ్డాయి. తమ ఆడపిల్లలను చదువుకోసమని బయటకు పంపాలని.. వారి భవిష్యత్‌కు బంగారు బాట వేయాలని తపిస్తున్న తల్లిదండ్రులకు ఈ ప్రేమోన్మాదులు వణుకు పుట్టిస్తున్నారు. స్వప్నిక.. రవళి.. హారతి.. నిన్న అనూష.. ఇలా వీరి లాంటి పరిస్థితి తమ కూతుళ్లకు ఎక్కడ వస్తుందోనని కన్నవాళ్లు.. క్షణక్షణం భయం గుప్పిట్లో కాలం వెళ్లదీస్తున్నారు.
గొంతు కోసిన ప్రేమ : శుక్రవారం రోజున హనుమకొండలో అనూష అనే యువతిని అజార్ అనే యువకుడు గొంతుకోసి హతమార్చడం సభ్యసమాజాన్ని నివ్వెరపరిచింది. కాకతీయ యూనివర్సిటీలో ఎంసీఏ పూర్తి చేసి.. పోటీ పరీక్షల కోసం హైదరాబాద్‌లో శిక్షణ తీసుకుంటూ గురువారం రోజున తన సొంతూరుకు వెళ్లిన అనూష.. ఒంటరిగా ఇంట్లో ఉన్న సమయంలో అజార్ చొరబడ్డాడు. తన ప్రేమను నిరాకరించిందనే కోపంతో గొంతు కోశాడు. ఆమె కొనప్రాణాలతో రక్తపు మడుగులో కొట్టుమిట్టాడుతోంటే.. పైశాచిక ఆనందాన్ని పొందుతూ చోద్యం చూశాడు. 'నన్ను ప్రేమించని నీకు ఇదే గతి పట్టాలి' అని అనుకుంటూ అక్కణ్నుంచి పరారయ్యాడు.
అనూష కంటే ముందు మరో అమ్మాయి : ఈ ఘటన జరిగిన 24 గంటలలోపే అజార్‌ను వరంగల్ పోలీసులు అరెస్ట్ చేశారు. మొదటి నుంచి నేర ప్రవృత్తి గల అజార్ వరంగల్ జిల్లా సంగెం మండలం మొండ్రాయి గ్రామ నివాసి. అల్లరిచిల్లరగా తిరుగుతూ అమ్మాయిలను ఆటపట్టించే అజార్.. అనూష కంటే ముందు మరో అమ్మాయిని ప్రేమ పేరుతో వేధింపులకు గురి చేసినట్లు స్థానికులు చెప్పారు. ఆ యువతి తండ్రి అజార్ చేష్టలకు ఆత్మహత్య చేసుకున్నా.. ఆ అమ్మాయిని ఆ రాక్షసుడు వదల్లేదని తెలిపారు. అతణ్నుంచి తప్పించుకుని బంధువుల ఇంటికి వెళ్లిన ఆ అమ్మాయిని అక్కడా అజార్ వేధించడంతో చివరకు పోలీసులను ఆశ్రయించిందని వెల్లడించారు. పోలీసులు అజార్‌ను తీవ్రంగా మందలించి వదిలేయడంతో మళ్లీ ఇప్పుడు అనూష వెంటపడ్డాడు. ఆమె తన ప్రేమను తిరస్కరించడంతో కక్ష పెంచుకున్న అజార్ ఆమె గొంతు కోశాడు. ప్రాణాపాయం తప్పినా.. జరిగిన ఘటన తాలూకు షాక్ నుంచి కోలుకోవడానికి ఆమెకు, అనూష కుటుంబానికి చాలా సమయమే పడుతుంది.
సంబంధిత కథనాలు :
- హనుమకొండలో అమానుష ఘటన.. యువతి గొంతుకోసిన ప్రేమోన్మాది
- విద్యార్థినిపై దాడి కేసులో ప్రేమోన్మాదిని అదుపులోకి తీసుకున్న పోలీసులు
వణుకు పుట్టించిన స్వప్నిక ఘటన : ఇదే విధంగా 2008 సంవత్సరంలో యావత్ దేశాన్ని వణికించిన స్వప్నిక కేసును తలుచుకుంటే ఇప్పటికీ వెన్నులో వణుకు పుడుతుంది. ఇంజినీరింగ్ చదువుతున్న స్వప్నిక తన ప్రేమను నిరాకరించిందన్న అక్కసుతో శ్రీనివాస రావు అనే యువకుడు రాక్షసుడిలా మారాడు. మృగంలా మారిన ఆ కీచకుడు.. స్వప్నిక తన స్నేహితురాలితో కళాశాల నుంచి తిరిగి వస్తుండగా ఆమెపై యాసిడ్ దాడికి పాల్పడ్డాడు. ఈ ఘటనలో స్వప్నిక చనిపోవడం అప్పట్లో ఆడపిల్ల ఉన్న ప్రతి తల్లిదండ్రులను తీవ్రంగా భయపెట్టింది. అనంతరం శ్రీనివాస రావు.. అతడి స్నేహితులను పోలీసులు ఎన్‌కౌంటర్‌ చేయడమూ సంచలనమైంది.
పట్టపగలే నిప్పంటించాడు : 2019 ఫిబ్రవరిలో సాయి అన్వేశ్ అనే మరో ప్రేమోన్మాది.. తన ప్రేమను తిరస్కరించిందన్న కారణంతో పీజీ చదువుతున్న రవళి అనే యువతిపై పట్టపగలు అందరూ చూస్తుండగానే పెట్రోల్ పోసి నిప్పంటించాడు. మంటల ధాటికి నడిరోడ్డుపైనే విలవిలలాడుతూ ఆ యువతి ప్రాణాలు విడిచింది. ఈ ఘటన.. అమ్మాయిలను ఉన్నత చదువులకు ఇంటి నుంచి బయటకు పంపించాలంటే జడుసుకునేలా కన్నవాళ్లను భయపెట్టింది.
గొంతు కోసి హతమార్చి : 2020.. నగరం ఫాస్ట్ ఫార్వార్డ్‌లో ప్రగతి పథంలో దూసుకెళ్తోంది. ఓరుగల్లు నగర సిగలో టెక్ పార్కులు, టైక్స్ టైల్ పార్కులు ఇలా ఎన్నో అంతర్జాతీయ సంస్థలు చేరాయి. అభివృద్ధిలో అద్భుతంగా పరుగులు పెడుతోంది. కానీ మహిళల రక్షణ విషయానికొచ్చే సరికి ఇంకా స్వాతంత్య్రం రాక ముందు ఉన్న పరిస్థితులే కనిపిస్తున్నాయి. 2020 జనవరిలో రాంనగర్‌ ప్రాంతంలో ఇంకో ప్రేమోన్మాది షాహిద్.. హారతి అనే యువతికి ప్రేమ పేరుతో మాయ మాటలు చెప్పి తన గదికి రప్పించుకున్నాడు. అతణ్ని నమ్మి వెళ్లిన ఆమెను కత్తితో గొంతు కోసి అతి దారుణంగా హతమార్చాడు. ఆ కిరాతకుడి చెర నుంచి తప్పించుకోలేక ఆమె అక్కడికక్కడే ప్రాణాలు వదిలింది.
ఇలా ఓరుగల్లులో నిత్యం ఎక్కడో చోట ఆడపిల్లలు బలవుతూనే ఉన్నారు. ప్రేమించాలని వెంటపడుతూ కొందరు.. ప్రేమించినట్లు నటించి మరికొందరు.. ప్రేమ పేరుతో అవసరం తీర్చుకుని మరికొందరు.. అమ్మాయిలపై అరాచకాలకు పాల్పడుతూనే ఉన్నారు. తమ బిడ్డలకు అలాంటి పరిస్థితి రాకూడదని నిత్యం తల్లిదండ్రులు కోటి దేవుళ్లకు మొక్కుకంటూనే ఉన్నారు. కానీ ఆ దేవుడు మాత్రం కొందరి ప్రార్థనలే వింటున్నంట్లున్నాడు. అందుకే స్వప్నిక.. రవళి.. హారతి.. అనూష లాంటి యువతులు ప్రేమోన్మాదుల చేతిలో బలవుతూనే ఉన్నారు.
- ఇదీ చదవండి : జవాన్ల బస్సుపై ఉగ్రవాదులు ఎలా దాడి చేశారంటే..?
