నిన్నటిదాకా చిన్న చిన్న మొక్కలే. ఏడాది దాటకుండానే ఆ ప్రదేశం చిట్టడవిని తలపిస్తోంది. ప్రతిష్ఠాత్మక జాతీయ సాంకేతిక విద్యాసంస్థ యాజమాన్యం వరంగల్లో 8 నెలల క్రితం చేపట్టిన మియావాకి విధానం సత్ఫలితాలనిస్తోంది. మొక్కలన్నీ ఆరడుగులు ఏపుగా పెరిగి విద్యాలయ ప్రాంగణమంతా పచ్చదనం పరుచుకుంది.
రాష్ట్ర ప్రభుత్వం ప్రతిష్ఠాత్మకంగా తీసుకున్న హరితహారంలో భాగంగా మియావాకి విధానంలో తక్కువ విస్తీర్ణంలోనే నిట్ నిర్వాహకుల ఎక్కువ మొక్కలు నాటారు. అటవీ శాఖ సహకారంతో వివిధ రకాల పూలు, పండ్ల మొక్కలు గతేడాది ఆగస్టు 15న పెంచడం ప్రారంభించారు. రెండెకరాల్లోనే 6 వేల మొక్కలు ఏపుగా పెరిగి చిన్నపాటి అడవిలా కనువిందు చేస్తోంది.
మొక్కలు నాటడంతోనే సరిపెట్టుకోకుండా ఆ మొక్కల సంరక్షణ బాధ్యతను విద్యార్థులు, అధ్యాపకులు తీసుకోవడం సత్ఫలితాలనిచ్చింది. చింత, రావి, వేప, మర్రి, ఉసిరి, సీతాఫలం, మామిడి, పారిజాతం, అల్లనేరేడు, ఆరె, పెద్దారె, కుంకుడు మొదలైన స్థానికంగా ఉండే 20 జాతుల మొక్కలు ఏపుగా పెరగడంతో పక్షుల కిలకిలరావాలు, సీతాకోకచిలుకల కొత్త అందాలు సందడి చేస్తున్నాయి.
ఇదే స్ఫూర్తితో రెండో దశకూ విద్యార్థులు, అధ్యాపక బృందం శ్రీకారం చుట్టింది. మరో ఎకరం విస్తీర్ణంలో మొక్కలు నాటి వాటిని కంటికి రెప్పలా కాపాడుతున్నారు.
