ఆసుపత్రి అభివృద్ధికి తలో చెయ్యి..!

ప్రజా ప్రతినిధులు, అధికారులు, వైద్యులు అందరూ ఒక్క చోట చేరారు. ప్రజలకు ఇంకా మెరుగైన సేవలు చేయాలంటే ఏం చేయాలని చర్చించుకున్నారు. ఉన్న సమస్యలు తీర్చటానికి సమష్టి కృషి చేద్దామని తీర్మానించుకున్నారు.

వరంగల్​ ఎంజీఎంలో ఆసుపత్రి అభివృద్ధి కమిటీ సమావేశమై పలు కీలక ప్రతిపాదనలు చేసింది. సమావేశానికి జిల్లా పాలానాధికారితో పాటు ఎమ్మెల్యేలు దాస్యం వినయ్ భాస్కర్, నన్నపనేని నరేందర్, వివిధ సంస్థల ప్రతినిధులు హాజరయ్యారు.

ప్రజలకు అన్ని సమయాల్లో మెరుగైన వైద్య సేవలందిస్తున్నందుకు వరంగల్​ ఎంజీఎం వైద్యులను జిల్లా పాలనాధికారి అభినందించారు. అందరు సమష్టిగా పని చేసి ఆసుపత్రిని మెరుగు పర్చాలని కోరారు. ఆసుపత్రికి రూ.25 లక్షలతో వెంటిలేటర్ సౌకర్యం ఉన్న అంబులెన్సులు అందజేస్తానని ఎమ్మెల్యే వినయ్​భాస్కర్​ హామీ ఇచ్చారు. తూర్పు ఎమ్మెల్యే నరేందర్ తన నిధుల నుంచి కోటి రూపాయలను ఆసుపత్రి అభివృద్ధికి కేటాయిస్తానని ప్రకటించారు.
ఇవేకాక నూతనంగా 20 పడకల ఐసీయూ కేంద్రం ఏర్పాటుకు ప్రతిపాదనలు తయారు చేయడంతో పాటు విద్యుత్ సబ్ స్టేషన్ నిర్మాణానికి డీపీఆర్​ తయారుచేయాలని అధికారులు సంకల్పించారు.